laivyavyavastha 6:1-30
6 yahova ne moosa se yah bhi kaha,
2 “agar kisi ne apne padosi ki amanat ya uski di hui cheez ke saath hera-feri ki hai+ ya uska koi saaman loota hai ya use thaga hai to yah paap hai. woh yahova ka vishvasyogya nahin raha.+
3 usi tarah, agar woh kisi ki khoyi hui cheez milne par uske baare mein jhooth bolta hai to yah paap hai. aur agar woh inmein se koi bhi paap karta hai aur jhoothi kasam khaakaar kehta hai ki mainne aisa nahin kiya,+
4 to bhi woh parmeshvar ke saamne paap ka doshi hoga. use apne padosi ki cheez lauta deni hogi, fir chahe usne woh cheez churayi ho ya zabardasti vasooli ho, chhal karke li ho ya woh cheez amanat ke taur par use rakhne ke liye di gayi ho ya kho jaane par use mili ho
5 ya usne jhoothi shapath khaakaar rakh li ho. usne chahe kisi bhi tarah se padosi ki cheez li ho, use poori bharpai karni hogi.+ saath hi, uski keemat ka paanchvaan hissa bhi dena hoga. use chahiye ki jis din uska dosh saabit ho jaata hai, usi din woh cheez uske maalik ko lauta de.
6 fir woh ek dosh-bali ka jaanvar yaajak ke paas laayega taaki use yahova ko arpit kiya jaaye. use jhund mein se aisa medha chunna hoga jismein koi dosh na ho aur jo batayi hui keemat ka ho.+
7 yaajak us aadmi ke liye yahova ke saamne prayashchit karega aur woh chahe kisi bhi paap ka doshi ho use maaf kiya jaayega.”+
8 yahova ne moosa se yah bhi kaha,
9 “haaroon aur uske beton ko yah aagya dena: ‘yah hom-bali ka niyam hai:+ hom-bali ke jaanvar ko vedi ki aag par poori raat yaani subah tak jalne diya jaaye. vedi par aag lagatar jalti rahe.
10 subah hone par yaajak malmal se bani, yaajak ki poshak+ aur malmal ka jaanghiya pehankar taiyar hoga.+ fir woh vedi ke paas aakaar hom-bali ki raakh* uthayega+ aur use vedi ke ek taraf rakhega.
11 iske baad yah poshak utaarkar+ woh doosre kapde pehnega aur raakh uthakar chhaavni ke baahar ek saaf jagah le jaayega.+
12 vedi par aag hamesha jalaye rakhni chahiye. yah aag kabhi nahin bujhni chahiye. yaajak ko chahiye ki woh har subah vedi par lakdiyaan jalaye+ aur uske oopar hom-bali ke jaanvar ke tukde tarteeb se rakhe. woh uske oopar shaanti-bali ke jaanvaron ki charbi rakhkar jalayega taaki uska dhuaan uthe.+
13 vedi par aag lagatar jalaye rakhni chahiye. yah aag kabhi nahin bujhni chahiye.
14 yah anaj ke chadhave ka niyam hai:+ haaroon ke beto, tumhein yah chadhava yahova ke saamne vedi ke paas laana chahiye.
15 fir tummein se ek yaajak anaj ke chadhave mein se mutthi-bhar maida, thoda-saa tel aur chadhave ke oopar rakha saara loban lega aur use vedi par yahova ke liye prateek* ke taur par jalayega taaki uska dhuaan uthe aur uski sugandh paakaar woh khush ho.+
16 uska bacha hua hissa haaroon aur uske bete khaayenge.+ woh isse bin-khameer ki rotiyaan banakar pavitra jagah par khaayenge. woh inhein bheint ke tamboo ke aangan mein khaayenge.+
17 rotiyaan banate vakt unmein zara bhi khameer nahin milana chahiye.+ mujhe jo chadhava aag mein jalakar diya jaata hai, usmein se yah hissa main unhein deta hoon.+ unka yah hissa paap-bali aur dosh-bali ki tarah bahot pavitra hai.+
18 haaroon ke beton mein se har aadmi ye rotiyaan khaayega.+ yahova ke liye aag mein jalakar chadhayi jaanevali bali mein se yah haaroon ke parivar ko diya jaanevala hissa hai. unhein yah hissa peedhi-dar-peedhi sada diya jaayega.+ har woh cheez jo unse* chhoo jaaye pavitra ho jaayegi.’”
19 fir yahova ne moosa se kaha,
20 “jis din haaroon ka abhishek kiya jaayega,+ us din haaroon aur uske bete yahova ke liye epa ka dasvaan bhaag*+ maida chadhayenge, aadha maida subah aur aadha shaam ko. aage jab bhi haaroon ke kisi bete ka abhishek kiya jaayega tab yahi chadhava chadhaya jaayega.+
21 anaj ka yah chadhava taiyar karne ke liye maida tel se goondha jaaye aur tave par seinkkar pakaya jaaye.+ fir uske tukde-tukde kiye jaayen aur unmein achhi tarah tel milakar yahova ke saamne laaya jaaye taaki uski sugandh paakaar woh khush ho.
22 haaroon ke baad uske beton mein se jo uski jagah yaajak banega+ aur jiska abhishek kiya jaayega use yah chadhava chadhana hoga. yah niyam tumhein hamesha ke liye diya jaata hai ki anaj ka yah chadhava poora-ka-poora yahova ke liye jalaya jaaye taaki iska dhuaan uthe.
23 yaajak jab bhi anaj ka chadhava dega to use poora-ka-poora chadhava jala dena chahiye. is chadhave ko khaana mana hai.”
24 fir yahova ne moosa se kaha,
25 “haaroon aur uske beton se kehna, ‘yah paap-bali ka niyam hai:+ paap-bali ka jaanvar yahova ke saamne usi jagah halal kiya jaaye jahaan hom-bali ka jaanvar halal kiya jaata hai.+ yah bali bahot pavitra hai.
26 jo yaajak paap ke prayashchit ke liye yah bali chadhata hai woh ise khaayega.+ woh ise pavitra jagah par yaani bheint ke tamboo ke aangan mein khaayega.+
27 har woh cheez jo bali ke jaanvar ke gosht ko chhoo jaaye pavitra ho jaayegi. agar kisi ki poshak par is jaanvar ke khoon ke chhinte pad jaate hain to use pavitra jagah mein hi apni poshak dhokar saaf karni chahiye.
28 agar iska gosht mitti ke bartan mein ubaala gaya ho, to woh bartan baad mein choor-choor kar diya jaaye. lekin agar yah tambe ke bartan mein ubaala jaata hai to use ragad-ragadkar saaf karna chahiye aur paani se achhi tarah dhona chahiye.
29 is bali ka gosht sirf yaajak khaa sakte hain.+ yah bahot pavitra hai.+
30 lekin jis paap-bali ke jaanvar ka thoda-saa khoon bheint ke tamboo ke andar le jaaya jaata hai taaki pavitra-sthan mein prayashchit kiya jaaye, uska gosht hargiz nahin khaana chahiye.+ use aag mein jalakar bhasm kar dena chahiye.
kai footnote
^ yaani balidan mein jalaye gaye jaanvaron ki pighli charbi se bheegi raakh.
^ ya “yaadgar.”
^ ya “chadhavon se.”
^ epa ka dasvaan bhaag 2.2 l. ke barbar tha. ati. kha14 dekhein.
