nirgaman 32:1-35
32 is beech jab logon ne dekha ki moosa pahad se neeche aane mein der laga raha hai,+ to woh sab haaroon ke paas jama ho gaye aur usse kehne lage, “pata nahin us moosa ka kya hua, jo hamein misra se nikaalkar yahaan le aaya tha. isliye ab hamari aguvai ke liye tu ek devta bana de.”+
2 is par haaroon ne unse kaha, “tum sab apni patniyon aur bete-betiyonn ki sone ki baaliyaan+ nikaalkar mere paas le aao.”
3 fir un sabne jaakaar apne beevi-bachchon ki sone ki baaliyaan nikaalin aur laakaar haaroon ko de di.
4 haaroon ne woh sona liya aur nakkashi karnevale auzar se ek bachhde ki moorat* taiyar ki.+ fir log kehne lage, “hey israel, yahi tera parmeshvar hai jo tujhe misra desh se baahar le aaya hai.”+
5 jab haaroon ne yah dekha to usne bachhde ke saamne ek vedi banayi. fir usne ailan kiya: “kal yahova ke liye ek tyohar hoga.”
6 agle din log subah tadke uthe aur hom-baliyaan chadhane aur shaanti-baliyaan arpit karne lage. iske baad logon ne baithkar khaaya-peeya. fir woh uthkar mauj-masti karne lage.+
7 ab yahova ne moosa se kaha, “tu neeche jaa kyonki tere logon ne, jinhein tu misra se nikaal laaya hai, khud ko bhrasht kar liya hai.+
8 mainne unhein jis raah par chalne ki aagya di thi, woh usse kitni jaldi bhatakkar door chale gaye hain.+ unhonne apne liye bachhde ki moorat* bana li hai aur woh uske aage dandvat kar rahe hain aur baliyaan chadhakar keh rahe hain, ‘hey israel, yahi tera parmeshvar hai jo tujhe misra se baahar nikaal laaya hai.’”
9 yahova ne moosa se yah bhi kaha, “main dekh sakta hoon ki ye log kitne dheeth hain.+
10 isliye ab tu mujhe mat rok. mere krodh ki jvala unhein bhasm karke hi rahegi. aur main unke badle tujhse ek bada raashtra banaunga.”+
11 tab moosa ne apne parmeshvar yahova se fariyad ki,+ “hey yahova, tu kyon apne logon par itna bhadak raha hai? tu kitne bade-bade ajoobe karke apne shaktishali haath se unhein misra se nikaalkar laaya hai. ab tu kyon unhein mita dena chahta hai?+
12 kyon misriyon ko yah kehne ka mauka mile, ‘woh unka bura karne ke irade se hi unhein yahaan se le gaya. woh unhein isliye le gaya ki unhein pahadon par le jaakaar maar daale aur dharti se unka naamo-nishan mita de.’+ isliye tu shaant ho jaa aur apne logon par kehar laane ke faisle par dobara gaur kar.*
13 zara apne sevak abraham, ishaak aur israel ko yaad kar. toone apni shapath khaakaar unse kaha tha, ‘main tumhare vansh ko itna badhaunga ki woh aasman ke taaron jaisa anginat ho jaayega.+ aur yah saara desh main tumhare vansh ko doonga jo mainne uske liye tay kiya hai taaki yah desh hamesha ke liye uski jaageer ho jaaye.’”+
14 tab yahova ne apne logon par kehar laane ki baat par dobara gaur kiya.*+
15 tab moosa vahaan se muda aur apne haath mein gavahi ki donon patiyayen liye pahad se neeche utra.+ in patiyaon par aage-peechhe, donon taraf likha hua tha.
16 ye patiyayen khud parmeshvar ne banayi thi aur usi ne un par khudai karke likha tha.+
17 jab yahoshoo ne logon ka shorgul suna to usne moosa se kaha, “chhaavni se yuddh ka shor sunayi de raha hai.”
18 magar moosa ne kaha,
“yah gaane ki aavaz na kisi jeet ke jashna ki hai,*na hi haar ke gam ka haahakar hai,mujhe to ek alag kism ka gaana-bajana sunayi de raha hai.”
19 chhaavni ke paas pahunchte hi jab moosa ne dekha ki vahaan ek bachhde ki moorat hai+ aur log naach-gaa rahe hain, to woh aag-baboola ho gaya. usne maare gusse ke donon patiyayen zameen par patak di aur woh patiyayen pahad ke neeche choor-choor ho gayin.+
20 usne unka banaya bachhda liya aur use aag mein jala diya aur choor-choor kar daala.+ fir usne woh choora paani par bikhra diya aur woh paani israeliyon ko pila diya.+
21 moosa ne haaroon se kaha, “aakhir logon ne tere saath aisa kya kiya ki toone unko itne bade paap mein fansaya?”
22 haaroon ne kaha, “maalik, mujh par bhadak na jaana. tu to achhi tarah jaanta hai ki in logon ka man hamesha burai ki taraf jhuka rehta hai.+
23 woh mere paas aakaar kehne lage, ‘pata nahin us moosa ka kya hua, jo hamein misra se nikaalkar yahaan le aaya tha. isliye ab hamari aguvai ke liye tu ek devta bana de.’+
24 tab mainne unse kaha, ‘tummein se jis-jiske paas sona hai, woh laakaar mujhe de de.’ fir jab mainne woh sona aag mein daala, to usse ek bachhda taiyar ho gaya.”
25 moosa ne dekha ki logon ne had kar di hai kyonki haaroon ne unhein aisa karne ki chhoot de di thi aur is vajah se woh apne dushmanon ke saamne sharminda ho gaye hain.
26 moosa chhaavni ke dvar par apni jagah khada ho gaya aur usne kaha, “tummein se kaun-kaun yahova ki taraf hai? woh mere paas aa jaaye!”+ tab sabhi levi moosa ke paas aakaar jama ho gaye.
27 moosa ne unse kaha, “israel ke parmeshvar yahova ne kaha hai, ‘tummein se har koi apni talvar baandh le aur poori chhaavni mein ghoomkar harek dvar par jaaye aur apne bhaai, padosi aur kareebee dost ko maar daale.’”+
28 tab leviyon ne theek vahi kiya jo moosa ne unse kaha tha. us din kareeb 3,000 aadmi maare gaye.
29 fir moosa ne un leviyon se kaha, “aaj ke din tum sab yahova ki seva ke liye khud ko alag karo.* tum apne beton aur bhaaiyon ke khilaf jaane ke liye taiyar ho gaye,+ isliye aaj parmeshvar tumhein aasheesh dega.”+
30 fir agle hi din moosa ne logon se kaha, “tum logon ne bahot bada paap kiya hai. ab main jaakaar yahova ko manane ki koshish karoonga. ho sakta hai woh tumhare paap maaf kar de.”+
31 tab moosa yahova ke paas dobara aaya aur usse kehne laga, “logon ne apne liye sone ka devta banakar vaakai bahot bada paap kiya hai!+
32 fir bhi ho sake to unka paap maaf kar de.+ agar nahin, to meri binti hai ki tu apni kitab se mera naam mita de.”+
33 magar yahova ne moosa se kaha, “jis kisi ne mere khilaf paap kiya hai, main uska naam apni kitab se mita doonga.
34 ab tu jaa aur logon ki aguvai karke unhein us jagah le jaa jiske baare mein mainne tujhe bataya hai. dekh, mera swargdoot tere aage-aage jaayega.+ aur jis din main logon se unke paap ka hisab loonga us din main unhein saza doonga.”
35 fir yahova logon par kehar dhaane laga kyonki unhonne haaroon se bachhde ki moorat banvayi thi.
kai footnote
^ ya “dhali hui moorat.”
^ ya “dhali hui moorat.”
^ ya “pachhtava mehsoos kar.”
^ ya “pachhtava mehsoos kiya.”
^ ya “mahan kaam ki khushi mein hai.”
^ shaa., “apne haath bhar lo.”
