luka ke mutabik khushkhabri 20:1-47
20 un dinon jab woh logon ko mandir mein sikha raha tha aur khushkhabri suna raha tha, to ek baar pradhan yaajak aur shaastri, mukhiyaon ke saath uske paas aaye.
2 woh usse poochhne lage, “bata, tu ye sab kis adhikar se karta hai? kisne tujhe yah adhikar diya hai?”+
3 usne kaha, “main bhi tumse ek saval poochhta hoon. tum mujhe uska javab do.
4 jo baptisma yuhanna ne diya, woh swarg ki taraf se tha ya insanon ki taraf se?”
5 tab woh ek-doosre se kehne lage, “agar hum kahein, ‘swarg ki taraf se,’ to woh kahega, ‘fir kyon tumne uska yakeen nahin kiya?’
6 lekin agar hum kahein, ‘insanon ki taraf se,’ to sab log hamein pattharon se maar daaleinge isliye ki unhein poora yakeen hai ki yuhanna ek bhavishyavakta tha.”+
7 isliye unhonne kaha ki hum nahin jaante ki kiski taraf se tha.
8 tab yeeshu ne unse kaha, “to main bhi tumhein nahin bataunga ki main kis adhikar se yah sab karta hoon.”
9 fir woh logon ko yah misal dene laga: “ek aadmi ne angooron ka baag lagaya+ aur use baagbanon ko theke par dekar lambe samay ke liye pardes chala gaya.+
10 katai ka mausam aane par usne ek daas ko baagbanon ke paas bheja taaki woh angooron ki fasal mein se uska hissa use dein. magar baagbanon ne us daas ko peeta aur khaali haath bhej diya.+
11 fir usne ek aur daas ko unke paas bheja. unhonne use bhi peeta, beizzat kiya aur khaali haath bhej diya.
12 fir bhi usne teesre ko bheja. unhonne use bhi ghaayal karke bhaga diya.
13 tab baag ke maalik ne kaha, ‘ab main kya karoon? main apne pyare bete ko bhejta hoon,+ ho sakta hai woh uski izzat karein.’
14 jaise hi baagbanon ne uske bete ko dekha, woh aapas mein kehne lage, ‘yah to vaaris hai. chalo ise maar daalein, tab iski virasat hamari ho jaayegi.’
15 unhonne use baag ke baahar le jaakaar maar daala.+ ab baag ka maalik unke saath kya karega?
16 woh aakaar un baagbanon ko maar daalega aur angooron ka baag doosron ko theke par de dega.”
yah sunkar unhonne kaha, “aisa kabhi na ho!”
17 magar usne seedhe unki taraf dekhkar kaha, “fir yah jo baat likhi hai iska kya matlab hai, ‘jis patthar ko raajmistriyon ne thukra diya, vahi kone ka mukhya patthar ban gaya hai’?+
18 jo koi us patthar par girega woh tukde-tukde ho jaayega.+ aur jis kisi par yah patthar girega, use yah choor-choor kar dega.”
19 tab shaastriyon aur pradhan yaajkon ne use usi vakt pakadna chaha, kyonki woh samajh gaye the ki usne yah misal unhin ko dhyan mein rakhkar di hai. magar woh logon se darte the.+
20 woh us par kadi nazar rakhe huye the. unhonne chupke se kuch logon ko paison se khareed liya ki woh uske saamne nek hone ka dhong karein aur uski baaton mein use pakad sakein+ taaki use sarkar aur raajyapal* ke havale kar dein.
21 unhonne usse kaha, “guru, hum jaante hain ki tu sahi-sahi bolta aur sikhata hai aur koi bhedbhav nahin karta, balki tu sachchai ke mutabik parmeshvar ki raah sikhata hai.
22 hamein bata ki samrat* ko kar dena sahi hai ya nahin?”
23 magar usne unki chaalaaki bhaanp li aur unse kaha,
24 “mujhe ek deenar* dikhao. is par kiski soorat aur kiske naam ki chhaap hai?” unhonne kaha, “samrat ki.”
25 usne kaha, “to fir jo samrat ka hai woh samrat ko chukao,+ magar jo parmeshvar ka hai woh parmeshvar ko.”+
26 woh logon ke saamne uski baaton mein use pakad nahin sake, ulta uske javab se hairan reh gaye aur ek shabd bhi nahin bol paaye.
27 magar sadooki, jo kehte hain ki mare huon ke fir se zinda hone ki shiksha sach nahin hai,+ unmein se kuch log uske paas aaye aur usse saval karne lage,+
28 “guru, moosa ne hamare liye likha hai, ‘agar koi aadmi beaulad mar jaaye aur apni patni chhod jaaye, to uske bhaai ko chahiye ki woh apne mare huye bhaai ki patni se shaadi kar le aur apne bhaai ke liye aulad paida kare.’+
29 saat bhaai the. pehale ne shaadi ki magar beaulad mar gaya.
30 fir doosre ne usi aurat se shaadi ki magar woh bhi beaulad mar gaya.
31 fir teesre ne usse shaadi ki. is tarah saaton bhaaiyon ne ek-ek karke us aurat se shaadi ki, lekin beaulad mar gaye.
32 aakhir mein woh aurat bhi mar gayi.
33 jab mare huye zinda kiye jaayenge, tab woh un saaton mein se kiski patni hogi? kyonki saaton use apni patni bana chuke the.”
34 yeeshu ne unse kaha, “is zamane* mein aadmi shaadi karte hain aur aurton ki bhi shaadi karayi jaati hai.
35 magar jo us zamane mein jeevan paane aur mare huon mein se zinda kiye jaane ke laayak samjhe jaayenge, unmein na aadmi shaadi kareinge na aurton ki shaadi karvayi jaayegi.+
36 darasal woh fir kabhi nahin mar sakte kyonki woh swargdooton ki tarah honge aur mare huon mein se zinda hone ki vajah se parmeshvar ke bachche kehlayenge.
37 magar yah baat ki mare huon ko zinda kiya jaata hai, moosa ne bhi jhaadi ke kisse mein zahir ki hai, jahaan woh yahova* ko ‘abraham ka parmeshvar, ishaak ka parmeshvar aur yakub ka parmeshvar’ kehta hai.+
38 woh mare huon ka nahin, balki jeeviton ka parmeshvar hai isliye ki woh sab uski nazar mein zinda hain.”+
39 yah sunkar shaastriyon mein se kuch ne kaha, “guru, toone kya khoob kaha!”
40 iske baad unhonne usse koi aur saval karne ki himmat nahin ki.
41 fir usne bhi unse saval kiya, “log kyon kehte hain ki maseeh, daavid ka sirf ek vanshaj hai?+
42 daavid khud bhajnon ki kitab mein kehta hai, ‘yahova* ne mere prabhu se kaha, “tu tab tak mere daayen haath baith,
43 jab tak ki main tere dushmanon ko tere paanvon ki chauki na bana doon.”’+
44 jab daavid use prabhu kehta hai, to woh uska vanshaj kaise hua?”
45 jab sab log yeeshu ki sun rahe the, to usne chelon se kaha,
46 “shaastriyon se khabardar raho, jinhein lambe-lambe choge pehankar ghoomna aur baazaron mein logon se namaskar sunnaa achha lagta hai aur sabha-gharon mein sabse aage ki* jagahon par baithna aur shaam ki daavton mein sabse khaas jagah lena pasand hai,+
47 lekin woh vidhvaon ke ghar* hadap jaate hain aur dikhave ke liye lambee-lambee prarthnayen karte hain. inhein doosron ke mukable aur bhi kadi saza milegi.”
kai footnote
^ shaa., “raajyapal ke adhikar.”
^ yoonani mein “kaisar.”
^ ya “sabse badhiya.”
^ ya “ki jaaydad.”
