jakaryah 7:1-14
7 raja daara ke raaj ke chauthe saal mein, kislev* naam ke nauvein maheene ke chauthe din, yahova ka sandesh jakaryah ke paas pahuncha.+
2 betel ke logon ne shareser, regem-melek aur uske aadmiyon ko bheja ki woh yahova se daya ki bheekh maangein.
3 unhonne senaon ke parmeshvar yahova ke bhavan* ke yaajkon aur uske bhavishyavaktaon se poochha, “kya hum* paanchvein maheene mein vilap+ aur upvas karein, jaisa hum itne saalon se karte aaye hain?”
4 senaon ke parmeshvar yahova ka sandesh ek baar fir mere paas pahuncha:
5 “desh ke sab logon aur yaajkon se keh, ‘tumne 70 saalon+ mein har paanchvein aur saatvein maheene shok manakar jo upvas kiya,+ kya woh sachmuch mere liye tha?
6 jab tum khaa rahe the aur pi rahe the, to kya apne liye nahin khaa-pi rahe the?
7 jab yarooshalem aur uske aas-paas ke shehar chain se base the, jab negeb aur shafelah aabad the, tab tumhein yahova ki baat maanni chahiye thi jo usne pehale ke bhavishyavaktaon se kehalvayi thi.’”+
8 yahova ka sandesh ek baar fir jakaryah ke paas pahuncha:
9 “senaon ka parmeshvar yahova kehta hai, ‘sachchai se nyay karo,+ ek-doosre par daya karo aur atal pyar rakho.+
10 vidhvaon aur anathon* ko mat thago,+ pardesiyon aur gareebon ko mat looto.+ apne dilon mein ek-doosre ke khilaf saazish mat racho.’+
11 magar logon ne dhyan dene se inkar kar diya.+ dheeth hokar unhonne usse munh fer liya+ aur apne kaan band kar liye ki uski na sunein.+
12 unhonne apna dil heere* jaisa sakht kar liya.+ unhonne senaon ke parmeshvar yahova ki un baaton aur aagyaon* ko nahin maana, jinhein sunane ke liye usne pehale ke bhavishyavaktaon ko pavitra shakti di thi.+ isliye senaon ke parmeshvar yahova ka krodh un par bhadak utha.”+
13 “senaon ka parmeshvar yahova kehta hai, ‘mere* bulane par unhonne meri nahin suni,+ isliye unke bulane par main bhi unki nahin sunoonga.+
14 mainne aandhi laakaar unhein sab anjan raashtron mein bikher diya.+ unke chale jaane ke baad unka desh ujaad pada raha, vahaan koi lautkar nahin aaya, koi usmein se hokar nahin guzra.+ kyonki dushmanon ne us khoobsoorat desh ka woh haal kar diya ki dekhnevalon ke rongte khade ho jaate hain.’”
kai footnote
^ ya “mandir.”
^ shaa., “main.”
^ ya “jinke pita ki maut ho gayi hai.”
^ ya shaayad, “koi aur sakht patthar.”
^ ya “shikshaon.”
^ shaa., “uske.”
