laivyavyavastha 8:1-36
-
haaroon aur uske beton ko yaajakpad saunpa gaya (1-36)
8 yahova ne moosa se yah bhi kaha,
2 “tu haaroon aur uske beton ko le aana+ aur unke liye banayi gayi poshakein+ aur abhishek ka tel,+ paap-bali ka bail, do medhe aur bin-khameer ki rotiyon se bhari tokri bhi saath lena.+
3 aur logon ki poori mandli ko bheint ke tamboo ke dvar par ikattha karna.”
4 moosa ne theek vaise hi kiya jaise yahova ne use aagya di thi. aur poori mandli bheint ke tamboo ke dvar par ikattha ho gayi.
5 moosa ne mandli se kaha, “yahova ne hamein ye-ye karne ki aagya di hai.”
6 iske baad moosa ne haaroon aur uske beton ko paas laakaar unhein nahane ki aagya di.+
7 fir moosa ne haaroon ko uska kurta pehnaya+ aur us par kamar-patti baandhi.+ iske baad use bin aasteen ka baaga+ aur uske oopar epod pehnaya+ aur epod ko bune huye kamarband se kaskar baandh diya.+
8 fir usne haaroon par seenaband baandha+ aur uske andar ooreem aur tummeem rakhe.+
9 iske baad usne haaroon ke sir par pagdi rakhi+ aur pagdi ke saamne sone ki chamchamati patti baandhi jo samarpan ki pavitra nishani hai.*+ moosa ne yah sab theek vaise hi kiya jaise yahova ne use aagya di thi.
10 fir moosa ne abhishek ka tel liya aur pavitra dere aur uske saare saajo-saaman ka abhishek karke+ unhein pavitra thehraya.
11 fir usne abhishek ka thoda-saa tel lekar vedi par saat baar chhidka aur vedi aur uske saath istemal honevali saari cheezon ka aur haud aur uski tek ka abhishek karke unhein pavitra thehraya.
12 aakhir mein usne abhishek ka thoda-saa tel liya aur haaroon ke sir par undelkar uska abhishek kiya taaki use pavitra thehraye.+
13 iske baad moosa haaroon ke beton ko paas le aaya aur unhein kurte pehnaye aur kamar-patti baandhi aur sir par saafa baandha,+ theek jaise yahova ne use aagya di thi.
14 fir woh paap-bali ka bail le aaya. haaroon aur uske beton ne paap-bali ke bail ke sir par apne haath rakhe.+
15 moosa ne bail halal kiya aur apni ungli se uska khoon liya+ aur use vedi ke singon par lagaya. is tarah usne vedi se paap door karke use shuddh kiya aur bail ka baaki khoon vedi ke neeche undel diya. is tarah usne vedi ke liye prayashchit kiya aur use pavitra thehraya.
16 iske baad usne bail ki woh saari charbi li jo antadiyon ko dhake rehti hai aur jo kaleje ke aas-paas hoti hai, saath hi donon gurde aur unki charbi bhi li. moosa ne woh saari cheezen vedi par rakhkar jalayin jisse unka dhuaan utha.+
17 bail ke baaki hisse, uski khaal, uska gosht aur gobar, yah sab chhaavni ke baahar le jaakaar jala diya gaya.+ sabkuch theek vaise hi kiya gaya jaise yahova ne moosa ko aagya di thi.
18 iske baad woh hom-bali ka medha paas le aaya. haaroon aur uske beton ne medhe ke sir par apne haath rakhe.+
19 fir moosa ne woh medha halal kiya aur uska khoon vedi ke chaaron taraf chhidka.
20 usne medhe ko kaatkar uske tukde-tukde kiye aur medhe ka sir, uske tukde aur uski charbi* jalayi jisse unka dhuaan utha.
21 usne medhe ki antadiyon aur paayon ko paani se dhokar saaf kiya aur poore medhe ko vedi par rakhkar jalaya jisse uska dhuaan utha. yah hom-bali thi jiski sugandh paakaar parmeshvar khush hua. yah aag mein jalakar yahova ko diya gaya chadhava tha, theek jaise yahova ne moosa ko aagya di thi.
22 iske baad woh doosre medhe ko laaya jo yaajakpad saunpne ke mauke par diya jaanevala medha tha.+ haaroon aur uske beton ne medhe ke sir par apne haath rakhe.+
23 moosa ne medha halal kiya aur uska thoda-saa khoon lekar haaroon ke daayen kaan ke nichle sire par, daayen haath ke angoothe par aur daayen pair ke angoothe par lagaya.
24 fir woh haaroon ke beton ko saamne laaya aur medhe ka thoda-saa khoon unke daayen kaan ke nichle sire par, daayen haath ke angoothe par aur daayen pair ke angoothe par lagaya. moosa ne baaki khoon vedi ke chaaron taraf chhidka.+
25 fir usne medhe ki charbi, uski charbivali moti poonchh aur woh saari charbi li jo antadiyon ko dhake rehti hai aur jo kaleje ke aas-paas hoti hai aur donon gurde aur unki charbi aur daayaan pair bhi liya.+
26 saath hi, usne yahova ke saamne rakhi bin-khameer ki rotiyon ki tokri mein se bin-khameer ki chhalle jaisi ek roti,+ tel se goondhkar banayi gayi chhalle jaisi ek roti+ aur ek paapdi li. usne ye rotiyaan medhe ki charbi aur uske daayen pair ke oopar rakhin.
27 iske baad usne ye saari cheezen haaroon aur uske beton ki hatheliyon par rakhin aur ye cheezen yahova ke saamne aage-peechhe hilayin. yah hilakar diya gaya chadhava tha.
28 fir moosa ne unke haath se ye saari cheezen lin aur vedi par hom-bali ke oopar rakhkar jalayin jisse inka dhuaan utha. yah yaajakpad saunpne ke mauke par di gayi bali thi jiski sugandh paakaar parmeshvar khush hua. yah aag mein jalakar yahova ko diya gaya chadhava tha.
29 fir moosa ne medhe ka seena liya aur use yahova ke saamne aage-peechhe hilaya. yah hilakar diya gaya chadhava tha.+ yaajakpad saunpne ke mauke par bali kiye gaye medhe ka yah hissa moosa ko diya gaya, theek jaise yahova ne use aagya di thi.+
30 moosa ne thoda-saa abhishek ka tel+ aur vedi se thoda khoon liya aur use haaroon aur uski poshak par aur uske beton aur unki poshakon par chhidka. is tarah usne haaroon aur uske beton ko aur unki poshakon ko pavitra thehraya.+
31 fir moosa ne haaroon aur uske beton se kaha, “tum medhe ka gosht bheint ke tamboo ke dvar par ubaalna.+ fir tum sab vahin dvar par woh gosht aur woh rotiyaan khaana jo yaajakpad saunpne ke mauke ke liye rakhi tokri mein hain. mujhe aagya di gayi hai ki haaroon aur uske bete yah sab khaayenge.+
32 jo gosht aur rotiyaan bach jaati hain unhein tum aag mein jala dena.+
33 tum saat din tak bheint ke tamboo ke dvar se baahar mat jaana, jab tak ki tumhein yaajakpad saunpne ke din poore nahin ho jaate kyonki tumhein yaajakpad saunpne* mein poore saat din lageinge.+
34 aaj hamne jo-jo kiya woh sab karne ki aagya yahova ne di thi taaki tum sabka prayashchit kiya jaaye.+
35 saat din tak tum sab raat-din bheint ke tamboo ke dvar par hi rehna+ aur yahova ne jo-jo hidayat di hai uska paalan karke apna farz nibhana,+ varna tum maar daale jaaoge. parmeshvar ne mujhe yahi aagya di hai.”
36 haaroon aur uske beton ne woh sab kiya jo yahova ne moosa ke zariye aagya di thi.
kai footnote
^ ya “jo pavitra taaj hai.”
^ ya “gurdon ke aas-paas ki charbi.”
^ shaa., “tumhare haath bharne.”
