luka ke mutabik khushkhabri 9:1-62
-
12 chelon ko prachar ki hidaytein (1-6)
-
herodes, yeeshu ke baare mein sunkar uljhan mein (7-9)
-
yeeshu ne 5,000 ko khilaya (10-17)
-
patras batata hai ki yeeshu hi maseeh hai (18-20)
-
yeeshu ki maut ki bhavishyavani (21, 22)
-
sachcha chela kaun hai (23-27)
-
yeeshu ka roop badla (28-36)
-
dusht swargdoot ke kabze mein pada ladka theek hua (37-43k)
-
yeeshu ek baar fir apni maut ki bhavishyavani karta hai (43kh-45)
-
chele behas karte hain ki kaun bada hai (46-48)
-
jo hamare khilaf nahin, woh hamare saath hai (49, 50)
-
saamriyon ka ek gaanv yeeshu ko thukra deta hai (51-56)
-
yeeshu ka chela banne ke liye kya karein (57-62)
9 fir yeeshu ne apne 12 chelon ko bulaya aur unhein sab dusht swargdooton par adhikar diya aur shakti di ki woh logon mein se unhein nikaalein+ aur beemariyaan theek karein.+
2 aur unhein parmeshvar ke raaj ka prachar karne aur changa karne bheja.
3 usne unse kaha, “safar ke liye kuch mat lena, na laathi, na khaane ki potli, na roti, na paise,* na hi do jodi kapde lena.+
4 magar jab bhi tum kisi ghar mein jaao, to vahin thahro aur vahin se vida lo.+
5 agar kisi shehar mein log tumhein sweekar na karein, to vahaan se baahar nikaalte vakt apne pairon ki dhool jhaad dena taaki unke khilaf gavahi ho.”+
6 tab woh poore ilake mein gaanv-gaanv jaakaar khushkhabri sunate rahe aur har kahin logon ko changa karte gaye.+
7 jab zila-shaasak herodes* ne suna ki kya-kya ho raha hai, to woh badi uljhan mein pad gaya. isliye ki yeeshu ke baare mein kuch log kehte the ki woh yuhanna hai jo mar gaya tha aur jise ab zinda kar diya gaya hai.+
8 jabki doosre uske baare mein kehte the ki eliyah prakat hua hai, magar kuch aur kehte the ki purane bhavishyavaktaon mein se koi zinda ho gaya hai.+
9 herodes ne kaha, “yuhanna ka to mainne sir katva diya tha.+ to fir, yah kaun hai jiske baare mein main aisi baatein sun raha hoon?” isliye woh yeeshu ko dekhna chahta tha.+
10 jab preshit laute to aakaar yeeshu ko batane lage ki unhonne kya-kya kiya hai.+ tab woh unhein saath lekar baitsaida naam ke shehar mein, kisi ekaant jagah ke liye nikaal gaya.+
11 magar bheed ko iska pata chal gaya aur woh uske peechhe gayi. yeeshu un sabse pyar se mila aur unhein parmeshvar ke raaj ke baare mein batane laga aur jinhein ilaj ki zaroorat thi, unhein theek kiya.+
12 fir din dhalne laga aur woh 12 uske paas aaye aur kehne lage, “bheed ko bhej de taaki woh aas-paas ke gaanvon aur dehaton mein jaakaar apne khaane aur thaharne ka intazam karein, kyonki hum yahaan sunsan jagah mein hain.”+
13 magar yeeshu ne unse kaha, “tumhin unhein kuch khaane ko do.”+ unhonne kaha, “hamare paas paanch rotiyon aur do machhliyon ke siva kuch nahin hai. kya tu yah chahta hai ki hum khud jaakaar in sab logon ke liye khaana khareedkar laayen?”
14 darasal vahaan kareeb 5,000 aadmi the. yeeshu ne apne chelon se kaha, “unhein pachas-pachas ki toliyon mein bitha do.”
15 unhonne aisa hi kiya aur sabko bitha diya.
16 tab usne paanch rotiyaan aur do machhliyaan lin aur aakash ki taraf dekhkar prarthna mein dhanyavad diya. fir unhein todkar chelon ko dene laga taaki woh bheed ke saamne paros dein.
17 tab sab logon ne ji-bharkar khaaya aur unhonne bache huye tukde uthaye jinse 12 tokriyaan bhar gayin.+
18 baad mein jab yeeshu akele mein prarthna kar raha tha, tab chele uske paas aaye. usne chelon se poochha, “log mere baare mein kya kehte hain, main kaun hoon?”+
19 unhonne kaha, “kuch kehte hain, yuhanna baptisma denevala, doosre kehte hain eliyah aur kuch kehte hain purane zamane ke bhavishyavaktaon mein se koi zinda ho gaya hai.”+
20 tab yeeshu ne unse poochha, “lekin tum kya kehte ho, main kaun hoon?” patras ne javab diya, “tu parmeshvar ka bheja hua maseeh hai.”+
21 tab usne unhein sakhti se kaha ki yah baat kisi ko na batayen+
22 aur yah bhi kaha, “insan ke bete ko kai dukh-takaleefein sahni padeingi aur mukhiya, pradhan yaajak aur shaastri use thukra deinge aur woh maar daala jaayega.+ fir teesre din use zinda kar diya jaayega.”+
23 tab yeeshu ne sabse kaha, “agar koi mere peechhe aana chahta hai, to woh khud se inkar kare+ aur har din apna yaatna ka kaath* uthaye aur mere peechhe chalta rahe.+
24 kyonki jo koi apni jaan bachana chahta hai woh use khoyega, magar jo koi meri khaatir apni jaan ganvata hai vahi use bachayega.+
25 vaakai, agar ek insan saari duniya haasil kar le magar apni jaan ganva baithe ya woh barbad ho jaaye, to use kya faayda?+
26 isliye ki jo koi mera chela hone aur mere vachnon par vishvas karne mein sharminda mehsoos karta hai, use insan ka beta bhi us vakt sweekar karne mein sharminda mehsoos karega jab woh apni, apne pita ki aur pavitra swargdooton ki mahima ke saath aayega.+
27 magar main tumse sach kehta hoon ki yahaan jo khade hain, unmein se kuch aise hain jo tab tak maut ka munh nahin dekheinge, jab tak ki woh parmeshvar ke raaj ko na dekh lein.”+
28 darasal yah kehne ke kareeb aath din baad aisa hua ki woh patras, yuhanna aur yakub ko apne saath lekar prarthna karne ke liye ek pahad par chadh gaya.+
29 jab woh prarthna kar raha tha, to uske chehre ka roop badal gaya aur uske kapde safed hokar jagmagane lage.
30 aur dekho! do aadmi usse baat kar rahe the. woh moosa aur eliyah the.
31 woh poori mahima ke saath dikhayi diye aur yeeshu ki vidai ke baare mein baat karne lage, jo bahot jald yarooshalem se honevali thi.+
32 patras aur uske saathi nind se bojhil the. magar jab woh poori tarah jaag gaye, to unhonne yeeshu ki mahima dekhi+ aur do aadmiyon ko uske saath khada dekha.
33 jab woh donon yeeshu ke paas se jaane lage, to patras ne usse kaha, “guru, hum bahot khush hain ki hum yahaan aaye. isliye hamein teen tamboo khade karne de, ek tere liye, ek moosa ke liye aur ek eliyah ke liye.” patras nahin jaanta tha ki woh kya kah raha hai.
34 jab woh bol hi raha tha, to ek baadal ubhra aur un par chhaane laga. baadal ke ghirne se woh ghabra gaye.
35 us baadal mein se aavaz+ aayi: “yah mera beta hai, jise mainne chuna hai.+ iski suno.”+
36 jab woh aavaz aayi, to unhonne dekha ki yeeshu vahaan akela hai. unhonne vahaan jo dekha tha usmein se ek bhi baat kuch samay tak kisi ko nahin batayi aur is baare mein woh chup rahe.+
37 agle din jab woh pahad se neeche utre, to ek badi bheed uske paas aayi.+
38 tabhi achanak bheed mein se ek aadmi ne zor se pukara, “guru, main tujhse binti karta hoon ek nazar mere bete ko dekh le, woh mera ek hi beta hai.+
39 use ek dusht swargdoot jakad leta hai aur achanak woh cheekhne lagta hai. woh doot use aise marodta hai ki woh jhaag ugalne lagta hai aur use ghaayal karne ke baad badi mushkil se chhodta hai.
40 mainne tere chelon se use nikaalne ki binti ki magar woh nahin nikaal sake.”
41 tab yeeshu ne kaha, “are avishvasi aur tedhe logo,*+ main aur kab tak tumhare saath rahoon? kab tak tumhari sahoon? apne bete ko yahaan laa.”+
42 jab ladka aa raha tha, to dusht swargdoot ne use zameen par patak diya aur buri tarah maroda. lekin yeeshu ne us dusht swargdoot ko fatkaara aur ladke ko theek kar diya aur uske pita ko saunp diya.
43 parmeshvar ki yah mahashakti dekhkar sab log dang reh gaye.
jab woh uske sab kaamon par taajjub kar rahe the, to usne apne chelon se kaha,
44 “main jo batane jaa raha hoon us par kaan lagao. insan ke bete ke saath vishvasghat kiya jaayega aur use logon ke havale kar diya jaayega.”+
45 magar chele ab bhi uski baat ka matlab nahin samjhe the. darasal is baat ka matlab unse chhipaya gaya tha taaki woh ise samajh na sakein aur woh is baare mein usse saval poochhne se bhi dar rahe the.
46 iske baad unmein yah behas chhid gayi ki unmein sabse bada kaun hai.+
47 tab yeeshu ne yah jaante huye ki woh apne dilon mein kya soch rahe hain, ek chhote bachche ko apne paas khada kiya
48 aur unse kaha, “jo koi mere naam se is chhote bachche ko sweekar karta hai woh mujhe bhi sweekar karta hai. aur jo mujhe sweekar karta hai woh use bhi sweekar karta hai jisne mujhe bheja hai.+ isliye ki tummein se jo apne aapko baakiyon se chhota samajhkar chalta hai, vahi tum sab mein bada hai.”+
49 yuhanna ne kaha, “guru, hamne dekha ki ek aadmi tera naam lekar logon mein samaye dusht swargdooton ko nikaal raha tha aur hamne use rokne ki koshish ki, kyonki woh hamare saath nahin chalta.”+
50 magar yeeshu ne usse kaha, “use rokne ki koshish mat karo kyonki jo tumhare khilaf nahin, woh tumhare saath hai.”
51 jab woh vakt paas aa raha tha* ki woh oopar utha liya jaaye,+ tab usne yarooshalem jaane ki thaan li.
52 isliye usne kuch chelon ko apne aage-aage bheja. woh saamriyon ke ek gaanv mein gaye taaki uske liye taiyariyaan karein.
53 magar gaanvvalon ne yeeshu ko koi jagah nahin di+ kyonki woh yarooshalem jaane ki thaan chuka tha.*
54 yah dekhkar chele yakub aur yuhanna+ ne kaha, “prabhu agar teri ijazat ho, to kya hum hukm dein ki aakash se aag barse aur inhein bhasm kar de?”+
55 magar usne palatkar unhein daanta.
56 tab woh kisi aur gaanv mein chale gaye.
57 jab woh sadak par jaa rahe the, to kisi ne yeeshu se kaha, “tu jahaan kahin jaayega main tere saath chaloonga.”
58 magar yeeshu ne usse kaha, “lomdiyon ki maandein aur aakash ke panchhiyon ke basere hote hain, magar insan ke bete ke paas kahin sir tikane ki bhi jagah nahin hai.”+
59 tab usne ek aur se kaha, “mera chela ban jaa.” us aadmi ne kaha, “prabhu, mujhe ijazat de ki main jaakaar pehale apne pita ko dafna doon.”+
60 magar yeeshu ne usse kaha, “murdon+ ko apne murde dafnane de, magar tu jaakaar parmeshvar ke raaj ka ailan kar.”+
61 fir kisi aur ne kaha, “hey prabhu, main tera chela zaroor banoonga, magar mujhe ijazat de ki pehale apne gharvalon ko alvida kah doon.”
62 yeeshu ne usse kaha, “koi bhi insan jo hal par haath rakhne ke baad, peechhe chhodi hui cheezon ko mudkar dekhta hai,+ woh parmeshvar ke raaj ke laayak nahin.”+
kai footnote
^ shaa., “chaandi.”
^ shaa., “peedhi.”
^ shaa., “jab din poore hone par the.”
^ shaa., “ka rukh kiya.”
