nirgaman 7:1-25
7 tab yahova ne moosa se kaha, “dekh, main tujhe firaun ke liye parmeshvar jaisa banata hoon. aur tera apna bhaai haaroon tera bhavishyavakta thehrega.+
2 tu apne bhaai haaroon ko woh saari baatein batana jinki main tujhe aagya doonga aur haaroon firaun se baat karega. aur firaun israeliyon ko apne desh se bhej dega.
3 main firaun ke dil ko kathor hone doonga+ aur misra mein bahot saare chinh aur chamatkar dikhaunga.+
4 fir bhi firaun tumhari baat nahin maanega, isliye main apna haath misra par uthaunga aur use kadi-se-kadi saza doonga aur apni badi bheed* ko, apne logon, israeliyon ko misra se baahar nikaal laaunga.+
5 jab main misra ke khilaf apna haath badhaunga aur unke beech se israeliyon ko nikaal laaunga to misri log har haal mein jaan leinge ki main yahova hoon.”+
6 tab moosa aur haaroon ne yahova ki aagya ke mutabik kaam kiya. unhonne theek vaisa hi kiya.
7 moosa 80 saal ka tha aur haaroon 83 saal ka jab woh donon firaun ke saamne gaye.+
8 iske baad yahova ne moosa aur haaroon se kaha,
9 “agar firaun tumse kahe, ‘mujhe koi chamatkar karke dikhao’ to tu haaroon se kehna, ‘apni chhadi firaun ke saamne zameen par feink.’ tab woh chhadi ek bada saanp ban jaayegi.”+
10 tab moosa aur haaroon firaun ke saamne gaye aur unhonne theek vaisa hi kiya jaisa yahova ne unhein aagya di thi. haaroon ne apni chhadi firaun aur uske sevkon ke saamne zameen par feinki aur woh chhadi ek bada saanp ban gayi.
11 tab firaun ne misra ke gyaaniyon aur tona-totka karnevalon ko bulvaya aur un jaadoo-tona karnevale pujariyon+ ne bhi apni jaadoogari* se vaisa hi chamatkar kar dikhaya.+
12 un sabne apni-apni chhadi zameen par feinki aur unki chhadiyaan bade-bade saanp ban gayin. magar haaroon ki chhadi ne unki chhadiyon ko nigal liya.
13 yah dekhne ke baad bhi firaun ka dil kathor bana raha.+ usne moosa aur haaroon ki baat nahin maani, theek jaise yahova ne kaha tha.
14 tab yahova ne moosa se kaha, “firaun ke dil par koi asar nahin hua hai.+ usne mere logon ko chhodne se inkar kar diya hai.
15 isliye tu ek kaam kar, kal subah firaun ke paas jaa. woh neel nadi ke kinare aayega aur tu usse milne ke liye pehale se vahaan khada reh. tu apne haath mein woh chhadi le jaa jo saanp ban gayi thi.+
16 tu firaun se kehna, ‘ibriyon ke parmeshvar yahova ne mujhe tere paas bheja+ aur tujhse kaha tha, “mere logon ko jaane de taaki woh veerane mein jaakaar meri seva karein,” magar toone abhi tak uski baat nahin maani.
17 isliye ab yahova tujhse kehta hai, “main ek aisa kaam karnevala hoon jisse tu jaan jaayega ki main yahova hoon.+ mere haath mein jo chhadi hai, usse main neel nadi ko maaroonga aur uska paani khoon mein badal jaayega.
18 neel nadi ki saari machhliyaan mar jaayengi aur nadi se badboo aane lagegi aur misri log nadi ka paani nahin pi sakeinge.”’”
19 fir yahova ne moosa se kaha, “haaroon se kehna, ‘tu apni chhadi le aur misra ke nadi-naalon, nehron,* jheelon, daldalon+ aur sabhi taalabon par apna haath badha+ taaki unka saara paani khoon mein badal jaaye.’ poore misra mein har kahin paani ki jagah khoon nazar aayega, yahaan tak ki lakdi aur patthar ke bartanon mein bhi.”
20 tab moosa aur haaroon ne bina der kiye yahova ki aagya ke mutabik kaam kiya. haaroon ne neel nadi ke paas firaun aur uske sevkon ke dekhte apni chhadi uthayi aur paani par maari. tab nadi ka saara paani khoon mein badal gaya.+
21 nadi ki saari machhliyaan mar gayin+ aur nadi se badboo aane lagi. ab misriyon ke liye neel nadi ka paani peena naamumkin ho gaya.+ poore misra mein paani ki jagah khoon-hi-khoon tha.
22 misra ke jaadoo-tona karnevale pujariyon ne bhi apni jaadui kala se vaisa hi chamatkar kiya.+ isliye firaun ka dil kathor hi bana raha. usne moosa aur haaroon ki baat nahin maani, theek jaise yahova ne kaha tha.+
23 iske baad firaun apne ghar laut gaya. is kehar ka bhi uske dil par kuch asar nahin hua.
24 ab misra ke sab log paani ki talash mein neel nadi ke aas-paas khudai karne lage, kyonki woh us nadi ka paani nahin pi sakte the.
25 yahova ne jab neel nadi ko maara to uske baad poore saat din tak yahi haal raha.
