luka ke mutabik khushkhabri 24:1-53
24 lekin hafte ke pehale din, woh aurtein taiyar kiye huye khushboodar masale lekar subah-subah kabraa* par aayin.+
2 magar unhonne dekha ki kabraa* ke munh par rakha gaya patthar door ludhka hua hai.+
3 andar jaane par unhein vahaan prabhu yeeshu ki laash nahin mili.+
4 jab woh is baat ko lekar badi uljhan mein thi, tabhi achanak do aadmi unke paas aa khade huye jinke kapde tez chamak rahe the.
5 woh aurtein dar gayin aur apna sir neeche jhukaye rahin. tab un aadmiyon ne kaha, “jo zinda hai, use tum mare huon ke beech kyon dhoondh rahi ho?+
6 woh yahaan nahin hai balki use zinda kar diya gaya hai. yaad karo, jab woh galeel mein hi tha to usne tumse kya kaha tha
7 ki zaroori hai ki insan ka beta paapiyon ke havale kiya jaaye aur kaath par latkakar maar daala jaaye, magar fir teesre din zinda ho jaaye.”+
8 tab unhein uski ye baatein yaad aayin+
9 aur woh kabraa* se laut aayin aur in saari baaton ki khabar un gyarahon ko aur baaki sabhi ko di.+
10 ye aurtein thi, mariyam magdaleeni, yoanna aur yakub ki maa mariyam. unke saath doosri aurtein bhi thi jinhonne preshiton ko ye baatein batayin.
11 magar preshiton aur doosre chelon ko ye baatein ekdam bakvas lagin aur unhonne in aurton ka yakeen nahin kiya.
12 lekin patras utha aur kabraa* ki taraf dauda. usne jhukkar kabraa ke andar dekha to vahaan sirf malmal ka kapda pada tha. isliye jo kuch hua tha, us par woh man-hi-man taajjub karta hua chala gaya.
13 magar dekho! usi din do chele immaoos naam ke ek gaanv jaa rahe the, jo yarooshalem se kareeb 11 kilometer* door hai.
14 jo-jo hua tha, uske baare mein woh ek-doosre se baat kar rahe the.
15 jab woh is baare mein ek-doosre se charcha kar rahe the, to khud yeeshu unke paas aaya aur unke saath-saath chalne laga
16 magar woh use pehchan nahin paaye.+
17 usne unse poochha, “tum chalte-chalte ek-doosre se kis baare mein behas kar rahe ho?” tab woh ruk gaye, unke chehre par udasi chhaayi hui thi.
18 kliyupas naam ke chele ne usse kaha, “kya tu yarooshalem mein akela rehnevala koi pardesi hai aur nahin jaanta* ki is shehar mein in dinon kya-kya hua hai?”
19 tab usne unse poochha, “kya hua hai?” unhonne kaha, “kya toone nahin suna ki yeeshu naasri+ ke saath kya-kya hua? usne aise-aise shaktishali kaam kiye aur shikshayen di jisse parmeshvar aur insanon ke saamne saabit hua ki woh ek bhavishyavakta hai.+
20 aur hamare pradhan yaajkon aur dharm-adhikariyon ne use maut ki saza dene ke liye saunp diya+ aur use kaath par thonk diya gaya.
21 magar hum to yah ummeed lagaye baithe the ki yah vahi hai jo israel ko chhutkara dilayega.+ aur haan, in sab ghatnaon ko huye aaj teesra din ho chuka hai.
22 aur-to-aur hamare beech kuch aurton ne bhi hamein hairat mein daal diya hai kyonki jab woh subah-subah kabraa* par gayin,+
23 to unhein uski laash nahin mili. woh aakaar kehne lagin ki unhonne ek anokhi ghatna dekhi, unhein swargdoot dikhayi diye jo kah rahe the ki woh zinda hai!
24 fir hammein se kuch uski kabraa* par gaye+ aur jaisa un aurton ne bataya tha, vaisa hi paaya magar use nahin dekha.”
25 tab usne unse kaha, “are naasmajh logo, tumhein bhavishyavaktaon ki sab baaton par vishvas karna itna mushkil kyon lag raha hai!
26 kya maseeh ke liye yah zaroori nahin tha ki woh ye saare dukh jhele+ aur fir mahima paaye?”+
27 usne moosa ki kitabon se lekar saare bhavishyavaktaon ki kitabon tak,+ yaani poore shastra mein uske baare mein jitni bhi baatein likhi thi, un sabka matlab unhein khol-kholkar samjhaya.
28 aakhirkar woh us gaanv ke nazdeek aa pahunche jahaan woh jaa rahe the aur usne aise dikhaya jaise use aage jaana ho.
29 magar woh usse baar-baar kehne lage, “hamare saath ruk jaa kyonki din dhal chuka hai aur andhera honevala hai.” tab woh unke saath thaharne ke liye ghar mein gaya.
30 jab woh unke saath khaane par baitha,* to usne roti li aur prarthna mein dhanyavad dekar use toda aur unhein dene laga.+
31 tab unki aankhein khul gayin aur woh use pehchan gaye. magar woh unke saamne se gaayab ho gaya.+
32 unhonne ek-doosre se kaha, “jab woh sadak par hamse baat kar raha tha aur hamein shastra ka matlab khol-kholkar* samjha raha tha, to kya hamare dil ki dhadkanein tez nahin ho gayi thi?”
33 tab usi ghadi woh uthe aur yarooshalem laut aaye aur unhonne un gyarahon ko doosre chelon ke saath ikattha paaya,
34 jo kah rahe the, “yah baat sach hai ki prabhu zinda ho gaya hai. woh shamaun ko dikhayi diya hai!”+
35 fir in logon ne bhi woh saari ghatnayen batayin jo sadak par hui thi aur yah bhi ki kaise unhonne use roti todte dekhkar pehchan liya.+
36 woh is baare mein baat kar hi rahe the ki tabhi yeeshu khud unke beech aa khada hua aur unse kaha, “tumhein shaanti mile.”+
37 magar woh bahot dar gaye aur dahshat mein the aur unhonne socha ki yah zaroor koi swargdoot hai.
38 tab usne unse kaha, “tum kyon pareshan ho rahe ho aur kyon apne dilon mein shak kar rahe ho?
39 mere haath aur mere pair dekho ki yah main hi hoon. mujhe chhuo aur dekho kyonki swargdoot ka haad-maans nahin hota, jaisa ki tum mera dekh rahe ho.”
40 yah kehte huye usne unhein apne haath aur pair dikhaye.
41 magar woh abhi-bhi maare khushi aur hairat ke yakeen nahin kar rahe the. tab usne unse kaha, “kya tumhare paas khaane ke liye kuch hai?”
42 unhonne use bhuni hui machhli ka ek tukda diya
43 aur usne lekar un sabke saamne khaaya.
44 tab usne kaha, “yaad hai, ye saari baatein mainne tumhein us vakt batayi thi jab main tumhare saath tha.+ mainne bataya tha, kis tarah moosa ke kaanoon, bhavishyavaktaon ki kitabon aur bhajnon mein mere baare mein jo kuch likha hai, woh sab poora hona zaroori hai.”+
45 tab usne shastra mein likhi baaton ka matlab unhein achhi tarah samjhaya.*+
46 aur unse kaha, “likha hai ki maseeh dukh jhelega aur teesre din mare huon mein se zinda ho jaayega.+
47 fir yarooshalem se shuroo karte huye sab raashtron mein prachar kiya jaayega+ ki paapon ki maafi paane ke liye+ uske naam se pashchatap karo.+
48 tumhein in baaton ki gavahi deni hai.+
49 aur dekho! main tum par woh shakti bhej raha hoon, jiska vaada mere pita ne kiya hai. magar jab tak tum oopar se woh shakti haasil na kar lo, tab tak isi shehar mein rehna.”+
50 fir woh unhein shehar se baahar baitniyah tak le aaya aur apne haath uthakar unhein aasheesh di.
51 aasheesh dete huye woh unse juda ho gaya aur use swarg utha liya gaya.+
52 unhonne use dandvat kiya* aur khushi-khushi yarooshalem laut aaye.+
53 woh har din mandir mein parmeshvar ki badai karte rahe.+
kai footnote
^ ya “smarak kabraa.”
^ ya “smarak kabraa.”
^ ya “smarak kabraa.”
^ ya “smarak kabraa.”
^ ya shaayad, “kya yarooshalem mein tu hi ek musafir hai jo nahin jaanta?”
^ ya “smarak kabraa.”
^ ya “smarak kabraa.”
^ ya “mez se tek lagaye tha.”
^ ya “saaf-saaf.”
^ ya “unke dimag poori tarah khol diye.”
^ ya “jhukkar pranam kiya.”
