markus ke mutabik khushkhabri 5:1-43
5 fir woh jheel ke us paar giraseniyon ke ilake mein pahunche.+
2 jaise hi yeeshu naav se utra, ek aadmi jo ek dusht swargdoot ke vash mein tha, kabraon* ke beech se nikaalkar uske paas aaya.
3 yah aadmi kabraon ke beech bhatakta firta tha. koi bhi use baandhkar rakhne mein kaamyab nahin ho saka tha, yahaan tak ki zanjeeron se bhi nahin.
4 use kai baar bediyon aur zanjeeron se baandha gaya tha, magar woh zanjeerein tod daalta aur bediyon ke tukde-tukde kar deta tha. kisi mein itni taakat nahin thi ki use kaaboo mein kar sake.
5 woh raat-din kabraon aur pahadon ke beech chillata rehta aur pattharon se khud ko ghaayal karta rehta.
6 lekin jaise hi usne door se yeeshu ko dekha, woh bhaagkar uske paas gaya aur use jhukkar pranam kiya.+
7 fir usne zor se chillakar kaha, “hey yeeshu, param-pradhan parmeshvar ke bete, mera tujhse kya lena-dena? main parmeshvar ki shapath dharakar tujhse kehta hoon, mujhe mat tadpa.”+
8 usne aisa isliye kaha kyonki yeeshu usse kah raha tha, “hey dusht swargdoot, is aadmi mein se baahar nikaal jaa.”+
9 magar yeeshu ne usse poochha, “tera naam kya hai?” usne kaha, “mera naam paltan hai kyonki hum bahot saare hain.”
10 aur usne baar-baar yeeshu se binti kee ki woh unhein us ilake se baahar na bheje.+
11 us pahad par sooaron+ ka ek bada jhund char raha tha.+
12 isliye dusht swargdooton ne usse binti ki, “hamein un sooaron mein bhej de taaki hum unmein sama jaayen.”
13 usne unhein jaane ki ijazat di. tab dusht swargdoot us aadmi mein se baahar nikaal gaye aur un sooaron mein sama gaye aur kareeb 2,000 sooaron ka woh poora jhund tezee se dauda aur pahad ki kagar se neeche jheel mein jaa gira aur saare sooar doobkar mar gaye.
14 magar unhein charanevale vahaan se bhaag gaye aur unhonne shehar aur dehat mein jaakaar iski khabar di. aur log dekhne aaye ki vahaan kya hua tha.+
15 woh yeeshu ke paas aaye aur unhonne dekha ki woh aadmi jo dusht swargdoot ke kabze mein tha, vahaan baitha hua hai. yah vahi aadmi tha jismein pehale paltan samayi hui thi. ab woh kapde pehne hai aur uski dimagi haalaat theek ho gayi hai. aur log bahot dar gaye.
16 jinhonne yah sab apni aankhon se dekha tha, unhonne logon ko bataya ki jo aadmi dusht swargdooton ke kabze mein tha uske saath yah sab kaise hua aur sooaron ka kya haal hua.
17 isliye woh yeeshu se binti karne lage ki woh unke ilake se chala jaaye.+
18 jab yeeshu naav par chadh raha tha, to woh aadmi jismein pehale dusht swargdoot samaya tha, usse binti karne laga ki woh use apne saath aane de.+
19 magar yeeshu ne use nahin aane diya balki usse kaha, “apne ghar chala jaa aur apne rishtedaron ko bata ki yahova* ne tere liye kya-kya kiya aur tujh par kitni daya ki hai.”
20 tab woh aadmi vahaan se chala gaya aur dikapulis* mein un saare kaamon ka ailan karne laga jo yeeshu ne uske liye kiye the aur sab log taajjub karne lage.
21 jab yeeshu naav se is paar lauta, to ek badi bheed uske paas jama ho gayi.+ woh jheel ke kinare tha.
22 vahaan sabha-ghar ka ek adhikari aaya jiska naam yaair tha. jaise hi usne yeeshu ko dekha woh uske pairon par gir pada.+
23 woh baar-baar usse minnat karne laga, “meri bachchi ki haalaat bahot kharab hai.* meharbani karke mere saath chal aur us par apne haath rakh+ taaki woh achhi ho jaaye aur jeeti rahe.”
24 tab yeeshu uske saath chal diya. ek badi bheed uske peechhe thi aur log us par gire jaa rahe the.
25 vahaan ek aisi aurat thi jise 12 saal se khoon behene ki beemari thi.+
26 usne kai vaidyon se ilaj karva-karvakar bahot dukh uthaya tha aur uske paas jo kuch tha, woh sab kharch karne ke baad bhi woh theek nahin hui, ulta uski haalaat aur zyada bigaad gayi thi.
27 jab usne yeeshu ke baare mein charcha suni, to woh bheed mein uske peechhe se aayi aur uske kapde ko chhua+
28 kyonki woh kehti thi, “agar main uske kapde ko hi chhoo loon, to achhi ho jaaungi.”+
29 usi ghadi uska khoon behena band ho gaya aur usne mehsoos kiya ki uske shareer ki woh dardnak beemari theek ho gayi hai.
30 usi ghadi yeeshu ne jaan liya ki uske andar se shakti nikli hai+ aur usne bheed mein peechhe mudkar kaha, “mere kapdon ko kisne chhua?”+
31 magar chelon ne kaha, “tu dekh raha hai ki bheed tujhe kaise dabaye jaa rahi hai, fir bhi tu kah raha hai, ‘mujhe kisne chhua?’”
32 lekin yeeshu chaaron taraf dekhne laga ki kisne aisa kiya hai.
33 tab woh aurat, yah jaante huye ki woh theek ho gayi hai, darti-kaanpti hui aayi aur uske aage gir padi aur use sabkuch sach-sach bata diya.
34 yeeshu ne usse kaha, “beti, tere vishvas ne tujhe theek kiya hai. jaa, ab aur chinta mat karna.+ yah dardnak beemari tujhe fir kabhi na ho.”+
35 jab woh bol hi raha tha, to sabha-ghar ke adhikari ke ghar se kuch aadmi aaye aur kehne lage, “teri beti mar gayi! ab guru ko aur kyon pareshan karein?”+
36 magar jab unki baatein yeeshu ke kaanon mein padin, to usne sabha-ghar ke adhikari se kaha, “dar mat, bas vishvas rakh.”+
37 fir usne patras, yakub aur uske bhaai yuhanna ke siva kisi aur ko apne saath nahin aane diya.+
38 jab woh sabha-ghar ke adhikari ke ghar pahunche, to usne dekha ki vahaan kaafi hohalla macha hai. log zor-zor se ro rahe hain, maatam mana rahe hain.+
39 yeeshu ne andar jaane ke baad unse kaha, “tum kyon ro rahe ho aur hohalla macha rahe ho? bachchi mari nahin balki so rahi hai.”+
40 yah sunkar woh uski khilli udane lage. magar yeeshu ne un sabko baahar bhej diya aur ladki ke maa-baap aur apne saathiyon ko lekar woh andar gaya jahaan ladki thi.
41 fir yeeshu ne bachchi ka haath pakadkar kaha, “taleeta koomi,” jiska matlab hai, “bachchi, main tujhse kehta hoon, uth!”+
42 usi vakt woh ladki uthkar chalne-firne lagi. (woh 12 saal ki thi.) yah dekhkar unki khushi ka thikana na raha.
43 magar yeeshu ne baar-baar unhein sakhti se kaha* ki woh is baare mein kisi ko na batayen+ aur fir kaha ki ladki ko kuch khaane ke liye diya jaaye.
kai footnote
^ ya “smarak kabraon.”
^ ya “das shehron ka ilaka.”
^ ya “marne par hai.”
^ ya “kada aadesh diya.”