nirgaman 24:1-18
24 fir usne moosa se kaha, “tu apne saath haaroon, naadab aur abeehoo+ aur israel ke mukhiyaon mein se 70 aadmiyon ko lekar pahad par jaa aur tum log kuch door khade rehkar yahova ko dandvat karna.
2 fir moosa akela hi yahova ke paas jaaye, magar woh aadmi na jaayen. aur baaki log bhi moosa ke saath na jaayen.”+
3 iske baad moosa ne aakaar logon ko woh saari baatein batayin jo yahova ne kahi thi aur saare nyay-siddhaant sunaye.+ tab sab logon ne ekmat hokar kaha, “yahova ne jo-jo kaha hai, woh sab karna hamein manzoor hai.”+
4 fir moosa ne woh saari baatein likh daalin jo yahova ne usse kahi thi.+ fir woh subah tadke utha aur usne pahad ke neeche ek vedi banayi aur israel ke 12 gotron ke liye yaadgar ke taur par 12 patthar khade kiye.
5 iske baad usne kuch javan israeli aadmiyon ko bheja aur unhonne yahova ke liye hom-baliyaan chadhayin aur bailon ki shaanti-bali arpit ki.+
6 fir moosa ne un jaanvaron ke khoon mein se aadha khoon lekar katoron mein daala aur aadha khoon vedi par chhidak diya.
7 tab moosa ne karar ki kitab li aur use logon ke saamne padhkar sunaya.+ unhonne kaha, “yahova ne jo-jo kaha hai, woh sab hum kareinge aur uski har aagya maaneinge.”+
8 tab moosa ne woh khoon lekar logon par chhidka+ aur kaha, “tumne is kitab mein likhi baaton ko maanne ki haami bhari hai isliye dekho, yahova ne tumhare saath jo karar kiya hai use yah khoon pakka karta hai.”+
9 fir moosa aur haaroon, naadab aur abeehoo aur israel ke mukhiyaon mein se 70 aadmi pahad par gaye.
10 vahaan unhonne israel ke parmeshvar ko dekha.+ uske pairon ke neeche neelam ke farsh jaisa kuch dikhayi diya, jo swarg-saa shuddh aur nirmal tha.+
11 parmeshvar ne un khaas aadmiyon ko kuch nahin kiya+ aur unhonne sachche parmeshvar ka ek darshan dekha aur khaaya-peeya.
12 yahova ne ab moosa se kaha, “tu yahaan pahad ke oopar mere paas aa aur yahin reh. main tujhe patthar ki patiyayen doonga jin par main apna kaanoon aur apni aagyayen likhoonga taaki ye logon ko sikhayi jaayen.”+
13 tab moosa apne sevak yahoshoo ke saath gaya+ aur moosa sachche parmeshvar ke pahad ke oopar chadha.+
14 moosa ne israel ke mukhiyaon se kaha tha, “jab tak hum donon lautkar nahin aate, tum sab yahin hamara intazar karna.+ haaroon aur hoor+ tumhare saath raheinge. agar kisi ka koi mukadma ho to woh un donon ke paas jaaye.”+
15 fir moosa pahad ke oopar chadha jiski choti baadal se dhaki hui thi.+
16 yahova ki mahima ka tej+ seenai pahad+ par bana raha aur chhe din tak pahad baadal se dhaka raha. fir saatvein din parmeshvar ne baadal mein se moosa ko pukara.
17 pahad ke neeche jo israeli dekh rahe the, unhein yahova ki mahima ka tej aisa dikhayi de raha tha maano pahad ki choti par aag dhadhak rahi ho.
18 fir moosa baadal ke andar gaya aur pahad par chadha.+ woh 40 din aur 40 raat vahin pahad par raha.+
