ginti 36:1-13
-
jo ladkiyaan vaaris banti hain unki shaadi ke baare mein niyam (1-13)
36 gilad ke vanshajon ke parivaron ke mukhiya, moosa aur israeliyon ke pradhanon ke paas aaye. gilad maakeer ka beta tha+ aur maakeer manashshe ka beta tha aur manashshe yoosuf ke beton ke gharanon mein se tha.
2 unhonne moosa aur pradhanon se kaha, “maalik, yahova ne tujhe aagya di hai ki chitthiyaan daalkar desh ki zameen ka batvara karna+ aur sabhi israeliyon ko unki virasat ki zameen dena. aur maalik, yahova ne tujhe yah bhi aagya di ki hamare bhaai salofad ki virasat ki zameen uski betiyonn ko di jaaye.+
3 ab agar uski betiyaan israel ke kisi doosre gotra ke aadmiyon se shaadi karti hain, to hamare purkhon ki virasat ki zameen se hum un ladkiyon ka hissa kho deinge kyonki unki zameen us gotra ki ho jaayegi jiske aadmiyon se woh shaadi karti hain. is tarah hamare gotra ki virasat ki zameen kam ho jaayegi jo chitthiyaan daalkar hamein di gayi hai.
4 fir jab israeliyon ke liye chhutkare ka saal+ aayega, to un ladkiyon ki virasat ki zameen hamesha ke liye us gotra ki ho jaayegi jahaan unki shaadi hoti hai. is tarah hamare purkhon ke gotra ko di gayi virasat mein se hum unka hissa kho deinge.”
5 tab moosa ne yahova ke aadesh par israeliyon ko yah aagya di, “yoosuf ke beton ka gotra bilkul sahi keh raha hai.
6 isliye yahova ne salofad ki betiyonn ke liye yah aagya di hai: ‘woh apni pasand ke aadmiyon se shaadi kar sakti hain, basharte woh aadmi unke pita ke gotra ke kisi parivar ke hon.
7 israel ke kisi bhi gotra ki virasat ki zameen doosre gotra mein nahin jaani chahiye, kyonki sabhi israeliyon ko apne-apne purkhon ke gotra ki virasat par adhikar banaye rakhna chahiye.
8 aur agar israel ke kisi gotra mein ek ladki ko apne pita ki virasat ki zameen milti hai, to use apne pita ke gotra ke hi kisi aadmi se shaadi karni chahiye.+ aisa isliye kiya jaaye taaki sabhi israeli apne-apne purkhon ki virasat par adhikar banaye rakhein.
9 virasat ki koi bhi zameen ek gotra se doosre gotra mein nahin jaani chahiye, kyonki israel ke sabhi gotron ko apni-apni virasat par adhikar banaye rakhna chahiye.’”
10 salofad ki betiyonn ne theek vaise hi kiya jaise yahova ne moosa ko aagya di.+
11 mahla, tirsa, hogla, milka aur noa ne apne chachere bhaaiyon se shaadi ki.
12 unhonne yoosuf ke bete manashshe ke gotra ke hi aadmiyon se shaadi ki taaki unki virasat ki zameen unke pita ke gotra mein hi bani rahe.
13 yahova ne ye saari aagyayen aur nyay-siddhaant moosa ke zariye israeliyon ko tab diye jab woh yareeho ke saamne yardan ke paas moab ke veeranon mein the.+
