luka ke mutabik khushkhabri 22:1-71
-
yaajak, yeeshu ko maarne ki saazish karte hain (1-6)
-
aakhiri fasah ki taiyari (7-13)
-
prabhu ke sandhya-bhoj ki shurooat (14-20)
-
“mujhse gaddari karnevale ka haath mere saath mez par hai” (21-23)
-
garma-garam behas ki kise bada samjha jaaye (24-27)
-
yeeshu ne kiya raaj ka karar (28-30)
-
usne kaha ki patras uska inkar karega (31-34)
-
taiyar rehne ki zaroorat; do talvarein (35-38)
-
jaitoon pahad par yeeshu ki prarthna (39-46)
-
yeeshu ki giraftari (47-53)
-
patras use jaanne se inkar karta hai (54-62)
-
yeeshu ki khilli udayi gayi (63-65)
-
mahasabha ke saamne mukadma (66-71)
22 bin-khameer ki roti ka tyohar jo fasah kehlata hai,+ paas aa raha tha.+
2 aur pradhan yaajak aur shaastri, yeeshu ko apne raaste se hatana chahte the+ magar unhein logon ka dar tha, isliye woh koi badhiya tarkeeb dhoondh rahe the.+
3 fir shaitan, yahooda mein sama gaya jo iskariyoti kehlata tha aur jiski ginti un baarahon mein hoti thi.+
4 yahooda nikaalkar pradhan yaajkon aur mandir ke sardaron ke paas gaya aur unse is baare mein baat kee ki woh yeeshu ko kis tarah pakadvaye.+
5 tab woh bahot khush huye aur unhonne kaha ki woh use chaandi ke sikke deinge.+
6 yahooda raazee ho gaya aur yeeshu ko pakadvane ke liye aisa mauka dhoondhne laga jab bheed uske aas-paas na ho.
7 ab bin-khameer ki roti ke tyohar ka din aaya, jab fasah ka jaanvar chadhaya jaana tha.+
8 yeeshu ne patras aur yuhanna ko yah kehkar bheja, “jaao aur hamare liye fasah ka khaana khaane ki taiyari karo.”+
9 unhonne poochha, “tu kahaan chahta hai ki hum iski taiyari karein?”
10 usne kaha, “dekho! jab tum shehar mein jaaoge to tumhein ek aadmi paani ka ghada uthaye huye milega. uske peechhe-peechhe us ghar mein jaana jismein woh jaayega.+
11 tum us ghar ke maalik se kehna, ‘guru ne poochha hai, “mehmanon ka woh kamra kahaan hai jahaan main apne chelon ke saath fasah ka khaana khaaun?”’
12 fir woh tumhein oopar ka ek bada kamra dikhayega jo saja hua hoga. vahaan iski taiyari karna.”
13 tab woh nikaal pade aur jaisa usne bataya tha theek vaisa hi paaya aur unhonne fasah ki taiyari ki.
14 jab woh vakt aaya, to woh apne preshiton ke saath khaana khaane baitha.*+
15 yeeshu ne unse kaha, “meri badi tamanna thi ki main dukh jhelne se pehale tumhare saath fasah ka khaana khaaun.
16 kyonki main tumse kehta hoon ki jab tak isse judi har baat parmeshvar ke raaj mein poori na ho jaaye, tab tak main ise fir nahin khaaunga.”
17 fir ek pyala lekar usne prarthna mein dhanyavad diya aur kaha, “ise lo aur ek-ek karke ismein se peeo.
18 isliye ki main tumse kehta hoon ki main yah daakh-madira tab tak dobara nahin peeunga jab tak parmeshvar ka raaj nahin aata.”
19 fir usne ek roti li+ aur prarthna mein dhanyavad dekar use toda aur yah kehte huye unhein diya, “yah mere shareer ki nishani hai,+ jo tumhari khaatir diya jaana hai.+ meri yaad mein aisa hi kiya karna.”+
20 jab woh shaam ka khaana khaa chuke to usne pyala bhi liya aur kaha, “yah pyala us naye karar ki nishani hai+ jise mere khoon se pakka kiya jaayega,+ us khoon se jo tumhari khaatir bahaya jaana hai.+
21 magar dekho! mujhse gaddari karnevale ka haath mere saath mez par hai.+
22 insan ka beta to jaa hi raha hai, theek jaise uske liye tay kiya gaya hai.+ lekin us aadmi ka bahot bura hoga jo insan ke bete ke saath vishvasghat karke use pakadva dega!”+
23 isliye woh aapas mein baat karne lage ki aakhir unmein se woh kaun hai jo aisa karnevala hai.+
24 magar fir unke beech is baat par garma-garam behas chhid gayi ki unmein sabse bada kise samjha jaaye.+
25 magar usne unse kaha, “duniya ke raja logon par hukm chalate hain aur jo adhikar rakhte hain, woh daani kehlate hain.+
26 magar tumhein aisa nahin hona hai.+ iske bajay, jo tummein sabse bada hai woh sabse chhota bane+ aur jo aguvai karta hai, woh sevak jaisa bane.
27 isliye ki kaun zyada bada hai, jo khaane ke liye mez se tek lagaye baitha hai ya jo seva kar raha hai? kya vahi nahin jo mez se tek lagaye baitha hai? magar main tumhare beech sevak jaisa hoon.+
28 magar tum woh ho jo meri pareekshaon+ ke dauran mera saath dete rahe.+
29 theek jaise mere pita ne mere saath ek karar kiya hai, vaise hi main bhi tumhare saath raaj ka ek karar karta hoon+
30 taaki tum mere raaj mein meri mez par khaao-peeo+ aur raajgaddiyon par baithkar+ israel ke 12 gotron ka nyay karo.+
31 shamaun, shamaun, dekh! shaitan ne tum logon ko gehoon ki tarah fatakne ki maang ki hai.+
32 magar mainne tere liye minnat ki hai ki tu apna vishvas kho na de.+ jab tu pashchatap karke laut aaye, to apne bhaaiyon ko mazboot karna.”+
33 tab patras ne usse kaha, “prabhu, main to tere saath jail jaane aur marne ke liye bhi taiyar hoon.”+
34 magar usne kaha, “patras, main tujhse kehta hoon, aaj jab tak tu mujhe jaanne se teen baar inkar na karega, murga baang na dega.”+
35 usne chelon se yah bhi kaha, “jab mainne tumhein paise ki thaili, khaane ki potli aur jootiyon ke bina bheja tha,+ to kya tumhein kisi cheez ki kami hui thi?” unhonne kaha, “nahin!”
36 fir usne unse kaha, “magar ab jiske paas paise ki thaili ho woh use le le aur khaane ki potli bhi rakh le. jiske paas koi talvar nahin, woh apna choga bechkar ek khareed le.
37 main tumse kehta hoon, yah zaroori hai ki yah baat mujh par poori ho jo mere baare mein likhi gayi thi: ‘woh apradhiyon mein gina gaya.’+ ab yah baat mujh par poori ho rahi hai.”+
38 tab unhonne kaha, “prabhu, dekh! yahaan do talvarein hain.” usne kaha, “ye kaafi hain.”
39 fir woh baahar nikaalkar apne dastoor ke mutabik jaitoon pahad par gaya. chele bhi uske saath gaye.+
40 vahaan pahunchkar usne unse kaha, “prarthna mein lage raho taaki tum pareeksha mein na pado.”+
41 woh unse kuch door* aage gaya aur ghutne tekkar yah prarthna karne laga,
42 “hey pita, agar teri marzee ho, to yah pyala mere saamne se hata de. magar meri marzee nahin balki teri marzee poori ho.”+
43 tab swarg se ek doot uske saamne prakat hua aur uski himmat bandhayi.+
44 uska man dukh aur chinta se aisa chhalni ho gaya ki woh aur zyada gidgidakar prarthna karta raha+ aur uska paseena khoon ki boondein bankar zameen par gir raha tha.
45 jab woh prarthna karke utha aur apne chelon ke paas gaya, to usne dekha ki woh so rahe the kyonki woh dukh ke maare past ho chuke the.+
46 usne unse kaha, “tum so kyon rahe ho? utho aur prarthna karte raho taaki tum pareeksha mein na pado.”+
47 jab woh bol hi raha tha, to dekho! ek bheed vahaan aayi jise yahooda naam ka woh aadmi laa raha tha, jo un baarahon mein se ek tha. woh yeeshu ko choomne ke liye uske paas aaya.+
48 magar yeeshu ne usse kaha, “yahooda, kya tu insan ke bete ko choomkar use pakadva raha hai?”
49 jo uske saath the jab unhonne dekha ki kya honevala hai, to unhonne kaha, “prabhu, kya hum un par talvar chalayen?”
50 yahaan tak ki unmein se ek ne mahayajak ke daas par talvar chalakar uska daayaan kaan uda diya.+
51 magar yeeshu ne kaha, “bahot ho chuka.” aur yeeshu ne us daas ka kaan chhookar use theek kiya.
52 tab yeeshu ne pradhan yaajkon aur mandir ke sardaron aur mukhiyaon se jo use pakadne ke liye vahaan aaye the, kaha, “kya tum talvarein aur laathiyaan lekar mujhe pakadne aaye ho, maano main koi lutera hoon?+
53 jab main har din tumhare beech mandir mein hota tha,+ tab tumne mujhe haath nahin lagaya.+ magar yah vakt tumhara hai aur abhi andhkar ka raaj chal raha hai.”+
54 tab unhonne use giraftar kar liya+ aur mahayajak ke ghar le gaye. magar patras kuch doori par rehte huye unka peechha karta raha.+
55 jab woh aangan ke beech aag jalakar ek-saath baith gaye, to patras bhi unke beech baitha hua tha.+
56 magar ek daasi ne use aag ke saamne baithe dekha. usne use gaur se dekha aur kaha, “yah aadmi bhi uske saath tha.”
57 magar usne yah kehte huye inkar kar diya, “main use nahin jaanta.”
58 thodi hi der baad kisi aur ne use dekhkar kaha, “tu bhi unmein se ek hai.” magar patras ne kaha, “nahin bhai, main nahin hoon.”+
59 fir kareeb ek ghante baad, ek aur aadmi zor dekar yah kehne laga, “beshak yah aadmi bhi uske saath tha kyonki yah ek galeeli hai!”
60 magar patras ne kaha, “main nahin jaanta tu kya kah raha hai.” woh bol hi raha tha ki usi ghadi ek murge ne baang di
61 aur prabhu ne mudkar seedhe patras ko dekha aur patras ko prabhu ki yah baat yaad aayi, “aaj murge ke baang dene se pehale, tu teen baar mujhe jaanne se inkar kar dega.”+
62 aur woh baahar jaakaar fut-futkar rone laga.
63 jin aadmiyon ne yeeshu ko hirasat mein liya tha, woh uski khilli udane+ aur use maarne lage.+
64 woh uska munh dhakkar usse poochhne lage, “bhavishyavani kar! tujhe kisne maara?”
65 woh uske baare mein bahot-si ninda ki baatein kehne lage.
66 jab din nikaal aaya to logon ke mukhiyaon ki sabha ikattha hui,+ jismein pradhan yaajak aur shaastri bhi the. woh use apni mahasabha ke bhavan mein le gaye aur usse poochhne lage,
67 “agar tu maseeh hai, to hamein bata de.”+ magar usne kaha, “agar main tumhein bataun to bhi tum hargiz yakeen nahin karoge.
68 aur agar main tumse saval karoon, to tum mujhe javab nahin doge.
69 magar ab se insan ka beta+ parmeshvar ke shaktishali daayen haath baitha hua hoga.”+
70 yah sunkar un sabne kaha, “to kya tu parmeshvar ka beta hai?” usne kaha, “tum khud kah rahe ho ki main hoon.”
71 unhonne kaha, “ab hamein aur gavahi ki kya zaroorat hai? hamne khud iske munh se sun liya hai.”+
kai footnote
^ ya “mez se tek lagaye baitha.”
^ ya “patthar ko jitni door feinka jaa sakta hai, kareeb utni door.”
