nahemayah 6:1-19
6 ab sanballat, tobyah,+ arab ke rehnevale geshem+ aur hamare baaki dushmanon ko yah pata chala ki mainne poori sheharpanah bana li hai+ aur saare toote huye hisson ki marammat kar di hai (haalanki us samay tak mainne faatkon ke palle nahin lagaye the).+
2 tab sanballat aur geshem ne turant mujhe yah sandesh bheja, “hum tujhse milna chahte hain. kyon na hum ek samay tay karein aur ono+ ke maidan mein base ek gaanv mein milein?” magar unka irada mujhe nuksan pahunchne ka tha.
3 isliye mainne apne aadmi bhejkar unse kaha, “main bahot zaroori kaam mein laga hoon, main tumhare paas nahin aa sakta. agar main aaya, to yah kaam ruk jaayega.”
4 unhonne chaar baar mujhe yahi sandesh bhijvaya aur har baar mera vahi javab tha.
5 tab sanballat ne paanchvin baar usi sandesh ke saath apna sevak bheja. uske haath mein ek khuli chitthi thi.
6 usmein likha tha, “logon mein yah charcha ho rahi hai aur geshem+ ka bhi kehna hai ki tu aur tere yahoodi log raja se bagavat karne ki soch rahe hain,+ iseeliye tu yah sheharpanah bana raha hai. yah bhi sunnae mein aaya hai ki tu yahoodiyon ka raja banna chahta hai.
7 toone apne liye bhavishyavakta bhi thehraye hain, jo poore yarooshalem mein tere baare mein yah ailan kar rahe hain, ‘yahooda mein ek naya raja aaya hai.’ ye baatein raja tak pahunch hi jaayengi. isliye aa, hum is maamle par baat karein aur ise suljhayen.”
8 lekin mainne use yah javab diya, “jo kuch toone kaha woh sarasar jhooth hai. ye sab tere man ki gadhi hui baatein hain.”
9 darasal yah hamein darane ke liye kiya gaya tha. unhein laga ki agar hamare haath dheele pad jaayen, to hamara kaam dhara-ka-dhara reh jaayega.+ isliye hey parmeshvar, mere haathon ko mazboot kar.+
10 fir main shamayah ke ghar gaya jo dalayah ka beta aur mahetbel ka pota tha. shamayah apne ghar mein chhipkar baitha tha. usne mujhse kaha, “dushman tujhe maarne aa rahe hain. aa, hum tay karein ki hum kis vakt sachche parmeshvar ke bhavan mein, mandir ke andar mileinge. hum mandir ke darvaze band kar leinge aur chhip jaayenge. dekh! aaj raat hi woh tujhe maarne aa rahe hain.”
11 lekin mainne kaha, “kya main koi darpok hoon jo bhaagkar chhip jaaun? aur agar mujh jaisa aam aadmi mandir ke andar gaya, to kya maara nahin jaayega?+ nahin! main mandir ke andar nahin jaaunga.”
12 main samajh gaya ki shamayah parmeshvar ki taraf se nahin bol raha hai, woh tobyah aur sanballat+ ke haath bik chuka hai.
13 unke kehne par usne mujhe darane ki koshish ki aur mujhse paap karvana chaha taaki dushmanon ko mere naam par keechad uchhalne aur mujh par dosh lagane ka mauka mil jaaye.
14 hey mere parmeshvar, tujhse binti hai ki tu tobyah+ aur sanballat ke bure kaamon ko mat bhoolna. aur bhavishyavaktin noadyah aur baaki bhavishyavaktaon ne baar-baar mujhe darane ki jo koshish ki, use bhi mat bhoolna.
15 elool* maheene ke 25vein din sheharpanah bankar taiyar ho gayi. use banane mein kul 52 din lage.
16 jab hamare dushmanon aur aas-paas ke deshon ke logon ko yah khabar mili, to woh bahot sharminda huye.*+ aur woh jaan gaye ki hamare parmeshvar ki madad se hi hum yah kaam poora kar paaye hain.
17 un dinon yahooda ke bade-bade log+ tobyah ko bahot-se khat likhte the aur tobyah bhi unki chitthiyon ka javab diya karta tha.
18 kai yahoodiyon ne tobyah ka saath dene ki kasam khaayi hui thi kyonki woh aarah ke bete+ shakanyah ka daamad tha. aur tobyah ke bete yahohanan ne bhi berekyah ke bete mashullam+ ki beti se shaadi ki thi.
19 ye yahoodi hamesha mujhse tobyah ke baare mein achhi-achhi baatein karte the aur main unse jo bhi kehta tha uski khabar woh turant tobyah ko de dete the. aur fir tobyah mujhe darane ke liye khat bhejta tha.+
