laivyavyavastha 23:1-44
23 yahova ne moosa se yah bhi kaha,
2 “israeliyon se kehna, ‘yahova tumhein saal ke alag-alag vakt par jo tyohar manane ke liye kehta hai,+ woh pavitra sabhayen hain. tumhein un tyoharon ka ailan karna hoga.+ tum saal ke alag-alag vakt par mere liye ye tyohar manana:
3 tum chhe din kaam kar sakte ho, magar saatvaan din sabt hoga, poore vishram+ aur pavitra sabha ka din hoga. is din tumhein kisi bhi tarah ka kaam nahin karna chahiye. tum jahaan bhi rehte ho, vahaan saatvaan din yahova ke liye sabt hoga.+
4 yahova ne tumhein saal ke alag-alag vakt par jo tyohar manane aur pavitra sabhayen rakhne ke baare mein bataya hai aur jinka tumhein tay vakt par ailan karna hai, woh ye hain:
5 saal ke pehale maheene ke 14vein din,+ shaam ke jhutpute ke samay* yahova ke liye fasah manaya jaayega.+
6 isi maheene ke 15vein din yahova ke liye bin-khameer ki roti ka tyohar hoga.+ tumhein saat din tak bin-khameer ki roti khaani hogi.+
7 pehale din tum ek pavitra sabha rakhoge.+ is din tumhein mehnat ka koi bhi kaam nahin karna chahiye.
8 tyohar ke saaton din tum yahova ke liye chadhava aag mein jalakar arpit karoge. saatvein din ek pavitra sabha hogi. is din tumhein mehnat ka koi bhi kaam nahin karna chahiye.’”
9 fir yahova ne moosa se kaha,
10 “israeliyon se kehna, ‘jab tum us desh mein bas jaaoge jo main tumhein denevala hoon aur tum apni fasal kaatoge, to pehale fal ka ek poola+ le jaakaar yaajak ko dena.+
11 yaajak woh poola yahova ke saamne aage-peechhe hilayega taaki tumhare liye manzoori paa sake. yaajak aisa sabt ke baadvale din karega.
12 jis din tumhari fasal ka poola aage-peechhe hilakar chadhaya jaayega, usi din tumhein ek saal ka aisa nar memna le jaakaar arpit karna hoga jismein koi dosh na ho. yah yahova ke liye hom-bali hai.
13 saath hi, tum anaj ka chadhava bhi chadhana. is chadhave mein tum epa ke do-dahai bhaag* maide mein tel milakar dena. ise aag mein jalakar yahova ke liye arpit kiya jaayega taaki iski sugandh paakaar woh khush ho. aur ek-chauthai heen* daakh-madira ka argh dena.
14 tumhein us din tak naya anaj ya bhuna hua anaj nahin khaana chahiye, na hi naye anaj se roti banakar khaani chahiye jab tak ki tum yah chadhava apne parmeshvar ko arpit nahin karte. tum jahaan bhi raho, yah niyam tum par peedhi-dar-peedhi hamesha ke liye laagoo rahega.
15 sabt ke baadvale din jab tum anaj ka poola laakaar dete ho aur use hilakar chadhaya jaata hai, to us din se tum saat sabt ginna.+ ye poore saat hafte hone chahiye.
16 is tarah jab saatvein sabt ke agle din 50 din poore honge,+ to us din tum yahova ko naye anaj ka chadhava arpit karna.+
17 is chadhave ke liye tum apne gharon se do-do rotiyaan laana taaki unhein hilakar chadhaya jaa sake. ye rotiyaan epa ke do-dahai bhaag* maide ki bani hon. maide mein khameer milana aur usse rotiyaan banakar tandoor mein seinkana.+ yah paki fasal ka pehala fal hai jo tum yahova ke liye arpit karoge.+
18 rotiyon ke saath tum ye jaanvar bhi arpit karna: ek-ek saal ke saat medhe jinmein koi dosh na ho, ek bail aur do medhe.+ tum yahova ke liye in jaanvaron ki hom-bali chadhana aur is bali ke saath diya jaanevala anaj ka chadhava aur argh bhi dena. in sabko aag mein jalakar yahova ko arpit karna taaki inki sugandh paakaar woh khush ho.
19 iske alava, tum bakri ke ek bachche ki paap-bali+ aur ek-ek saal ke do medhon ki shaanti-bali arpit karna.+
20 yaajak in donon medhon ko, paki fasal ke pehale falon yaani rotiyon ke saath yahova ke saamne aage-peechhe hilakar chadhayega. yah yahova ke liye hilakar diya jaanevala pavitra chadhava hai jis par yaajak ka hak hoga.+
21 is din tum ailan karna+ ki aaj ek pavitra sabha hai. is din tum mehnat ka koi kaam na karna. tum jahaan bhi raho, yah niyam tum par peedhi-dar-peedhi hamesha ke liye laagoo rahega.
22 jab tum apne khet ki fasal kaatoge to uska kona-kona saaf mat kar dena aur katai ke vakt jo baalein gir jaati hain unhein mat uthana.+ yah sab tum gareebon*+ aur tumhare beech rehnevale pardesiyon+ ke liye chhod dena. main tumhara parmeshvar yahova hoon.’”
23 yahova ne moosa se yah bhi kaha,
24 “israeliyon se kehna, ‘saatvein maheene ka pehala din, poore vishram ka din hoga. is din pavitra sabha hogi. yah yaadgar ka din hoga jiske baare mein turhi foonkkar ailan kiya jaayega.+
25 tum is din mehnat ka koi kaam na karna. aur tum yahova ke liye ek chadhava aag mein jalakar arpit karna.’”
26 fir yahova ne moosa se kaha,
27 “magar saatvein maheene ka dasvaan din prayashchit ka din hoga.+ is din tum ek pavitra sabha rakhna aur apne paapon ke liye dukh zahir karna*+ aur yahova ke liye ek chadhava aag mein jalakar arpit karna.
28 is din tum kisi bhi tarah ka kaam nahin karoge, kyonki yah prayashchit ka din hoga+ jab tumhare parmeshvar yahova ke saamne tumhare liye prayashchit kiya jaayega.
29 jo is din apne paapon ke liye dukh zahir nahin karega,* use maut ki saza di jaayegi.+
30 jo is din kisi bhi tarah ka kaam karega, use main uske logon mein se naash kar doonga.
31 tumhein is din kisi bhi tarah ka kaam nahin karna chahiye. tum jahaan bhi raho, yah niyam tum par peedhi-dar-peedhi hamesha ke liye laagoo rahega.
32 yah tumhare liye sabt ka din, poore vishram ka din hoga. saatvein maheene ke nauvein din ki shaam se tum apne paapon ke liye dukh zahir karna shuroo karoge.+ tum us din ki shaam se agle din ki shaam tak sabt manana.”
33 yahova ne moosa se yah bhi kaha,
34 “israeliyon se kehna, ‘saatvein maheene ke 15vein din chhapparon ka tyohar hoga. yah tyohar yahova ke liye saat din manaya jaayega.+
35 pehale din tum ek pavitra sabha rakhna aur us din mehnat ka koi bhi kaam na karna.
36 saat dinon tak tum yahova ke liye ek chadhava aag mein jalakar arpit karna. aathvein din tum ek pavitra sabha rakhna+ aur yahova ke liye ek chadhava aag mein jalakar arpit karna. yah parmeshvar ki upasna ke liye khaas sabha hogi. is din tumhein mehnat ka koi bhi kaam nahin karna chahiye.
37 ye saal ke alag-alag vakt par yahova ke liye manaye jaanevale tyohar hain,+ jinke baare mein tumhein ailan karna hai ki ye pavitra sabhayen hain.+ in tyoharon mein tum yahova ke liye yah sab chadhava aag mein jalakar arpit karoge: hom-bali,+ anaj ka chadhava+ aur argh.+ yah sab theek usi tarah chadhana jaise tyohar ke dauran har mauke ke liye tay kiya gaya hai.
38 tum yahova ke sabt ke maukon par jo chadhava dete ho+ aur uske liye jo bheint,+ mannat-bali+ aur swechha-bali+ diya karte ho, un sabke alava tum tyohar ke maukon par yahova ke liye bataya gaya chadhava dena.
39 saatvein maheene ke 15vein din yaani apne khet ki fasal batorne ke baad, tum saat din tak yahova ke liye tyohar manana.+ pehala aur aathvaan din poore vishram ka din hoga.+
40 pehale din tum badhiya pedon ke fal aur khajoor, ghane pattonvale pedon+ aur ghaati ke peepal ki daaliyaan lena aur saat din+ tak apne parmeshvar yahova ke saamne khushiyaan manana.+
41 saal ke ye saat din tum yahova ke liye tyohar manana.+ tum yah tyohar saatvein maheene mein manana. yah niyam tum par peedhi-dar-peedhi hamesha ke liye laagoo rahega.
42 is tyohar ke saaton din tumhein chhappron mein rehna hoga.+ israel ke sab logon ko chhappron mein hi rehna hoga,
43 taaki aanevali peedhiyaan jaanein+ ki jab main israeliyon ko misra se baahar nikaalkar laa raha tha to mainne unke liye chhappron mein hi rehne ka intazam kiya tha.+ main tumhara parmeshvar yahova hoon.’”
44 moosa ne israeliyon ko yahova ke un tyoharon ke baare mein bataya, jo saal ke alag-alag vakt par manaye jaate.
kai footnote
^ shaa., “do shaamon ke beech.”
^ ek heen 3.67 l. ke barbar tha. ati. kha14 dekhein.
^ epa ka do-dahai bhaag 4.4 l. ke barbar tha. ati. kha14 dekhein.
^ epa ka do-dahai bhaag 4.4 l. ke barbar tha. ati. kha14 dekhein.
^ ya “museebat ke maaron.”
^ ‘dukh zahir karne’ ka aam taur par yah matlab samjha jaata hai, khud ko kai cheezon se door rakhna aur ismein upvas karna shaamil hai.
^ ya shaayad, “upvas nahin karega.”
