nyayiyon 17:1-13
-
mika ki moortein aur uska yaajak (1-13)
17 epraim ke pahadi pradesh+ mein mika naam ka ek aadmi rehta tha.
2 usne apni maa se kaha, “tujhe yaad hai, tere chaandi ke 1,100 tukde chori ho gaye the aur tu us churanevale ko mere saamne kos rahi thi. woh chaandi mainne li thi.” is par uski maa ne kaha, “yahova tujhe aasheesh de mere bete!”
3 tab usne chaandi ke 1,100 tukde apni maa ko lauta diye. uski maa ne kaha, “yah chaandi main yahova ke liye alag thehrati hoon. main chahti hoon ki tu isse apne liye ek tarashi hui aur ek dhali hui moorat banaye.+ aur yah chaandi teri ho jaayegi.”
4 chaandi milne par, mika ki maa ne usmein se 200 tukde sunar ko diye. usne usse ek tarashi hui aur ek dhali hui moorat bana di. fir un moorton ko mika ke ghar mein sthapit kiya gaya.
5 mika ke yahaan devtaon ke liye ek mandir tha. usne kul devtaon ki moortein+ aur ek epod banvaya+ aur apne ek bete ko yaajak thehraya.*+
6 un dinon israel raashtra mein koi raja nahin tha.+ har koi vahi kar raha tha jo uski nazar mein sahi tha.+
7 yahooda ke betlehem shehar+ mein ek javan aadmi, kuch samay se yahooda ke logon ke saath reh raha tha. woh ek levi tha.+
8 ek din usne betlehem chhod diya aur rehne ke liye doosri jagah dhoondhne laga. dhoondhte-dhoondhte woh epraim ke pahadi pradesh mein mika ke ghar aaya.+
9 mika ne usse poochha, “tu kahaan se aaya hai?” usne kaha, “main yahooda ke betlehem se aaya hoon. main ek levi hoon aur rehne ke liye ek jagah dhoondh raha hoon.”
10 tab mika ne usse kaha, “tu yahin mere saath reh aur mera salahkar* aur yaajak ban jaa. main tujhe khaana, ek jodi kapde aur har saal chaandi ke das tukde diya karoonga.” yah sunkar levi ghar ke andar aaya.
11 woh mika ke saath rehne ko taiyar ho gaya aur mika use apna beta maanne laga.
12 mika ne us levi ko apna yaajak thehraya*+ aur woh mika ke ghar rehne laga.
13 mika ne kaha, “ab yahova zaroor mera bhala karega kyonki ek levi mera yaajak bana hai.”
