nyayiyon 18:1-31
18 un dinon israel mein koi raja na tha.+ israel ke gotron ke beech daan ke logon+ ko virasat mein jo zameen di gayi thi, woh kam pad rahi thi aur woh apne liye aur jagah dhoondhne lage.+
2 isliye unhonne sora aur eshtaol+ se apne gotra ke paanch kaabil aadmiyon ko chuna aur unhein desh ki jaasoosi karne bheja. unhonne kaha, “jaao, desh ki khoj-khabar lekar aao.” tab woh aadmi nikaal pade aur unhonne epraim ke pahadi pradesh mein mika ke ghar raat guzari.+
3 woh mika ke ghar ke paas hi the ki unhein levi ki aavaz* sunayi di aur woh use pehchan gaye. unhonne uske paas jaakaar poochha, “tu yahaan kya kar raha hai? kiske kehne par yahaan aaya hai?”
4 levi ne unhein bataya ki mika ne uske liye kya-kya kiya aur kaha, “usne mujhe yaajak ka kaam karne ke liye rakha hai.”+
5 unhonne levi se kaha, “zara hamare liye bhi parmeshvar se poochh ki hum jis kaam ke liye nikle hain, usmein hum kaamyab honge ya nahin.”
6 levi ne kaha, “befikra hokar jaao. yahova tumhare saath hai.”
7 tab woh paanchon apne safar mein aage badhe aur laish aa pahunche.+ unhonne dekha ki seedoniyon ki tarah yahaan ke log bhi kisi par nirbhar nahin. woh shaanti se ji rahe hain. unhein kisi hamle ka dar nahin+ aur na hi unhein satanevala koi taanashah hai. unka shehar seedon se bahot door hai aur baaki logon se unka koi lena-dena nahin.
8 jab woh aadmi apne bhaaiyon ke paas vaapas sora aur eshtaol aaye+ to unke bhaaiyon ne poochha, “kaho, kya khabar laaye ho?”
9 unhonne javab diya, “woh desh bahot hi badhiya hai. aao hum us par chadhai karein. hamari maano, hum abhi us par kabza kar sakte hain. to ab der kis baat ki!
10 tum khud apni aankhon se dekh lena ki woh desh kitna bada hai! vahaan ke logon ko kisi hamle ka dar nahin.+ parmeshvar ne woh ilaka tumhare haath kar diya hai! usne tumhein aisi jagah di hai jahaan kisi cheez ki kami nahin.”+
11 fir daan gotra se 600 aadmi yuddh ke liye taiyar huye aur sora aur eshtaol se nikaal pade.+
12 woh yahooda mein kiryat-yaareem ke paas gaye aur unhonne vahaan chhaavni daali.+ isliye us jagah ka naam aaj tak mahnedan*+ hai jo kiryat-yaareem ke pashchim mein padti hai.
13 vahaan se woh epraim ke pahadi pradesh ki taraf badhe aur mika ke ghar pahunche.+
14 laish ki jaasoosi karnevale paanch aadmiyon+ ne apne bhaaiyon se kaha, “pata hai, in gharon mein ek epod, ek tarashi hui moorat, ek dhali hui moorat aur kul devtaon ki moortein hain.+ ab tum hi socho ki kya kiya jaaye.”
15 tab woh vahin ruk gaye aur paanch aadmi mika ke ghar ke paas levi ke ghar aaye+ aur uska haal-chaal poochha.
16 is beech daan ke 600 aadmi+ jo yuddh ke liye taiyar the, dvar par hi khade rahe.
17 woh paanch aadmi+ ghar ke andar ghuse taaki epod,+ tarashi hui moorat, dhali hui moorat+ aur kul devtaon ki moortein+ le lein. (yaajak+ un 600 aadmiyon ke saath jo yuddh ke liye taiyar the, dvar par khada tha.)
18 jab woh mika ke ghar se epod, tarashi hui moorat, dhali hui moorat aur kul devtaon ki moortein uthakar le jaa rahe the to us yaajak ne kaha, “yah tum kya kar rahe ho?”
19 unhonne kaha, “khabardar jo ek shabd bhi nikaala to. chupchap hamare saath chal aur hamara salahkar* aur yaajak ban jaa. tu hi soch, kya tu ek hi aadmi ke gharane ka yaajak bane rehna chahta hai?+ ya israel ke ek poore gotra, uske saare kulon ka yaajak banna chahta hai?”+
20 unki baat sunkar yaajak khush ho gaya. usne epod, tarashi hui moorat aur kul devtaon ki moortein lin+ aur un logon ke saath chal diya.
21 daan ke log apne raaste jaane lage aur unhonne apne bachchon, maveshiyon aur keemti cheezon ko sabse aage rakha aur woh khud peechhe-peechhe chale.
22 woh thodi hi door gaye the ki mika aur uske padosi ikattha huye aur daaniyon ke peechhe gaye. daaniyon ke paas pahunchkar
23 unhonne aavaz lagayi. daaniyon ne mudkar mika ko dekha aur usse poochha, “kya hua? tu itne saare logon ko lekar kyon aaya hai?”
24 tab mika ne kaha, “tum mere devtaon ki moortein utha laaye jinhein mainne banvaya tha aur mere yaajak ko bhi apne saath le aaye. mera sabkuch lootkar poochh rahe ho, kya hua?”
25 daaniyon ne kaha, “apni aavaz neechi rakh! kahin hamare aadmiyon ko gussa aa gaya to woh tum par toot padeinge. aur tujhe aur tere gharane ke logon ko jaan se maar daaleinge.”
26 yah kehkar daan ke log apne raaste chal diye. aur mika ulte paanv ghar laut gaya kyonki usne dekha ki daan ke log usse zyada taakatvar hain.
27 daan ke log, mika ki moortein aur uske yaajak ko lekar laish aa pahunche,+ jahaan ke nivasi shaanti se ji rahe the aur unhein kisi hamle ka dar nahin tha.+ daaniyon ne unhein talvar se maar daala aur unke shehar ko jala diya.
28 unhein bachanevala koi na tha kyonki unka shehar seedon se bahot door tha aur baaki logon se unka koi lena-dena na tha. laish, ghaati mein basa tha jo bet-rahob naam ke ilake+ mein aati thi. fir daaniyon ne us shehar ko dobara khada kiya aur usmein bas gaye.
29 unhonne us shehar ka naam badalkar apne purkhe ke naam par daan rakha,+ jo israel ka beta tha.+ lekin us shehar ka purana naam laish tha.+
30 iske baad, daaniyon ne tarashi hui moorat+ ko vahaan sthapit kiya. aur moosa ke bete gershom+ ke vanshaj, yonatan+ aur uske beton ko daan gotra ka yaajak banaya. woh tab tak unke liye yaajak thahre, jab tak desh ke logon ko bandi na bana liya gaya.
31 mika ki tarashi hui moorat vahaan tab tak sthapit rahi jab tak sachche parmeshvar ka ghar* sheelo mein raha.+
kai footnote
^ ya “bolne ka lehza.”
^ matlab “daan ki chhaavni.”
^ shaa., “pita.”
^ ya “pavitra dera.”
