markus ke mutabik khushkhabri 8:1-38
8 un dinon jab ek baar fir ek badi bheed jama thi aur unke paas khaane ko kuch nahin tha, to yeeshu ne chelon ko bulakar kaha,
2 “mujhe is bheed par taras aa raha hai+ kyonki inhein mere saath rehte huye teen din beet chuke hain aur inke paas khaane ko kuch bhi nahin hai.+
3 agar main inhein bhookha hi ghar bhej doon, to woh raaste mein past ho jaayenge. inmein se kuch to bahot door se aaye hain.”
4 magar chelon ne usse kaha, “yahaan is sunsan jagah par koi kahaan se itni rotiyaan laayega ki ye ji-bharkar khaa sakein?”
5 tab yeeshu ne unse poochha, “tumhare paas kitni rotiyaan hain?” unhonne kaha, “saat.”+
6 fir usne bheed ko zameen par aaram se baithne ke liye kaha. usne saaton rotiyaan lin aur prarthna mein dhanyavad diya, fir woh unhein todkar apne chelon ko dene laga ki woh unhein baant dein. tab chelon ne rotiyaan logon mein baant di.+
7 unke paas kuch chhoti machhliyaan bhi thi. usne machhliyon ke liye prarthna mein dhanyavad diya aur chelon se kaha ki inhein bhi baant dein.
8 tab logon ne ji-bharkar khaaya aur bache huye tukde ikatthe kiye jinse saat bade tokre bhar gaye.+
9 khaanevalon mein aadmiyon ki ginti kareeb 4,000 thi. fir usne unhein vida kiya.
10 woh fauran apne chelon ke saath naav par chadh gaya aur dalmnoota ke ilake mein aaya.+
11 vahaan fareesi aaye aur usse behas karne lage. woh yeeshu ki pareeksha lene ke liye usse maang karne lage ki woh swarg se koi chinh dikhaye.+
12 tab woh man-hi-man bahot dukhi hua aur usne kaha, “yah peedhi kyon hamesha chinh dekhna chahti hai?+ main sach kehta hoon, is peedhi ko koi chinh nahin diya jaayega.”+
13 yah kehne ke baad woh unhein chhodkar dobara naav par chadh gaya aur us paar chala gaya.
14 chele apne saath rotiyaan lena bhool gaye the aur naav mein unke paas ek roti ko chhod aur kuch nahin tha.+
15 yeeshu ne unhein saaf shabdon mein yah chetavni di, “apni aankhein khuli rakho aur fareesiyon ke khameer aur herodes ke khameer se chaukanne raho.”+
16 tab woh ek-doosre se behas karne lage ki woh apne saath rotiyaan kyon nahin laaye.
17 yah dekhkar yeeshu ne unse kaha, “tum is baat par kyon behas kar rahe ho ki tumhare paas rotiyaan nahin hain? kya tum ab bhi nahin jaan paaye aur iske maayne nahin samajh paaye? kya tumhare man ab bhi samajhne mein mand hain?
18 ‘kya aankhein hote huye bhi tum nahin dekhte aur kaan hote huye bhi nahin sunte?’ kya tumhein yaad nahin,
19 jab mainne 5,000 aadmiyon ke liye paanch rotiyaan+ todin, tab tumne kitni tokriyon mein tukde ikatthe kiye?” unhonne kaha, “baarah.”+
20 “jab mainne 4,000 aadmiyon ke liye saat rotiyaan todin, tab tumne tukdon se bhare jo bade tokre uthaye the unki ginti kya thi?” unhonne kaha, “saat.”+
21 tab yeeshu ne unse kaha, “kya tum ab bhi meri baat nahin samajh paaye?”
22 ab woh baitsaida aaye. yahaan log uske paas ek andhe aadmi ko laaye aur usse binti karne lage ki woh use chhuye.+
23 woh andhe aadmi ka haath pakadkar use gaanv ke baahar le gaya. usne uski aankhon par thookkar+ apne haath us par rakhe aur usse poochha, “kya tujhe kuch dikhayi de raha hai?”
24 us aadmi ne oopar dekha aur kaha, “mujhe log dikhayi to de rahe hain, magar aise lag rahe hain jaise chalte-firte ped hon.”
25 yeeshu ne dobara us aadmi ki aankhon par haath rakhe aur tab use saaf dikhne laga. uski aankhon ki raushni laut aayi aur use sabkuch saaf-saaf dikhne laga.
26 tab yeeshu ne use ghar bhej diya aur kaha, “is gaanv mein mat jaana.”
27 yeeshu aur uske chele ab kaisariya filippi ke gaanvon mein jaane ke liye nikaal pade. raaste mein woh apne chelon se poochhne laga, “log mere baare mein kya kehte hain, main kaun hoon?”+
28 unhonne kaha, “kuch kehte hain, yuhanna baptisma denevala,+ doosre kehte hain eliyah+ aur kuch kehte hain tu bhavishyavaktaon mein se ek hai.”
29 fir usne yahi saval chelon se poochha, “lekin tum kya kehte ho, main kaun hoon?” patras ne javab diya, “tu maseeh hai.”+
30 tab usne unhein sakhti se kaha ki kisi ko uske baare mein na batayen.+
31 fir woh chelon ko batane laga ki insan ke bete ko kai takaleefein sahni padeingi aur mukhiya, pradhan yaajak aur shaastri use thukra deinge aur woh maar daala jaayega.+ fir teen din baad woh zinda ho jaayega.+
32 woh yah baat unhein saaf-saaf bata raha tha. magar patras use alag le gaya aur jhidakne laga.+
33 tab yeeshu ne mudkar apne chelon ki taraf dekha aur patras ko jhidka, “are shaitan, mere saamne se door ho jaa!* kyonki teri soch parmeshvar jaisi nahin, balki insanon jaisi hai.”+
34 ab usne bheed ko apne chelon samet paas bulaya aur unse kaha, “agar koi mere peechhe aana chahta hai, to woh khud se inkar kare aur apna yaatna ka kaath* uthaye aur mere peechhe chalta rahe.+
35 kyonki jo koi apni jaan* bachana chahta hai woh use khoyega, magar jo koi meri aur khushkhabri ki khaatir apni jaan* ganvata hai woh use bachayega.+
36 vaakai, agar ek insan saari duniya haasil kar le magar apni jaan* ganva baithe, to use kya faayda?+
37 insan apni jaan* ke badle bhala kya de sakta hai?+
38 jo koi is vishvasghati* aur paapi peedhi ke saamne mera chela hone aur mere vachnon par vishvas karne mein sharminda mehsoos karta hai, use insan ka beta bhi us vakt sweekar karne mein sharminda mehsoos karega,+ jab woh apne pita se mahima paakaar pavitra swargdooton ke saath aayega.”+
