luka ke mutabik khushkhabri 4:1-44
-
shaitan ne yeeshu ko fuslane ki koshish ki (1-13)
-
yeeshu ne galeel mein prachar shuroo kiya (14, 15)
-
naasrat mein yeeshu thukraya gaya (16-30)
-
kafarnahoom ke sabha-ghar mein (31-37)
-
shamaun ki saas aur baaki logon ko theek karta hai (38-41)
-
jab yeeshu ekaant mein hota hai to bheed use dhoondh leti hai (42-44)
4 yeeshu pavitra shakti se bhara hua yardan se chala gaya. pavitra shakti use veerane mein le gayi+
2 aur woh 40 din tak vahaan raha. is dauran yeeshu ne kuch nahin khaaya aur jab woh din khatm huye, to use bhookh lagi. tab shaitan* ne use fuslane ki koshish ki.+
3 usne yeeshu se kaha, “agar tu parmeshvar ka ek beta hai, to is patthar se bol ki yah roti ban jaaye.”
4 magar yeeshu ne use javab diya, “likha hai, ‘insan ko sirf roti se zinda nahin rehna hai.’”+
5 fir shaitan use ek unchi jagah le aaya aur pal-bhar mein use duniya ke saare raajya dikhaye.+
6 shaitan ne usse kaha, “main in sabka adhikar aur inki shaano-shaukat tujhe de doonga kyonki yah sab mere havale kiya gaya hai+ aur main jise chahoon use deta hoon.
7 isliye agar tu bas ek baar mere saamne meri upasna kare, to yah sabkuch tera ho jaayega.”
8 yeeshu ne use javab diya, “likha hai, ‘tu sirf apne parmeshvar yahova* ki upasna kar aur usi ki pavitra seva kar.’”+
9 fir shaitan, yeeshu ko yarooshalem le gaya aur mandir ki chhat ki munder* par laakaar khada kiya aur usse kaha, “agar tu parmeshvar ka ek beta hai, to yahaan se neeche chhalaang laga de+
10 kyonki likha hai, ‘parmeshvar apne swargdooton ko hukm dega ki woh tujhe bachayen,’
11 aur ‘woh tujhe haathon-haath utha leinge taaki tera pair kisi patthar se chot na khaaye.’”+
12 tab yeeshu ne usse kaha, “yah kaha gaya hai, ‘tu apne parmeshvar yahova* ki pareeksha na lena.’”+
13 jab shaitan ye saari pareekshayen le chuka, tab koi aur sahi mauka milne tak woh uske paas se chala gaya.+
14 fir yeeshu pavitra shakti se bhara hua galeel lauta+ aur aas-paas ke saare ilakon mein uske baare mein achhi khabrein fail gayin.
15 woh unke sabha-gharon mein sikhane laga aur sab log uska aadar karne lage.
16 fir woh naasrat gaya+ jahaan uski parvarish hui thi. aur apne dastoor ke mutabik woh sabt ke din vahaan ke sabha-ghar mein gaya+ aur padhne ke liye khada hua.
17 bhavishyavakta yashayah ka kharra uske haath mein diya gaya aur usne kharra khola aur woh jagah dhoondhkar nikaali jahaan yah likha tha,
18 “yahova* ki pavitra shakti mujh par hai kyonki usne mera abhishek kiya hai ki main gareebon ko khushkhabri sunaun. usne mujhe bheja hai taaki main bandiyon ko rihai ka, andhon ko aankhon ki raushni paane ka aur kuchle huon ko aazadi ka sandesh doon+
19 aur yahova* ki manzoori paane ke saal ka prachar karoon.”+
20 fir usne kharra lapetkar sevak ko de diya aur baith gaya. sabha-ghar mein sab logon ki nazrein us par jami hui thi.
21 tab usne kaha, “yah vachan jo tumne abhi-abhi suna, aaj poora hua hai.”+
22 woh sabhi uski taareef karne lage aur uski dil jeetnevali baaton par taajjub karne+ aur yah kehne lage, “kya yah yoosuf ka beta nahin hai?”+
23 tab yeeshu ne unse kaha, “beshak tum yah kahavat kahoge, ‘are vaid, pehale khud ka ilaj kar’ aur mujh par yah kehte huye laagoo karoge, ‘ kafarnahoom+ mein toone jo kaam kiye the unke baare mein hamne suna hai, ab vahi kaam apne shehar mein bhi kar.’”
24 yeeshu ne kaha, “main tumse sach kehta hoon ki kisi bhi bhavishyavakta ko uske apne ilake mein sweekar nahin kiya jaata.+
25 ab eliyah ke dinon ki hi baat le lo, saadhe teen saal tak baarish nahin hui aur poore desh mein bhaari akaal pada.+ yakeen maano us vakt israel mein bahot-si vidhvayen thi
26 magar eliyah ko unmein se kisi bhi aurat ke paas nahin bheja gaya, balki sirf seedon desh ke saarpat nagar ki ek vidhva ke paas bheja gaya.+
27 yahi nahin, bhavishyavakta eleesha ke zamane mein israel mein bahot-se kodhi the, fir bhi unmein se kisi ko bhi shuddh nahin kiya gaya, balki seeriya ke naaman ko shuddh* kiya gaya.”+
28 sabha-ghar mein maujood logon ne jab ye baatein sunin, to woh sab aag-baboola ho gaye.+
29 woh uthe aur fauran yeeshu ko shehar ke baahar le gaye taaki jis pahad par unka shehar basa tha uski choti se use neeche dhakel dein.
30 magar woh unke beech mein se nikaalkar apne raaste chala gaya.+
31 yeeshu vahaan se kafarnahoom gaya jo galeel ka ek shehar tha. woh sabt ke din logon ko sikha raha tha.+
32 woh uske sikhane ka tareeka dekhkar dang reh gaye+ kyonki woh poore adhikar ke saath bolta tha.
33 us sabha-ghar mein ek aadmi tha, jismein ek dusht swargdoot samaya tha aur woh zor se chillane laga,+
34 “o yeeshu naasri,+ hamein tujhse kya lena-dena? kya tu hamein naash karne aaya hai? main jaanta hoon tu asal mein kaun hai, tu parmeshvar ka pavitra jan hai.”+
35 magar yeeshu ne use fatkaara, “chup ho jaa aur usmein se baahar nikaal jaa.” tab us dusht swargdoot ne us aadmi ko logon ke beech patak diya aur use bina koi nuksan pahunchaye usmein se nikaal gaya.
36 yah dekhkar sab hairan reh gaye aur ek-doosre se kehne lage, “dekho! yah kitne adhikar ke saath baat karta hai, iske paas kitni shakti hai! iske hukm par to dusht swargdoot bhi nikaal jaate hain.”
37 isliye aas-paas ke ilake mein har taraf uski khabar fail gayi.
38 sabha-ghar se nikaalne ke baad, yeeshu shamaun ke ghar aaya. shamaun ki saas tez bukhar se tap rahi thi. unhonne yeeshu se binti ki ki woh uske liye kuch kare.+
39 isliye yeeshu ne uske paas khade hokar bukhar ko daanta aur uska bukhar utar gaya. usi pal woh uth gayi aur unki seva karne lagi.
40 lekin jab sooraj dhalne laga, tab log apne ghar ke un sabhi logon ko uske paas le aaye, jinhein tarah-tarah ki beemariyaan thi. usne harek par apne haath rakhkar unhein theek kar diya.+
41 yahaan tak ki dusht swargdoot bhi yah chillate huye bahoton mein se nikaal jaate the, “tu parmeshvar ka beta hai.”+ magar woh unhein daant deta aur bolne nahin deta tha,+ kyonki woh jaante the ki woh maseeh hai.+
42 lekin jab din hua, to woh vahaan se nikaalkar kisi ekaant jagah ki taraf chala gaya.+ magar logon ki bheed use talashne lagi aur dhoondhte-dhoondhte uske paas pahunch gayi aur use rokne lagi taaki woh unke paas se na jaaye.
43 magar yeeshu ne unse kaha, “mujhe doosre shehron mein bhi parmeshvar ke raaj ki khushkhabri sunani hai kyonki mujhe iseeliye bheja gaya hai.”+
44 fir woh jaakaar yahoodiya ke sabha-gharon mein prachar karne laga.
