laivyavyavastha 9:1-24
-
yaajakpad saunpne ke mauke par haaroon ne chadhava arpit kiya (1-24)
9 aathvein din+ moosa ne haaroon aur uske beton aur israel ke mukhiyaon ko bulaya.
2 usne haaroon se kaha, “tu apni paap-bali ke liye ek bachhda+ aur hom-bali ke liye ek medha le aur unhein yahova ko arpit kar. ye aise jaanvar hone chahiye jinmein koi dosh na ho.
3 magar tu israeliyon se kehna, ‘tum paap-bali ke liye ek bakra, hom-bali ke liye ek saal ka bachhda aur ek saal ka nar memna laana, jinmein koi dosh na ho
4 aur shaanti-bali ke liye ek bail aur ek medha laana+ aur tel mila hua anaj ka chadhava bhi laana.+ yahova ke saamne in saare jaanvaron ki bali dena aur tel mila hua anaj ka chadhava chadhana kyonki aaj ke din yahova tumhare saamne prakat hoga.’”+
5 fir woh bheint ke tamboo ke saamne woh sab le aaye jiski aagya moosa ne unhein di thi. fir israeliyon ki poori mandli aage aayi aur yahova ke saamne khadi hui.
6 moosa ne unse kaha, “yahova ne yah karne ki aagya di hai taaki yahova ki mahima tum logon ko dikhayi de.”+
7 fir moosa ne haaroon se kaha, “tu vedi ke paas jaa aur apni paap-bali+ aur hom-bali chadha aur apne aur apne gharane ke liye prayashchit kar.+ aur logon ki di hui bali bhi chadha+ aur unke liye prayashchit kar,+ theek jaise yahova ne aagya di hai.”
8 haaroon fauran vedi ke paas gaya aur usne paap-bali ka woh bachhda halal kiya jo uske paap ke prayashchit ke liye tha.+
9 fir haaroon ke beton ne bachhde ka khoon use diya+ aur usne khoon mein apni ungli duboyi aur use vedi ke singon par lagaya aur baaki khoon usne vedi ke neeche undel diya.+
10 usne paap-bali ke bachhde ki charbi, gurde aur kaleje ke aas-paas ki charbi vedi par rakhkar jalayi jisse uska dhuaan utha. usne yah theek vaise hi kiya jaise yahova ne moosa ko aagya di thi.+
11 usne bachhde ka gosht aur uski khaal chhaavni ke baahar le jaakaar aag mein jala di.+
12 iske baad usne hom-bali ka jaanvar halal kiya. fir haaroon ke beton ne jaanvar ka khoon use diya aur usne woh khoon vedi ke chaaron taraf chhidka.+
13 fir unhonne use hom-bali ke jaanvar ka sir aur uske tukde diye aur usne ye cheezen vedi par rakhkar jalayin jisse dhuaan utha.
14 iske baad usne antadiyon aur paayon ko dhokar saaf kiya aur unhein vedi par hom-bali ke oopar rakhkar jalaya jisse dhuaan utha.
15 iske baad usne logon ka diya chadhava arpit kiya. usne paap-bali ka woh bakra liya jo logon ke paapon ke liye tha. usne bakra halal kiya aur pehale jaanvar ki tarah uski paap-bali chadhayi.
16 iske baad usne hom-bali usi tarah arpit ki jaise niyamit taur par hom-baliyaan arpit ki jaati hain.+
17 fir usne anaj ka chadhava arpit kiya.+ usne is chadhave mein se mutthi-bhar cheezen lin aur unhein vedi par rakhkar jalaya jisse dhuaan utha. yah subah ki hom-bali ke alava diya gaya chadhava tha.+
18 iske baad usne shaanti-bali ka woh bail aur medha halal kiya jo logon ke liye tha. fir haaroon ke beton ne un jaanvaron ka khoon use diya aur usne woh khoon vedi ke chaaron taraf chhidka.+
19 fir unhonne bail ki charbi,+ medhe ki charbivali moti poonchh, gurde, kaleje ki charbi aur woh charbi li jo androoni angon ko dhake rehti hai+
20 aur yah saari charbi unhonne bail aur medhe ke seene par rakhi. iske baad usne woh saari charbi li aur vedi par rakhkar jalayi jisse uska dhuaan utha.+
21 fir haaroon ne bali ke donon jaanvaron ka seena aur daayaan pair lekar yahova ke saamne aage-peechhe hilaya, theek jaise moosa ne aagya di thi. yah hilakar diya jaanevala chadhava tha.+
22 fir haaroon ne logon ki taraf apne haath uthaye aur unhein aasheervad diya.+ aur woh paap-bali, hom-bali aur shaanti-baliyaan arpit karne ke baad neeche utra.
23 aakhir mein moosa aur haaroon, bheint ke tamboo ke andar gaye aur fir baahar aane ke baad unhonne logon ko aasheervad diya.+
ab yahova ki mahima sab logon ko dikhayi di.+
24 fir yahova ki taraf se vedi par aag barsi+ aur us par rakhi hom-bali aur charbi ko bhasm karne lagi. jab sab logon ne yah dekha to woh khushi se jayjaykar karne lage aur unhonne munh ke bal zameen par girkar dandvat kiya.+
