ginti 20:1-29
20 pehale maheene mein israeliyon ki poori mandli sin veerane mein pahunchi aur vahaan log kaadesh mein rehne lage.+ vahin par miryam+ ki maut ho gayi aur use dafnaya gaya.
2 kaadesh mein logon ke liye paani nahin tha+ aur woh sab moosa aur haaroon ke khilaf uth khade huye.
3 woh moosa se jhagadne lage+ aur kehne lage, “kaash, hum bhi apne bhaaiyon ke saath yahova ke saamne mar gaye hote!
4 tum yahova ki mandli ko kyon is veerane mein le aaye ho? bas isliye ki hum aur hamare jaanvar yahaan mar jaayen?+
5 tum kyon hamein misra se nikaalkar aisi bekar aur ghatiya jagah le aaye ho?+ yahaan na to beej boya jaa sakta hai aur na hi yahaan angooron ke baag ya anjeer ya anar hain, peene ke liye paani tak nahin hai.”+
6 tab moosa aur haaroon mandli ke saamne se nikaalkar bheint ke tamboo ke dvar par gaye aur munh ke bal zameen par gire. fir yahova ki mahima un par prakat hone lagi.+
7 yahova ne moosa se kaha,
8 “apni chhadi haath mein le aur apne bhaai haaroon ko saath lekar poori mandli ko us chattan ke saamne ikattha kar. unki aankhon ke saamne chattan se bol ki woh paani de. is tarah tu us chattan se paani nikaalega aur logon ki mandli aur unke jaanvar usmein se peeyenge.”+
9 tab moosa ne yahova ke saamne apni chhadi li,+ theek jaise parmeshvar ne use aagya di thi.
10 fir moosa aur haaroon ne poori mandli ko chattan ke saamne ikattha kiya aur moosa ne unse kaha, “hey baagiyo, suno! kya hamein is chattan se tumhare liye paani nikaalna hoga?”+
11 fir moosa ne apna haath oopar uthaya aur chhadi se do baar chattan ko maara aur chattan se paani umadne laga. tab mandli ke log aur unke jaanvar usmein se peene lage.+
12 baad mein yahova ne moosa aur haaroon se kaha, “tum donon ne mujh par vishvas nahin kiya aur israel ke logon ke saamne mujhe pavitra nahin thehraya. isliye tum is mandli ko us desh mein nahin le jaaoge jo main ise denevala hoon.”+
13 yah mareeba* ka sota hai+ aur yahin par israeliyon ne yahova se jhagda kiya tha aur woh unke beech pavitra thehraya gaya.
14 fir moosa ne kaadesh se edom ke raja ke paas apne doot bhejkar yah kehalvaya ,+ “tere bhaai israel+ ne yah sandesh bheja hai: ‘tu achhi tarah jaanta hai ki hum kaisi-kaisi museebaton se guzre hain.
15 hamare purkhe misra gaye+ aur hum kai saalon* tak vahin rahe the.+ misriyon ne hamare purkhon ke saath aur hamare saath bahot bura salook kiya.+
16 aakhirkar hamne yahova ki duhai di+ aur usne hamari suni. ek swargdoot bhejkar+ woh hamein misra se baahar le aaya. ab hum kaadesh shehar mein hain jo tere ilake ki sarhad par hai.
17 isliye meharbani karke hamein apne desh se hokar jaane de. hum tere kisi khet ya angooron ke baag se hokar nahin jaayenge aur na hi tere kisi kuyen se paani peeyenge. hum bas “raja ki sadak” par seedhe chalte huye aage badheinge aur jab tak tere ilake se nahin nikaal jaate, hum na daayen mudeinge na baayen.’”+
18 magar edom ne moosa se kaha, “tum log hamare ilake se nahin jaa sakte. agar tumne jaane ki koshish ki to mujhe tumhare khilaf talvar uthani padegi.”
19 tab israeliyon ne edom se kaha, “dekh, hum bas raajmarg se jaayenge. agar hamne aur hamare jaanvaron ne tera paani peeya to uski keemat chuka deinge.+ hum sirf tere raaste se paidal chalkar jaane ki ijazat maangte hain.”+
20 fir bhi edom nahin maana. usne saaf keh diya, “tum hamare ilake se hargiz nahin jaa sakte.”+ iske baad edom ek badi aur taakatvar sena* lekar israeliyon ko rokne ke liye aaya.
21 is tarah edom ne israel ko apne ilake se jaane ki ijazat nahin di. isliye israel vahaan se mudkar doosre raaste chal diya.+
22 israel ki mandli ke sabhi log kaadesh se nikle aur hor pahad+ ke paas aaye,
23 jo edom desh ki sarhad ke paas hai. tab yahova ne hor pahad par moosa aur haaroon se kaha,
24 “haaroon ki maut ho jaayegi.*+ woh us desh mein nahin jaayega jo main israeliyon ko denevala hoon, kyonki tum donon ne mareeba ke sote ke baare mein meri aagya ke khilaf jaakaar bagavat ki.+
25 tu haaroon aur uske bete eliazar ko lekar hor pahad ke oopar aa.
26 vahaan tu haaroon ki yaajak ki poshak+ utaarna aur uske bete eliazar+ ko pehanna. usi pahad par haaroon ki maut hogi.”*
27 tab moosa ne vaise hi kiya jaise yahova ne use aagya di thi. poori mandli ke dekhte woh teenon hor pahad par chadhkar gaye.
28 tab moosa ne haaroon ki poshak utaari aur uske bete eliazar ko pehnayi. iske baad, usi pahad ki choti par haaroon ki maut ho gayi.+ fir moosa aur eliazar pahad se neeche utar aaye.
29 jab mandli ke sab logon ko pata chala ki haaroon ki maut ho gayi hai, to israel ke sabhi gharane 30 din tak haaroon ke liye rote rahe.+
kai footnote
^ matlab “jhagda karna.”
^ shaa., “dinon.”
^ shaa., “haath.”
^ shaa., “haaroon apne logon mein jaa milega.”
^ shaa., “apne logon mein jaa milega aur mar jaayega.”
