laivyavyavastha 17:1-16
17 yahova ne moosa se yah bhi kaha,
2 “tu haaroon aur uske beton se aur sabhi israeliyon se kehna, ‘yahova ne yah aagya di hai:
3 “agar koi israeli chhaavni ke andar ya chhaavni ke baahar bail, medha ya bakri halal karta hai,
4 bajay iske ki use yahova ko dene ke liye bheint ke tamboo ke dvar par laaye aur yahova ke is pavitra dere ke saamne arpit kare, to woh aadmi khoon ka doshi hoga. usne khoon bahane ka paap kiya hai isliye use maut ki saza di jaaye.
5 yah niyam isliye diya jaa raha hai taaki ab se israeli khule maidan mein jaanvaron ki bali na chadhayen balki apne jaanvar bheint ke tamboo ke dvar par yahova ke paas laayen aur yaajak ko dein. unhein yahova ke liye in jaanvaron ki shaanti-bali chadhani chahiye.+
6 yaajak bali ke jaanvar ka khoon lekar bheint ke tamboo ke dvar par yahova ki vedi par chhidkega aur uski charbi jalayega taaki uska dhuaan uthe aur uski sugandh paakaar yahova khush ho.+
7 ab se woh dusht swargdooton* ke liye bali na chadhayen+ jinki woh pooja* karte hain.+ yah niyam tumhein aur tumhari aanevali peedhiyon ko hamesha ke liye diya jaata hai.”’
8 tu unse kehna, ‘agar koi israeli ya tumhare beech rehnevala pardesi hom-bali ya kisi aur tarah ki bali chadhata hai
9 aur bali ka jaanvar yahova ko dene ke liye bheint ke tamboo ke dvar par nahin laata, to use maut ki saza di jaaye.+
10 agar koi israeli ya tumhare beech rehnevala pardesi kisi bhi jeev ka khoon khaata hai,+ to main use beshak thukra doonga aur use maut ki saza doonga.
11 kyonki harek jeevit prani ki jaan* uske khoon mein hai.+ aur mainne khud yah intazam thehraya hai ki khoon vedi par undela jaaye+ taaki tumhari jaan ke liye prayashchit ho, kyonki khoon mein hi jaan hai aur khoon se hi paapon ka prayashchit kiya jaa sakta hai.+
12 iseeliye mainne israeliyon se kaha, “kisi bhi israeli ya tumhare beech rehnevale pardesi+ ko khoon nahin khaana chahiye.”+
13 agar koi israeli ya tumhare beech rehnevala pardesi shikar karta hai aur aisa jangli jaanvar ya chidiya pakadta hai, jise khaane ki tumhein ijazat hai, to use us jaanvar ya chidiya ka khoon zameen par baha dena chahiye+ aur mitti se dhaanp dena chahiye.
14 harek jeevit prani ka khoon hi uska jeevan hai kyonki khoon mein uski jaan hai. iseeliye mainne israeliyon se kaha, “tum kisi bhi jeevit prani ka khoon na khaana, kyonki har jeevit prani ka khoon uska jeevan hai. jo bhi khoon khaayega use maut ki saza di jaayegi.”+
15 agar koi israeli ya tumhare beech rehnevala pardesi aise jaanvar ka gosht khaata hai, jo use mara hua m
ila tha ya jise jangli jaanvar ne faad daala tha,+ to use apne kapde dhone chahiye aur nahana chahiye. woh shaam tak ashuddh rahega.+ uske baad woh shuddh hoga.
16 agar woh apne kapde nahin dhota aur nahata nahin, to use apne gunah ka lekha dena hoga.’”+
