luka ke mutabik khushkhabri 13:1-35
-
pashchatap karo varna naash ho jaaoge (1-5)
-
anjeer ke baanjh ped ki misal (6-9)
-
sabt ke din kubdi aurat ko changa kiya (10-17)
-
raai ke daane aur khameer ki misal (18-21)
-
sankre darvaze se jaane ke liye sangharsh zaroori (22-30)
-
“us lomdi” herodes se (31-33)
-
yarooshalem ke liye yeeshu ka dukh (34, 35)
13 usi dauran, vahaan maujood kuch logon ne yeeshu ko bataya ki jab galeel ke kuch log mandir mein balidan chadha rahe the, to kaise peelatus ne unhein marva daala tha.
2 tab usne unse kaha, “kya tumhein lagta hai ki ye galeeli baaki sabhi galeeliyon se zyada paapi the kyonki unke saath aisa hua tha?
3 main tumse kehta hoon, nahin! agar tum pashchatap nahin karoge, to tum sab isi tarah naash ho jaaoge.+
4 kya tumhein lagta hai ki woh 18 log jin par silom ki meenar gir gayi thi aur jo uske neeche dabkar mar gaye the, yarooshalem ke baaki sabhi logon se zyada paapi the?
5 main tumse kehta hoon, nahin! agar tum pashchatap nahin karoge, to tum sab isi tarah naash ho jaaoge.”
6 iske baad usne yah misal di, “ek aadmi tha jiske angooron ke baag mein ek anjeer ka ped laga tha. woh us ped mein fal dhoondhne aaya, magar use ek bhi fal nahin mila.+
7 tab usne baag ke maali se kaha, ‘pichhle teen saal se main is ped ke paas yah ummeed lekar aa raha hoon ki mujhe fal milein, lekin aaj tak mujhe ek bhi fal nahin mila. is ped ko kaat daal! yah bekar mein zameen ko kyon ghere khada hai?’
8 maali ne usse kaha, ‘maalik, ek aur saal ise rehne de taaki main iske chaaron taraf khudai karke ismein khaad daaloon.
9 aur agar yah bhavishya mein fal de, to achhi baat hai. lekin agar nahin, to tu ise katva dena.’”+
10 sabt ke din yeeshu ek sabha-ghar mein sikha raha tha.
11 vahaan ek aurat thi jismein 18 saal se ek dusht swargdoot samaya tha, jisne use bahot kamzor* kar diya tha. woh kubdi ho gayi thi aur bilkul seedhi nahin ho paati thi.
12 jab yeeshu ne us aurat ko dekha, to usse kaha, “jaa, tujhe apni kamzori se chhutkara diya jaa raha hai.”+
13 yeeshu ne apne haath us aurat par rakhe aur woh fauran seedhi ho gayi aur parmeshvar ki mahima karne lagi.
14 magar jab sabha-ghar ke adhikari ne dekha ki yeeshu ne sabt ke din changa kiya hai, to woh bhadak utha aur logon se kaha, “chche din hote hain jinmein kaam kiya jaana chahiye.+ isliye unhin dinon mein aakaar change ho, sabt ke din nahin.”+
15 lekin prabhu ne usse kaha, “are kaptiyo,+ kya tummein se har koi sabt ke din apne bail ya gadhe ko thaan se kholkar paani pilane nahin le jaata?+
16 to kya yah aurat, jo abraham ki beti hai aur jise shaitan ne 18 saal tak apne kabze mein kar rakha tha, ise sabt ke din uski kaid se aazad karna sahi nahin tha?”
17 jab yeeshu ne ye baatein kahin, to uske sabhi virodhi sharminda ho gaye. magar bheed uske sabhi shaandar kaamon ko dekhkar khushiyaan manane lagi.+
18 isliye usne yah bhi kaha, “parmeshvar ka raaj kiske jaisa hai? main iski tulna kisse karoon?
19 yah raai ke daane ki tarah hai, jise ek aadmi ne lekar apne baag mein bo diya aur woh ugkar ped ban gaya aur aakash ke panchhiyon ne uski daaliyon par aakaar basera kiya.”+
20 ek baar fir usne kaha, “main parmeshvar ke raaj ki tulna kisse karoon?
21 yah khameer ki tarah hai, jise lekar ek aurat ne kareeb das kilo* aate mein goondh diya aur saara aata khameera ho gaya.”+
22 fir yeeshu shehar-shehar aur gaanv-gaanv jaakaar sikhata raha aur usne yarooshalem ki taraf apna safar jaari rakha.
23 tab ek aadmi ne usse poochha, “prabhu, jo uddhaar paayenge kya woh thode hain?” yeeshu ne unse kaha,
24 “sankre darvaze se andar jaane ke liye ji-tod sangharsh karo,+ kyonki main tumse kehta hoon ki bahot log andar jaana chaheinge, magar nahin jaa paayenge.
25 jab ghar ka maalik uthkar darvaza band kar dega, to tum baahar khade hokar khatkhataoge aur kahoge, ‘prabhu, hamare liye darvaza khol.’+ tab woh kahega, ‘main nahin jaanta ki tum kahaan se aaye ho.’
26 tab tum kahoge, ‘hamne tere saath baithkar khaaya-peeya aur tu hamare yahaan sadak ke chaurahon mein sikhaya karta tha.’+
27 magar woh tumse kahega, ‘main nahin jaanta ki tum kahaan se aaye ho. are dusht kaam karnevalo, door ho jaao mere saamne se!’
28 jab tum dekhoge ki abraham, ishaak, yakub aur sabhi bhavishyavakta parmeshvar ke raaj mein hain aur tumhein baahar feink diya gaya hai, to vahaan tum rooge aur daant peesoge.+
29 itna hi nahin, log poorab, pashchim, uttar aur dakshin se aayenge aur parmeshvar ke raaj mein mez se tek lagakar baitheinge.
30 dekho! kuch log jo aakhiri hain woh pehale honge aur kuch jo pehale hain woh aakhiri honge.”+
31 usi vakt kuch fareesi aaye aur yeeshu se kehne lage, “yahaan se nikaal jaa kyonki herodes tujhe maar daalna chahta hai.”
32 lekin usne unse kaha, “jaao jaakaar kaho us lomdi se, ‘dekh! main aaj aur kal bhi dusht swargdooton ko nikaaloonga aur logon ko changa karoonga aur teesre din mera kaam poora hoga.’
33 magar chahe jo bhi ho, mujhe aaj, kal aur parson bhi apna kaam karna hai, kyonki yah ho nahin sakta ki ek bhavishyavakta yarooshalem ke baahar maara jaaye.+
34 yarooshalem, yarooshalem, tu jo bhavishyavaktaon ka khoon karnevali nagri hai aur jo tere paas bheje jaate hain unhein pattharon se maar daalti hai+—mainne kitni baar chaha ki jaise murgi apne choozon ko apne pankhon tale ikattha karti hai, vaise hi main bhi tere bachchon ko ikattha karoon! magar tum logon ne yah nahin chaha!+
35 dekho! parmeshvar ne tumhare ghar* ko tyag diya hai.+ main tumse kehta hoon ki tum mujhe tab tak nahin dekhoge jab tak ki yah na kaho, ‘dhanya hai woh jo yahova* ke naam se aata hai!’”+