luka ke mutabik khushkhabri 7:1-50
7 jab woh logon ko woh saari baatein bata chuka jo woh batana chahta tha, to woh kafarnahoom aaya.
2 vahaan ek sena-afsar tha jise apne ek daas se bahot pyar tha. woh daas itna beemar pad gaya ki ab marne par tha.+
3 jab sena-afsar ne yeeshu ke baare mein suna, to usne yahoodiyon ke mukhiyaon ko usse yah binti karne bheja ki aakaar mere daas ko theek kar de.
4 jab woh yeeshu ke paas pahunche, to uske aage gidgidane lage, “woh sena-afsar ek bhala aadmi hai, meharbani karke uski madad kar.
5 woh hum yahoodiyon se pyar karta hai, usi ne hamara sabha-ghar banvaya hai.”
6 tab yeeshu unke saath chal diya. magar jab woh uske ghar se thodi hi door tha, to sena-afsar ke kuch dost uske paas aaye, jinke haath usne yah sandesh bheja tha: “maalik, aur takaleef mat utha kyonki main is laayak nahin ki tu meri chhat tale aaye.+
7 isi vajah se mainne apne aapko is kaabil nahin samjha ki tere paas aaun. bas tu apne munh se kah de aur mera sevak theek ho jaayega.
8 kyonki main bhi kisi adhikari ke neeche kaam karta hoon aur mere neeche bhi sipahi hain. jab main ek se kehta hoon, ‘jaa!’ to woh jaata hai aur doosre se kehta hoon, ‘aa!’ to woh aata hai aur apne daas se kehta hoon, ‘yah kar!’ to woh karta hai.”
9 jab yeeshu ne yah suna to use afsar par bahot taajjub hua. usne mudkar apne peechhe aanevali bheed se kaha, “main tumse kehta hoon, mainne israel mein bhi aisa zabardast vishvas nahin paaya.”+
10 jo bheje gaye the unhonne ghar lautne par paaya ki woh daas bilkul theek ho chuka hai.+
11 kuch hi samay baad woh naain naam ke ek shehar gaya. uske chele aur ek badi bheed uske saath jaa rahi thi.
12 jab woh shehar ke faatak ke paas pahuncha, to dekho! log ek murde ko le jaa rahe the jo apni maa ka akela* beta tha.+ aur-to-aur, woh vidhva thi. us shehar se badi taadad mein log us aurat ke saath jaa rahe the.
13 jab prabhu ki nazar us aurat par padi, to woh tadap utha+ aur usne kaha, “mat ro.”+
14 tab usne paas aakaar arthi ko chhua aur arthi uthanevale ruk gaye. fir usne kaha, “hey javan, main tujhse kehta hoon uth!”+
15 tab woh javan jo mar gaya tha, uth baitha aur baat karne laga aur yeeshu ne use uski maa ko saunp diya.+
16 yah dekhkar sab logon par dar chhaa gaya aur woh yah kehte huye parmeshvar ki mahima karne lage, “hamare beech ek mahan bhavishyavakta aaya hai”+ aur “parmeshvar ne apne logon ki taraf dhyan diya hai.”+
17 uske baare mein yah khabar poore yahoodiya aur aas-paas ke sab ilakon mein fail gayi.
18 yuhanna ke chelon ne use in saari baaton ki khabar di.+
19 tab yuhanna ne apne do chelon ko bulaya aur unhein prabhu se yah poochhne ke liye bheja, “woh jo aanevala tha, kya tu hi hai+ ya hum kisi aur ki aas lagayen?”
20 jab woh yeeshu ke paas aaye, to unhonne kaha, “yuhanna baptisma denevale ne hamein tere paas yah poochhne ke liye bheja hai, ‘woh jo aanevala tha, kya tu hi hai ya hum kisi aur ki aas lagayen?’”
21 usi vakt yeeshu ne bahot-se logon ki beemariyaan aur dardnak rog door kiye+ aur logon mein samaye dusht swargdooton ko nikaala aur bahot-se andhon ko aankhon ki raushni di.
22 yeeshu ne unse kaha, “jo kuch tumne dekha aur suna hai, jaakaar woh sab yuhanna ko batao: andhe ab dekh rahe hain,+ langde chal-fir rahe hain, kodhi shuddh kiye jaa rahe hain, behre sun rahe hain,+ mare huon ko zinda kiya jaa raha hai aur gareebon ko khushkhabri sunayi jaa rahi hai.+
23 sukhi hai woh jo mere baare mein shak nahin karta.”*+
24 jab yuhanna ka sandesh laanevale chale gaye, to yeeshu bheed se yuhanna ke baare mein yah kehne laga, “tum veerane mein kya dekhne gaye the? hava se idhar-udhaar hilte kisi narkat ko?+
25 fir tum kya dekhne gaye the? kya reshmi mulayam* kapde pehne kisi aadmi ko?+ shaandar kapde pehannevale aur aisho-aaram se jeenevale to mahlon mein rehte hain.
26 to aakhir tum kya dekhne gaye the? ek bhavishyavakta ko? haan. balki main tumse kehta hoon, bhavishyavakta se bhi badhkar kisi ko dekhne gaye the.+
27 yah vahi hai jiske baare mein likha hai, ‘dekh! main apna doot tere aage-aage bhej raha hoon, jo tere liye raasta taiyar karega.’+
28 main tumse kehta hoon, ab tak jitne bhi insan paida huye hain, unmein yuhanna se bada koi bhi nahin. magar parmeshvar ke raaj mein jo sabse chhota hai, woh yuhanna se bhi bada hai.”+
29 (jab sab logon ne aur kar-vasoolnevalon ne yah suna, to unhonne kaha ki parmeshvar sachcha hai. in logon ne woh baptisma liya tha jiska prachar yuhanna karta tha.+
30 magar fareesi aur jo kaanoon ke jaankar the, unhonne woh baptisma nahin liya tha. aur parmeshvar ne unke liye jo maksad thehraya tha, use thukra diya.)+
31 “isliye main is peedhi ke logon ki tulna kisse karoon, ye kiske jaise hain?+
32 ye aise hain maano baazaron mein baithe bachche ek-doosre ko pukarkar kah rahe hon, ‘hamne tumhare liye baansuri bajayi magar tum nahin naache. hamne vilap kiya magar tum nahin roye.’
33 vaise hi yuhanna baptisma denevala auron ki tarah na roti khaata, na daakh-madira peeta aaya,+ fir bhi tum kehte ho, ‘usmein dusht swargdoot samaya hai.’
34 jabki insan ka beta auron ki tarah khaata-peeta aaya, fir bhi tum kehte ho, ‘dekho! yah aadmi petoo aur piyakkad hai aur kar-vasoolnevalon aur paapiyon ka dost hai!’+
35 lekin buddhi apne saare nateejon* se sahi saabit hoti hai.”*+
36 shamaun naam ka ek fareesi tha jisne yeeshu se baar-baar guzarish ki ki woh uske yahaan khaane par aaye. isliye yeeshu uske ghar gaya aur khaane baitha.
37 usi shehar mein ek badnam aurat thi, jiske baare mein sab jaante the ki woh ek paapin hai. jab use maaloom pada ki yeeshu us fareesi ke ghar khaane par aaya hai,* to woh khushboodar tel ki botal lekar aayi.+
38 woh yeeshu ke pairon ke paas peechhe aayi aur ro-rokar apne aansuon se uske pair bhigone lagi aur apne baalon se unhein ponchhne lagi. woh baar-baar uske pairon ko choom rahi thi aur un par khushboodar tel daal rahi thi.
39 yah dekhkar woh fareesi jisne yeeshu ko nyauta diya tha, man-hi-man kehne laga, “agar yah aadmi sachmuch ek bhavishyavakta hota, to jaan leta ki yah aurat jo use chhoo rahi hai, kaun hai aur kaisi hai, yah ek paapin hai.”+
40 magar yeeshu ne usse kaha, “shamaun, main tujhse kuch kehna chahta hoon.” usne kaha, “guru, bol!”
41 “do aadmi kisi saahookar ke karzdar the. ek par 500 deenar* ka karz tha aur doosre par 50 ka.
42 lekin jab apna karz chukane ke liye unke paas kuch bhi nahin tha, tab saahookar ne badi udarta se un donon ka karz maaf kar diya. isliye bata, un donon mein se kaun saahookar se zyada pyar karega?”
43 shamaun ne javab diya, “mere khayal se vahi aadmi jiska usne zyada karz maaf kiya.” yeeshu ne kaha, “toone bilkul sahi kaha.”
44 tab yeeshu ne us aurat ki taraf mudkar dekha aur shamaun se kaha, “kya tu is aurat ko dekh raha hai? main tere ghar aaya aur toone mujhe pair dhone ke liye paani nahin diya. magar is aurat ne apne aansuon se mere pair dhoye aur apne baalon se unhein ponchha.
45 toone mujhe nahin chooma. magar jab se main aaya hoon tab se yah aurat mere pairon ko choom rahi hai.
46 toone mere sir par tel nahin undela. magar is aurat ne mere pairon par khushboodar tel daala hai.
47 is vajah se, main tujhse kehta hoon ki bhale hi iske paap bahot hain magar woh maaf kiye gaye,+ isliye yah zyada pyar kar rahi hai. magar jiske kam paap maaf kiye gaye, woh kam pyar karta hai.”
48 tab yeeshu ne aurat se kaha, “tere paap maaf kiye gaye.”+
49 yah sunkar jo log uske saath mez par the, man-hi-man kehne lage, “yah aadmi kaun hai jo paapon ko bhi maaf karta hai?”+
50 magar yeeshu ne aurat se kaha, “tere vishvas ne tujhe bacha liya hai.+ jaa, ab aur chinta mat karna.”
kai footnote
^ shaa., “iklauta.”
^ ya “meri vajah se thokar nahin khaata.”
^ ya “badhiya.”
^ ya “buddhi ki jeet hoti hai.”
^ ya “bachchon.”
^ ya “mez se tek lagaye baitha hai.”
