laivyavyavastha 14:1-57
14 yahova ne moosa se yah bhi kaha,
2 “jab ek aadmi ka kodh theek ho jaata hai, to yah zaroori hai ki use shuddh thehrane ke liye yaajak ke paas laaya jaaye. jis din use laaya jaata hai us din use shuddh thehrane ke liye is niyam ka paalan kiya jaana chahiye.+
3 yaajak chhaavni ke baahar us aadmi ke paas jaayega aur uski jaanch karega. agar woh dekhta hai ki us aadmi ka kodh theek ho gaya hai,
4 to woh use aagya dega ki woh do shuddh chidiyaan, devdar ki lakdi, surkh laal kapda aur marua laaye taaki use shuddh kiya jaaye.+
5 fir yaajak aagya dega ki ek chidiya ko liya jaaye aur use taaze paani se bhare mitti ke bartan ke oopar halal kiya jaaye.
6 fir woh zinda chidiya lega aur uske saath devdar ki lakdi, surkh laal kapda aur marua bhi lega aur in sabko ek-saath pehali chidiya ke khoon mein duboyega jise taaze paani ke oopar halal kiya gaya tha.
7 fir woh bartan se khoon lega aur us aadmi par saat baar chhidkega, jo kodh se shuddh hone ke liye aaya hai, aur ailan karega ki woh aadmi shuddh hai. woh zinda chidiya ko khule maidan mein chhod dega.+
8 jis aadmi ko shuddh kiya jaa raha hai use chahiye ki woh apne kapde dhoye, apne sab baal moonde aur nahaye. woh shuddh ho jaayega. iske baad woh chhaavni mein aa sakta hai, magar use saat din tak apne tamboo ke baahar rehna hoga.
9 saatvein din use apne sir, thodhi aur bhaunhon ke saare baal moondne chahiye. fir use apne kapde dhone chahiye aur nahana chahiye. woh shuddh ho jaayega.
10 aathvein din woh yaajak ke paas ye saari cheezen lekar jaayega: aise do nar memne jinmein koi dosh na ho, ek saal ki maada memna jismein koi dosh na ho,+ anaj ke chadhave ke liye epa ka teen-dahai bhaag* maida jismein tel mila ho+ aur loj-bhar* tel.+
11 jo yaajak ailan karta hai ki woh aadmi shuddh hai, woh us aadmi ko uske chadhave ke saath bheint ke tamboo ke dvar par yahova ke saamne le jaayega.
12 fir yaajak dosh-bali ke liye ek nar memna+ aur loj-bhar tel lega aur unhein yahova ke saamne aage-peechhe hilayega. yah hilakar diya jaanevala chadhava hai.+
13 fir woh memne ko pavitra jagah mein halal karega, jahaan aam taur par paap-bali aur hom-bali ka jaanvar halal kiya jaata hai,+ kyonki paap-bali ki tarah dosh-bali ke gosht par yaajak ka hak hai.+ yah bahot pavitra hai.+
14 fir yaajak dosh-bali ke memne ka thoda-saa khoon lega aur shuddh honevale aadmi ke daayen kaan ke nichle sire par, daayen haath ke angoothe par aur daayen pair ke angoothe par lagayega.
15 fir yaajak loj-bhar tel mein se thoda tel lekar+ apni baayin hatheli par daalega.
16 fir apne daayen haath ki ungli us tel mein duboyega aur yahova ke saamne saat baar apni ungli se use chhidkega.
17 iske baad yaajak hatheli par bache tel mein se thoda tel lega aur shuddh honevale aadmi ke daayen kaan ke nichle sire par, daayen haath ke angoothe par aur daayen pair ke angoothe par lagayega, jin par pehale se dosh-bali ke jaanvar ka khoon laga hoga.
18 yaajak ki hatheli mein jo tel bach jaata hai, use woh shuddh honevale aadmi ke sir par daalega. aur yaajak yahova ke saamne us aadmi ke liye prayashchit karega.+
19 iske baad yaajak paap-bali chadhayega+ aur us aadmi ke liye prayashchit karega jo ashuddh haalaat se shuddh kiya jaa raha hai. fir woh hom-bali ka jaanvar halal karega.
20 yaajak vedi par hom-bali aur anaj ka chadhava arpit karega+ aur us aadmi ke liye prayashchit karega+ aur woh aadmi shuddh ho jaayega.+
21 agar woh aadmi gareeb hai aur uski itni haisiyat nahin ki in cheezon ki bali de sake to apne prayashchit ke liye woh ek nar memne ki dosh-bali dega jise aage-peechhe hilakar chadhaya jaayega. saath hi, woh anaj ke chadhave ke liye epa ka dasvaan bhaag* maida jismein tel mila ho, loj-bhar tel
22 aur apni haisiyat ke mutabik do faakhte ya kabootar ke do bachche dega. ek chidiya paap-bali ke liye aur doosri hom-bali ke liye hogi.+
23 woh aathvein din+ yah sab lekar bheint ke tamboo ke dvar par yahova ke saamne jaayega aur yaajak ko dega taaki use shuddh thehraya jaaye.+
24 yaajak dosh-bali ka memna+ aur loj-bhar tel lega aur unhein yahova ke saamne aage-peechhe hilayega. yah hilakar diya jaanevala chadhava hai.+
25 fir woh dosh-bali ka memna halal karega. yaajak us dosh-bali ka thoda-saa khoon lega aur shuddh honevale aadmi ke daayen kaan ke nichle sire par, daayen haath ke angoothe par aur daayen pair ke angoothe par lagayega.+
26 fir yaajak thoda tel lekar apni baayin hatheli par daalega+
27 aur apne daayen haath ki ungli se us hatheli ka thoda tel lega aur yahova ke saamne saat baar chhidkega.
28 iske baad yaajak us tel mein se thoda tel lekar shuddh honevale aadmi ke daayen kaan ke nichle sire par, daayen haath ke angoothe par aur daayen pair ke angoothe par lagayega, jahaan pehale usne dosh-bali ke jaanvar ka khoon lagaya tha.
29 yaajak ki hatheli mein jo tel bach jaata hai, use woh shuddh honevale aadmi ke sir par daalega taaki yahova ke saamne us aadmi ke liye prayashchit kar sake.
30 woh aadmi apni haisiyat ke mutabik jo faakhte ya kabootar ke bachche dega,+ unmein se ek ki
31 paap-bali aur doosre ki hom-bali chadhayi jaayegi.+ saath hi, anaj ka chadhava bhi chadhaya jaayega. aur yaajak shuddh honevale us aadmi ke liye yahova ke saamne prayashchit karega.+
32 yah niyam aise aadmi ke liye hai jiska kodh theek ho gaya hai, magar uski itni haisiyat nahin ki woh un cheezon ki bali de sake jo use shuddh thehrane ke liye zaroori hain.”
33 fir yahova ne moosa aur haaroon se kaha,
34 “jab tum log kanaan desh mein bas jaaoge+ jiska main tumhein adhikari banaunga,+ tab agar main kisi ghar par kodh lagne doon,+
35 to us ghar ke maalik ko chahiye ki woh yaajak ke paas jaaye aur usse kahe, ‘mere ghar ki deevar par ek daag dikhayi de raha hai aur woh kodh jaisa lag raha hai.’
36 tab yaajak use aagya dega ki isse pehale ki woh ghar ki jaanch karne aaye ghar khaali kar diya jaaye. varna us ghar mein jo bhi hai use yaajak ashuddh thehra dega. jab ghar khaali kar diya jaayega, tab yaajak ghar ke andar jaakaar uska muayna karega.
37 woh deevar ke us hisse ki jaanch karega jahaan beemari ke lakshan nazar aate hain. agar deevar par peele-hare ya laal rang ke gaddhe hain aur ye deevar ki satah ke andar tak nazar aate hain,
38 to yaajak ghar se baahar dvar par jaayega aur saat din ke liye use band kar dega.+
39 fir saatvein din yaajak vaapas us ghar par aayega aur uska muayna karega. agar deevaron ke baaki hisson mein bhi daag fail gaye hain,
40 to yaajak aagya dega ki deevar se woh patthar nikaal diye jaayen jinmein daag hain aur ye patthar shehar ke baahar kisi ashuddh jagah le jaakaar feink diye jaayen.
41 iske baad woh aagya dega ki ghar ka poora androoni hissa achhi tarah khurach diya jaaye aur uska palastar aur gaara nikaalkar shehar ke baahar kisi ashuddh jagah le jaakaar feink diya jaaye.
42 fir deevar se nikaale gaye pattharon ki jagah doosre patthar lagaye jaayen aur poore ghar par naya gaara aur palastar lagaya jaaye.
43 lekin agar deevaron se patthar nikaalne, poore ghar ko khurachne aur naya palastar lagane ke baad fir se daag nikaal aate hain,
44 to yaajak us ghar ke andar jaayega aur uska muayna karega. agar us ghar mein beemari fail gayi hai to yah khatarnak kodh hai.+ woh ghar ashuddh hai.
45 yaajak aagya dega ki ghar dhaa diya jaaye aur uske patthar, uski balliyaan, us par laga saara palastar aur gaara, sab le jaakaar shehar ke baahar kisi ashuddh jagah par feink diya jaaye.+
46 jitne din tak woh ghar band rakha gaya tha+ us dauran agar koi uske andar gaya ho to woh shaam tak ashuddh rahega.+
47 agar us dauran koi us ghar mein soya ho, to use apne kapde dhone chahiye. usi tarah, agar us dauran koi us ghar ke andar kuch khaata hai, to use apne kapde dhone chahiye.
48 lekin agar ghar par naya palastar lagne ke baad, yaajak aakaar dekhta hai ki beemari ghar ki deevaron par nahin faili hai, to woh ailan karega ki ghar shuddh hai kyonki beemari door ho gayi hai.
49 ghar ki ashuddhta door karne ke liye woh do chidiyaan, devdar ki lakdi, surkh laal kapda aur marua lega.+
50 fir woh unmein se ek chidiya lega aur taaze paani se bhare mitti ke bartan ke oopar use halal karega.
51 iske baad woh devdar ki lakdi, marua, surkh laal kapda aur zinda chidiya lega aur un sabko pehali chidiya ke khoon mein duboyega, jise taaze paani ke oopar halal kiya gaya tha. fir woh bartan mein se khoon lega aur ghar ki taraf saat baar chhidkega.+
52 is tarah woh chidiya ke khoon, taaze paani, zinda chidiya, devdar ki lakdi, maruye aur surkh laal kapde se ghar ki ashuddhta door karke use shuddh karega.
53 fir woh zinda chidiya ko shehar se baahar khule maidan mein chhod dega aur ghar ke liye prayashchit karega. woh ghar shuddh ho jaayega.
54 ye saare niyam tarah-tarah ke kodh, sir ki khaal ya daadhi ke sankraman,+
55 poshak ya ghar par honevale kodh+
56 aur tvacha ki soojan, papdi aur daag ke baare mein hain+
57 taaki yah tay kiya jaa sake ki ek cheez kab ashuddh ho jaati hai aur kab shuddh.+ ye saare niyam kodh ke baare mein hain.”+
kai footnote
^ epa ka teen-dahai bhaag 6.6 l. ke barbar tha. ati. kha14 dekhein.
^ ek loj 0.31 l. ke barbar tha. ati. kha14 dekhein.
^ epa ka dasvaan bhaag 2.2 l. ke barbar tha. ati. kha14 dekhein.
