nyayiyon 19:1-30
-
binyameen ke logon ka apradh (1-30)
19 un dinon israel raashtra mein koi raja na tha.+ us samay ek levi epraim ke pahadi pradesh+ ke ek door-daraz ilake mein rehta tha. usne ek aurat ko apni up-patni banaya jo yahooda ke betlehem+ se thi.
2 magar uski up-patni ne usse bevafai ki aur use chhodkar apne pita ke ghar yahooda ke betlehem chali gayi. use vahaan rehte chaar maheene ho gaye.
3 fir uska pati use manane aur vaapas le jaane aaya. uske saath uska sevak bhi aaya tha aur unke paas do gadhe the. uski up-patni use apne pita ke ghar ke andar le gayi. use dekhkar ladki ka pita khush ho gaya
4 aur usne use teen din rukne ke liye mana liya. teen din tak levi vahin raha aur usne apne sasur ke saath khaaya-peeya.
5 chauthe din subah-subah jab woh jaane ki taiyari karne lage, to ladki ke pita ne apne daamad se kaha, “pehale kuch khaa-pi le ki tujhe taakat mile, fir chale jaana.”
6 tab us levi aur uske sasur ne baithkar khaaya-peeya. iske baad uske sasur ne kaha, “aaj raat yahin ruk jaa aur mauj kar.”
7 woh levi jaane ke liye utha magar uska sasur usse minnat karta raha, isliye woh us raat vahin thahar gaya.
8 jab paanchvein din woh subah-subah jaane ke liye utha, to ladki ke pita ne kaha, “pehale kuch khaa-pi le ki tujhe taakat mile.” sasur aur daamad ne khaaya-peeya aur der tak vahin baithe rahe.
9 jab levi apni up-patni aur apne sevak ke saath jaane ke liye utha to uske sasur ne kaha, “dekh, din dhalne par hai, kuch hi der mein andhera ho jaayega. aaj raat yahin ruk jaa aur mauj kar. fir kal subah-subah apne ghar* ke liye ravana ho jaana.”
10 lekin levi vahaan ek aur raat nahin rukna chahta tha, isliye woh apni up-patni, sevak aur saaman se lade donon gadhon ko lekar nikaal pada aur yaboos yaani yarooshalem+ tak gaya.
11 jab woh yaboos ke paas pahunche to shaam hone lagi. sevak ne apne maalik se kaha, “kya hum yaboosiyon ke shehar mein chalein aur aaj raat vahin ruk jaayen?”
12 maalik ne usse kaha, “yahaan koi israeli nahin rehta isliye hum pardesiyon ke is shehar mein nahin rukeinge. hum giba+ tak jaayenge.”
13 usne yah bhi kaha, “aao jaldi karo, hum giba ya raamah+ tak pahunchne ki koshish karte hain. unhin mein se kisi ek jagah raat bitayenge.”
14 woh aage badhe. binyameen gotra ke shehar, giba ke paas pahunchte-pahunchte sooraj dhalne laga.
15 isliye woh raat kaatne ke liye giba mein gaye. woh jaakaar shehar ke chauk par baith gaye, lekin kisi ne unhein apne ghar mein panah nahin di.+
16 tab ek boodha aadmi kheton mein kaam karke vaapas ghar laut raha tha. woh epraim ke pahadi pradesh+ se tha, magar kuch samay se giba mein reh raha tha. vahaan ke nivasi binyameen gotra se the.+
17 jab usne shehar ke chauk par us levi ko baithe dekha to usne poochha, “tu kahaan se aaya hai aur tujhe kahaan jaana hai?”
18 levi ne javab diya, “hum yahooda ke betlehem se aa rahe hain aur hamein epraim ke pahadi pradesh ke ek door ke ilake mein jaana hai. main vahin ka rehnevala hoon. darasal main kisi kaam se yahooda ke betlehem gaya tha+ aur ab yahova ke bhavan jaa raha hoon.* magar yahaan hamein koi apne ghar mein panah nahin de raha.
19 mere paas apne gadhon ke liye bharpoor chaara aur pual hai.+ aur apne liye, apni up-patni aur apne sevak ke liye rotiyaan+ aur daakh-madira bhi hai. hamare paas khaane-peene ki to koi kami nahin.”
20 tab us boodhe aadmi ne kaha, “mere ghar mein tumhara swagat hai.* main tum logon ka poora-poora khayal rakhoonga. bas shehar ke chauk par raat mat guzaro.”
21 yah kehkar woh boodha aadmi unhein apne ghar le aaya. usne unke gadhon ko chaara daala aur un sabne apne pair dhoye. fir woh baithkar khaane-peene lage.
22 woh khaa-pi rahe the ki tabhi shehar ke kuch neech aadmiyon ne aakaar ghar ko gher liya aur darvaza peetne lage. woh ghar ke maalik, us boodhe aadmi se kehne lage, “baahar laa us aadmi ko jo tere ghar aaya hai. hamein uske saath sambhog karna hai.”+
23 yah sunkar boodha aadmi ghar se baahar aaya aur usne kaha, “mere bhaaiyo, aisa dusht kaam mat karo. woh aadmi mere ghar aaya mehman hai, uske saath yah ghinauna kaam mat karo.
24 meri ek kunvari beti hai aur us aadmi ki up-patni bhi hai. main unhein tumhare paas le aata hoon, agar tumhein kuch karna hi hai, to unke saath kar lo.+ magar is aadmi ko chhod do, uske saath aisa ghinauna kaam mat karo.”
25 lekin un aadmiyon ne us boodhe ki ek na suni. tab levi ne apni up-patni ko pakadkar unke paas baahar dhakel diya.+ un aadmiyon ne raat-bhar uska balatkar kiya aur use tadpaya. aur pau fatte hi use bhej diya.
26 woh us boodhe aadmi ke ghar aayi jahaan uska pati ruka hua tha aur vahin darvaze ke saamne gir padi aur ujala hone tak vahin padi rahi.
27 jab uska pati subah utha aur usne safar par nikaalne ke liye ghar ke darvaze khole, to usne dekha ki uski up-patni darvaze par padi hui hai aur uske haath dehleez par faile huye hain.
28 usne apni up-patni se kaha, “uth, hamein jaana hai.” lekin use koi javab na mila kyonki woh mar chuki thi. levi ne use uthakar apne gadhe par laad diya aur apne ghar ki or chal pada.
29 ghar pahunchkar usne ek chhura liya aur apni up-patni ki laash ke 12 tukde kiye aur israel ke har gotra ko ek-ek tukda bhej diya.
30 jis kisi ne use dekha, woh kehne laga, “israel mein aisi ghatna pehale kabhi nahin ghati. misra se nikaalne ke baad se lekar aaj tak hamne na to kabhi aisa hote dekha, na suna. ab is baare mein gehrai se socho, aapas mein salah karo+ aur batao ki hamein kya karna chahiye.”
kai footnote
^ shaa., “dere.”
^ ya shaayad, “aur main yahova ke bhavan mein seva karta hoon.”
^ shaa., “tujhe shaanti mile.”
