laivyavyavastha 4:1-35
-
paap-bali (1-35)
4 yahova ne moosa se yah bhi kaha,
2 “israeliyon se kehna, ‘agar tummein se koi anjane mein aisa kaam karta hai jise na karne ki aagya yahova ne di hai,+ to us paap ke prayashchit ke liye use yah karna hoga:
3 agar abhishikt yaajak+ koi paap karta hai+ jisse israel ke sabhi log doshi ho jaate hain, to use chahiye ki woh prayashchit ke liye aise bail ki paap-bali yahova ko arpit kare jismein koi dosh na ho.+
4 woh bail ko bheint ke tamboo ke dvar par yahova ke saamne laayega+ aur uske sir par apna haath rakhega. fir woh bail ko yahova ke saamne halal karega.+
5 iske baad abhishikt yaajak+ bail ke khoon mein se thoda khoon lega aur use bheint ke tamboo ke andar le jaayega.
6 fir woh khoon mein apni ungli duboyega+ aur tamboo ke pavitra bhaag mein parde ke paas yahova ke saamne saat baar chhidkega.+
7 woh thoda-saa khoon sugandhit dhoop ki vedi ke singon par bhi lagayega,+ jo bheint ke tamboo mein yahova ke saamne rakhi hai. aur bail ka baaki khoon hom-bali ki vedi ke neeche undel dega+ jo bheint ke tamboo ke dvar par hai.
8 iske baad woh paap-bali ke bail ki saari charbi nikaalkar alag rakhega, woh charbi jo antadiyon ko dhake rehti hai aur jo antadiyon ke aas-paas hoti hai,
9 donon gurde aur unke oopar ki charbi yaani kamar ke paas ki charbi. woh gurdon ke saath-saath kaleje ke aas-paas ki charbi bhi nikaalkar alag rakhega.+
10 woh bail ki yah saari charbi vaise hi alag karega, jaise shaanti-bali ke bail ki charbi alag ki jaati hai.+ fir yaajak ye saari cheezen hom-bali ki vedi par jalayega taaki inka dhuaan uthe.
11 magar bail ki khaal, uska poora gosht, sir, paaye, antadiyaan aur gobar,+
12 yah sab chhaavni ke baahar ek saaf jagah par le jaana chahiye jahaan raakh* feinki jaati hai. vahaan par woh in saari cheezon ko jalti lakdiyon par rakhkar jala dega.+ yah sab raakh feinkne ki jagah par hi jala dena chahiye.
13 agar israel ke sabhi log anjane mein koi paap karke doshi ban jaate hain,+ magar mandli ko nahin maaloom ki unhonne aisa kaam kiya hai jise na karne ki aagya yahova ne di thi,+
14 to jab unka paap saamne aa jaata hai tab mandli ko chahiye ki woh paap-bali ke liye ek bail ko bheint ke tamboo ke saamne laaye.
15 mandli ke mukhiya yahova ke saamne bail ke sir par apne haath rakheinge aur use yahova ke saamne halal kiya jaayega.
16 iske baad abhishikt yaajak bail ka thoda khoon lekar bheint ke tamboo ke andar jaayega.
17 fir woh khoon mein apni ungli duboyega aur parde ke paas yahova ke saamne use saat baar chhidkega.+
18 iske baad yaajak thoda-saa khoon us vedi+ ke singon par lagayega, jo bheint ke tamboo mein yahova ke saamne rakhi hai. aur bail ka baaki khoon hom-bali ki vedi ke neeche undel dega jo bheint ke tamboo ke dvar par hai.+
19 woh bail ki saari charbi alag nikaalkar vedi par jalayega taaki uska dhuaan uthe.+
20 yaajak ko is bail ke saath theek vahi karna hai jo woh paap-bali ke pehale bail ke saath karta hai. is tarah woh logon ke paap ke liye prayashchit karega+ aur unhein maaf kiya jaayega.
21 bail ko chhaavni ke baahar le jaana chahiye. fir woh use vahaan pehale bail ki tarah jala dega.+ yah mandli ke liye di jaanevali paap-bali hai.+
22 agar koi pradhan+ anjane mein aisa kaam karta hai jise na karne ki aagya uske parmeshvar yahova ne di hai aur is tarah paap ka doshi banta hai,
23 ya agar use pata chalta hai ki usne parmeshvar ki aagya ke khilaf koi paap kiya hai, to use paap-bali ke liye bakri ka aisa bachcha laana hoga jo nar ho aur jismein koi dosh na ho.
24 woh bakri ke bachche ke sir par apna haath rakhega aur use yahova ke saamne us jagah halal karega jahaan hom-bali ka jaanvar halal kiya jaata hai.+ yah paap-bali hai.
25 fir yaajak apni ungli se paap-bali ke bakre ka thoda-saa khoon lega aur use hom-bali ki vedi ke singon par lagayega.+ aur baaki khoon hom-bali ki vedi ke neeche undel dega.+
26 fir woh bakre ki saari charbi vedi par jalayega taaki uska dhuaan uthe, theek jaise shaanti-bali ki charbi jalayi jaati hai.+ aur yaajak, pradhan ke paap ke liye prayashchit karega aur use maaf kar diya jaayega.
27 agar aam logon mein se koi anjane mein aisa kaam karta hai jise na karne ki aagya yahova ne di hai aur is tarah paap ka doshi banta hai,+
28 ya agar use pata chalta hai ki usne ek paap kiya hai, to use paap-bali ke liye bakri ka ek bachcha laana hoga, jo maada ho aur jismein koi dosh na ho.
29 woh paap-bali ke jaanvar ke sir par apna haath rakhega aur use us jagah halal karega jahaan hom-bali ka jaanvar halal kiya jaata hai.+
30 yaajak apni ungli se bakri ka thoda khoon lega aur use hom-bali ki vedi ke singon par lagayega aur baaki khoon vedi ke neeche undel dega.+
31 fir woh jaanvar ki saari charbi alag karega,+ theek jaise shaanti-bali ke jaanvar ki charbi alag ki jaati hai.+ aur yaajak us charbi ko vedi par jalayega taaki uska dhuaan uthe aur uski sugandh paakaar yahova khush ho. aur yaajak us aadmi ke liye prayashchit karega aur use maaf kiya jaayega.
32 lekin agar woh aadmi paap-bali ke liye memna dena chahta hai, to use aisa memna dena chahiye jo maada ho aur jismein koi dosh na ho.
33 woh apna haath paap-bali ke memne ke sir par rakhega aur use us jagah halal karega jahaan hom-bali ka jaanvar halal kiya jaata hai.+
34 fir yaajak apni ungli se paap-bali ke memne ka thoda khoon lega aur use hom-bali ki vedi ke singon par lagayega+ aur baaki khoon vedi ke neeche undel dega.
35 fir woh memne ki saari charbi alag karega, theek jaise shaanti-bali ke memne ki charbi alag ki jaati hai. aur yaajak vedi par yahova ke liye arpit bali ke oopar yah saari charbi rakhkar jalayega taaki iska dhuaan uthe.+ aur yaajak us aadmi ke paap ke liye prayashchit karega aur use maaf kiya jaayega.+
kai footnote
^ yaani balidan mein jalaye gaye jaanvaron ki pighli charbi se bheegi raakh.
