malaki 4:1-6
4 senaon ka parmeshvar yahova kehta hai, “dekho, woh din aa raha hai jo dhadhakte bhatthe jaisa hoga.+ us din saare gustakh log aur dusht kaam karnevale ghaas-foos ban jaayenge. aanevala woh din unhein bhasm kar dega, na jad bachegi na daal.
2 lekin tum jo mere naam ka aadar karte* ho, tum par neki ka sooraj chamkega aur uski kirnon se tum change hoge. tum mote-taaze bachhdon ki tarah koodoge-faandoge.”
3 senaon ka parmeshvar yahova kehta hai, “jis din main kadam uthaunga us din, dusht tumhare pairon ki dhool ban jaayenge aur tum unhein raundoge.”
4 “mainne apne sevak moosa ko jo kaanoon diya tha use yaad rakhna. haan, un niyamon aur faislon ko yaad rakhna jo mainne horeb mein israel ke liye diye the.+
5 dekho, yahova ke us mahan aur bhayanak din ke aane se pehale+ main tumhare paas bhavishyavakta eliyah ko bhej raha hoon.+
6 woh pitaon ka dil palatkar beton jaisa kar dega+ aur beton ka dil palatkar pitaon jaisa kar dega taaki mujhe aakaar prithvi ko tabah na karna pade, ise naash na karna pade.”
kai footnote
^ shaa., “dar maante.”
