luka ke mutabik khushkhabri 18:1-43
18 fir yeeshu ne unhein yah samjhane ke liye ek misal di ki unhein kyon hamesha prarthna karte rehna chahiye aur kabhi himmat nahin haarni chahiye.+
2 usne kaha, “kisi shehar mein ek nyayi tha jo na to parmeshvar se darta tha, na hi kisi insan ki izzat karta tha.
3 us shehar mein ek vidhva thi jo baar-baar uske paas jaakaar kehti rahi, ‘kisi bhi haal mein mujhe insaf dila! mujhse mukadma ladnevale se mujhe bacha.’
4 bahot samay tak to woh nahin maana, magar baad mein woh apne dil mein kehne laga, ‘na to main parmeshvar se darta hoon, na hi kisi insan ki izzat karta hoon,
5 fir bhi main is vidhva ko zaroor insaf dilaunga kyonki isne mujhe pareshan kar rakha hai. agar mainne iske liye kuch nahin kiya, to yah baar-baar aakaar mera jeena dushvar kar degi.’”+
6 fir prabhu ne kaha, “dhyan do ki us nyayi ne bura insan hone ke baavjood kya kaha!
7 to kya parmeshvar apne chune huon ki khaatir insaf nahin karega, jo din-raat usse fariyad karte hain?+ bhale hi parmeshvar unke maamle mein sabraa se kaam leta hai, magar woh unki zaroor sunega.+
8 main tumse kehta hoon, woh jald-se-jald unhein insaf dilayega. fir bhi jab insan ka beta aayega, tab kya woh dharti par aisa vishvas* paayega?”
9 fir usne un logon ko ek misal di jinhein apni neki par bada bharosa tha aur jo doosron ko kuch nahin samajhte the. usne kaha,
10 “do aadmi mandir mein prarthna karne gaye. ek fareesi tha aur doosra kar-vasoolnevala.
11 fareesi khada hokar man-hi-man prarthna karne laga, ‘hey parmeshvar, main tera dhanyavad karta hoon ki main doosron ki tarah nahin hoon jo lutere, beiman aur vyabhichari* hain, na hi is kar-vasoolnevale jaisa hoon.
12 main hafte mein do baar upvas karta hoon aur mujhe jo kuch milta hai, uska dasvaan hissa deta hoon.’+
13 magar kar-vasoolnevala door khada tha. use aakash ki taraf nazar uthane ki himmat bhi nahin hui, balki woh chhaati peette huye kehta raha, ‘hey parmeshvar, mujh paapi par daya* kar.’+
14 main tumse kehta hoon, yah aadmi us fareesi se zyada nek saabit hokar apne ghar gaya.+ kyonki har koi jo khud ko uncha karta hai use neecha kiya jaayega, magar jo koi khud ko chhota banata hai use bada kiya jaayega.”+
15 fir log apne nanhe-munnon ko bhi uske paas laane lage ki woh un par haath rakhe, magar yah dekhkar chele unhein daantne lage.+
16 magar yeeshu ne nanhe-munnon ko apne paas bulaya aur kaha, “bachchon ko mere paas aane do, unhein rokne ki koshish mat karo, kyonki parmeshvar ka raaj aison hi ka hai.+
17 main tumse sach kehta hoon, jo koi parmeshvar ke raaj ko ek chhote bachche ki tarah sweekar nahin karta, woh usmein hargiz nahin jaa paayega.”+
18 kisi adhikari ne usse poochha, “achhe guru, hamesha ki zindagi ka vaaris banne ke liye mujhe kya karna chahiye?”+
19 yeeshu ne usse kaha, “tu mujhe achha kyon kehta hai? koi achha nahin hai, siva parmeshvar ke.+
20 tu to aagyayen jaanta hai, ‘vyabhichar* na karna,+ khoon na karna,+ chori na karna,+ jhoothi gavahi na dena,+ apne pita aur apni maa ka aadar karna.’”+
21 tab usne kaha, “ye saari baatein to main bachpan se maan raha hoon.”
22 yah sunkar yeeshu ne usse kaha, “tujhmein ab bhi ek cheez ki kami hai: jaa aur jo kuch tere paas hai sab bechkar kangalon mein baant de aur tujhe swarg mein khazana milega aur aakaar mera chela ban jaa.”+
23 jab usne yah suna, to woh bahot dukhi hua kyonki woh bahot ameer tha.+
24 yeeshu ne uski taraf dekhkar kaha, “paisevalon ke liye parmeshvar ke raaj mein daakhil hona kitna mushkil hoga!+
25 darasal, parmeshvar ke raaj mein ek ameer aadmi ke daakhil hone se, ek unt ka silai ki sui ke chhed se nikaal jaana zyada aasan hai.”+
26 jinhonne yah suna, unhonne kaha, “to bhala kaun uddhaar paa sakta hai?”+
27 usne kaha, “jo kaam insanon ke liye naamumkin hain, woh parmeshvar ke liye mumkin hain.”+
28 magar patras ne kaha, “dekh! hum to apna sabkuch chhodkar tere peechhe chal rahe hain.”+
29 usne unse kaha, “main tumse sach kehta hoon, aisa koi nahin jisne parmeshvar ke raaj ki khaatir ghar ya patni ya bhaaiyon ya maa-baap ya bachchon ko chhoda ho+
30 aur is zamane mein in sabka kai guna na paaye aur aanevale zamane* mein hamesha ki zindagi na paaye.”+
31 fir yeeshu un baarahon ko alag le gaya aur unse kaha, “dekho! hum yarooshalem jaa rahe hain. aur insan ke bete ke baare mein bhavishyavaktaon ne jo-jo likha, woh sab poora hoga.+
32 jaise, use gair-yahoodiyon ke havale kiya jaayega,+ uska mazak udaya jaayega,+ uske saath bura salook kiya jaayega aur us par thooka jaayega.+
33 woh use kode lagayenge aur maar daaleinge+ magar teesre din woh zinda ho jaayega.”+
34 lekin chele inmein se kisi bhi baat ke maayne nahin samajh paaye, kyonki ye baatein unse chhipakar rakhi gayi thi aur woh in baaton ko nahin samajh paaye.
35 jab woh yareeho pahunchnevala tha, to sadak ke kinare ek andha baithkar bheekh maang raha tha.+
36 jab us andhe ne vahaan se guzartee bheed ka shor suna, to poochhne laga ki yah kya ho raha hai.
37 logon ne use bataya, “yeeshu naasri yahaan se jaa raha hai!”
38 yah sunkar usne zor se pukara, “hey yeeshu, daavid ke vanshaj, mujh par daya kar!”
39 jo aage-aage jaa rahe the woh use daantne lage ki chup ho jaa! magar woh aur zor se chillata raha, “hey daavid ke vanshaj, mujh par daya kar!”
40 tab yeeshu ruk gaya aur usne hukm diya ki us aadmi ko uske paas laaya jaaye. jab woh aaya to yeeshu ne poochha,
41 “tu kya chahta hai, main tere liye kya karoon?” usne kaha, “prabhu, meri aankhon ki raushni laut aaye.”
42 isliye yeeshu ne usse kaha, “teri aankhein theek ho jaayen. tere vishvas ne tujhe theek kiya hai.”+
43 usi pal uski aankhon ki raushni laut aayi aur woh parmeshvar ki mahima karta hua uske peechhe chal diya.+ dekhnevale sab logon ne bhi parmeshvar ki taareef ki.+
