nahemayah 13:1-31
13 us din logon ko moosa ki kitab se padhkar sunaya gaya.+ usmein likha hua tha ki koi bhi ammoni ya moabee+ sachche parmeshvar ki mandli ka hissa nahin ban sakta.+
2 kyonki unhonne israeliyon ko na to roti di, na hi paani. ulta unhein shaap dene ke liye unhonne bilam ko paise dekar bulaya.+ lekin hamare parmeshvar ne uske shaap ko aasheervad mein badal diya.+
3 jab logon ne kaanoon ki ye baatein sunin, to woh fauran apne beech se un logon ko alag karne lage jo gair-israeli* the.+
4 un dinon, yaajak elyasheeb+ hamare parmeshvar ke bhavan* ke bhandaron ki dekhrekh karta tha.+ woh tobyah+ ka rishtedar tha.
5 usne tobyah ko bhandar ka ek bada kamra de rakha tha, jismein pehale anaj ka chadhava, loban aur bartan rakhe jaate the. saath hi jahaan leviyon, gaaykon aur pehredaron ke liye anaj, nayi daakh-madira aur tel ka dasvaan hissa+ aur yaajkon ke liye daan bhi jama kiya jaata tha.+
6 jab yah sab hua tab main yarooshalem mein nahin tha kyonki baibilon ke raja artashatra ke raaj+ ke 32vein saal mein,+ main vaapas uske paas chala gaya tha. thode samay baad mainne raja se yarooshalem lautne ke liye kuch dinon ki chhutti maangi.
7 fir jab main yarooshalem aaya to mainne dekha ki elyasheeb+ ne sachche parmeshvar ke bhavan ke aangan mein tobyah+ ko bhandar ka ek kamra diya hua hai. elyasheeb ke is ghinaune kaam par
8 mujhe bahot gussa aaya. mainne kamre se tobyah ka saara saaman nikaalkar baahar feink diya.
9 iske baad meri aagya par bhandar ke kamron ko shuddh kiya gaya aur mainne sachche parmeshvar ke bhavan ke bartan, anaj ka chadhava aur loban+ vaapas vahaan rakhva diya.+
10 mujhe yah bhi pata chala ki leviyon ko unka hissa+ nahin diya jaa raha hai,+ isliye levi aur gaayak apni seva chhodkar kheton mein kaam kar rahe hain.+
11 mainne adhikariyon* ko jhidka,+ “sachche parmeshvar ke bhavan ke liye aisi laaparvahi kyon dikhayi jaa rahi hai?”+ fir mainne un sabhi leviyon ko ikattha kiya aur unhein bhavan mein dobara apni-apni seva ke pad par thehraya.
12 tab yahooda se sabhi log anaj, nayi daakh-madira aur tel ka dasvaan hissa+ laakaar bhandaron mein jama karne lage.+
13 mainne un bhandaron par yaajak shelemyah, nakaal-navees* saadok aur leviyon mein se padayah ko adhikari thehraya. aur unki madad ke liye mainne haanan ko thehraya, jo jakkoor ka beta aur mattanyah ka pota tha. ye sabhi bade bharosemand the aur unhein apne bhaaiyon ko unka hissa baantne ki zimmedari di gayi.
14 hey mere parmeshvar, mera yah kaam yaad rakhna!+ tere bhavan aur usmein seva* karnevalon ke liye mainne apne atal pyar ka jo saboot diya hai, use mat bhoolna.+
15 un dinon mainne dekha ki yahooda mein log sabt ke din haud mein angoor raund rahe hain,+ anaj ke gatthar gadhon par laad rahe hain. saath hi, daakh-madira, angoor, anjeer aur tarah-tarah ka bojh dho-dhokar yarooshalem laa rahe hain.+ mainne unhein khabardar kiya ki woh sabt ke din in cheezon ko na bechein.*
16 yarooshalem mein rehnevale sor ke log sabt ke din machhliyaan aur tarah-tarah ka maal shehar mein laakaar yahoodiyon ko bech rahe the.+
17 tab mainne yahooda ke bade-bade logon ko jhidka, “ye tum kya dushtata kar rahe ho? sabt ke din ko apavitra kar rahe ho!
18 kya tumhare purkhon ne bhi yahi galti nahin ki thi, jis vajah se parmeshvar hum par aur is shehar par museebatein laaya tha? ab tum bhi sabt ko apavitra karke+ israel par parmeshvar ki jaljalahat laana chahte ho?”
19 jaise hi shehar ke faatkon par andhera chhaane laga aur sabt ka din shuroo honevala tha, mainne aagya di ki yarooshalem ke faatak band kar diye jaayen aur tab tak band rakhe jaayen, jab tak sabt khatm nahin ho jaata. mainne vahaan apne kuch sevak bhi tainat kiye ki woh sabt ke din kisi bhi tarah ka maal shehar ke andar na aane dein.
20 isliye len-den karnevalon aur tarah-tarah ka maal bechnevalon ne ek-do baar yarooshalem ke baahar raat bitayi.
21 mainne unhein khabardar kiya aur kaha, “tum log kyon poori-poori raat sheharpanah ke saamne baithe rehte ho? agar aainda tum sabt ke din nazar aaye, to mujhe tumhare saath zabardasti karni padegi.” iske baad se unhonne sabt ke din aana band kar diya.
22 mainne leviyon ko aagya di ki woh niyamit taur par khud ko shuddh karein aur sabt ke din ko pavitra rakhne+ ke liye shehar ke faatkon par pehra dein. hey mere parmeshvar, mera yah kaam bhi tu yaad rakhna! aur mujh par reham karna kyonki tu atal pyar se bharpoor hai.+
23 un dinon mujhe yah bhi pata chala ki kuch yahoodiyon ne ashdodi,+ ammoni aur moabee+ aurton se shaadi kar li hai.*+
24 unke aadhe bachche ashdodi bhasha aur doosre desh ki bhaashayen bolte the, magar unmein se kisi ko yahoodi bhasha nahin aati thi.
25 isliye mainne un yahoodiyon ko jhidka aur zabardast fatkaar lagayi. mainne unmein se kuch ko pitvaya,+ unke sir ke baal nuchvaye aur unse kaha, “parmeshvar ke saamne shapath khaao ki tum unki betiyonn se shaadi nahin karoge aur na hi apne bete-betiyonn ki shaadi unke bete-betiyonn se karvaoge.+
26 kya isi vajah se israel ke raja sulaiman ne paap nahin kiya tha? saare raashtron mein uske jaisa raja koi nahin tha.+ parmeshvar ne sulaiman ko poore israel par raja thehraya kyonki woh usse pyar karta tha.+ magar doosre deshon se aayi sulaiman ki patniyon ne use behka diya aur usse paap karvaya.+
27 aur ab tum bhi doosre deshon ki aurton se shaadi karke apne parmeshvar ke saath vishvasghat kar rahe ho.+ yah kitni ghinauni baat hai!”
28 mahayajak elyasheeb+ ke bete yoyada+ ke beton mein se ek ne horon ke rehnevale sanballat+ ki beti se shaadi kar li thi isliye mainne use apne paas se khaded diya.
29 hey mere parmeshvar, tu un logon ko mat bhoolna kyonki unhonne yaajakpad dooshit kiya hai aur yaajkon aur leviyon ke saath apna karar toda hai.+
30 iske baad mainne unhein paraye logon ke har bure asar se chhudakar shuddh kiya. aur sabhi yaajkon aur leviyon ko unke apne-apne kaam par vaapas thehraya.+
31 mainne yah intazam bhi kiya ki parmeshvar ke bhavan mein kab-kab lakdiyaan laayi jaayen+ aur fasal ki pehali upaj arpit ki jaaye.
hey mere parmeshvar, mujhe yaad rakhna aur mujh par kripa karna.*+
kai footnote
^ kuch log shaayad israeli aur gair-israeli maa-baap se paida huye the.
^ ya “mandir.”
^ ya “maathat adhikariyon.”
^ ya “shaastri.”
^ ya “uski dekhrekh.”
^ ya shaayad, “us din unhein khabardar kiya ki woh in cheezon ko na bechein.”
^ ya “ko apne ghar le aaye.”
^ ya “aur mera bhala karna.”
