nyayiyon 7:1-25
7 fir yarubbal yaani gidon+ aur uske sab aadmi subah-subah uthe aur unhonne ‘harod ke sote’ ke paas dera daala. midyaniyon ki chhaavni unke uttar mein more pahadi ke paas ghaati mein thi.
2 yahova ne gidon se kaha, “tere saath bahot zyada aadmi hain. agar mainne midyaniyon ko tumhare haath kar diya,+ to israeli shaayad dingein maarein aur mujhse kahein, ‘hamne apne dam par jeet haasil ki hai.’+
3 isliye jaa aur apne aadmiyon ke saamne ghoshna kar, ‘tummein se agar koi yuddh mein jaane se dar raha hai, to woh apne ghar laut jaaye.’”+ yah ghoshna karke gidon ne unko parkha aur 22,000 aadmi ghar laut gaye, sirf 10,000 aadmi reh gaye.
4 yahova ne gidon se kaha, “ab bhi tere paas bahot zyada aadmi hain. aisa kar ki tu inhein neeche paani ki dhaara ke paas le jaa aur vahaan main in aadmiyon ko chhaantne mein teri madad karoonga. jiske baare mein main kahoon ki woh tere saath jaayega, tu use le jaana aur jiske baare mein kahoon ki woh tere saath nahin jaayega, tu use mat le jaana.”
5 tab gidon apne aadmiyon ko neeche dhaara ke paas le gaya.
yahova ne gidon se kaha, “jitne bhi aadmi chulloo se paani peete vakt chaaron or nazar rakheinge,* unhein tu ek taraf kar dena. aur jo ghutnon ke bal baitheinge aur seedhe dhaara mein munh daalkar peeyenge, unhein tu doosri taraf kar dena.”
6 un sabmein se sirf 300 log aise nikle jinhonne chulloo se paani peeya jabki baaki aadmiyon ne ghutnon ke bal baithkar dhaara mein munh daalkar peeya.
7 tab yahova ne gidon se kaha, “inhin 300 aadmiyon ke haathon main israel ko bachaunga aur midyaniyon ko tum logon ke havale kar doonga.+ baaki aadmiyon ko tu ghar bhej de.”
8 isliye gidon ne un 300 aadmiyon ko apne saath rakha aur baakiyon ko ghar bhej diya. baaki sainikon se unhonne khaane-peene ka saaman aur narsinge le liye. unke dushman midyani, neeche ghaati mein dera daale huye the.+
9 raat ko yahova ne gidon se kaha, “midyaniyon ki chhaavni par hamla karne ke liye taiyar ho jaa kyonki mainne unko tere havale kar diya hai.+
10 lekin agar tu hamla karne se dar raha hai, to apne sevak poorah ke saath neeche dushmanon ki chhaavni mein jaa
11 aur sun ki woh aapas mein kya baatein kar rahe hain. tab tere andar unse ladne ki himmat aa jaayegi.” gidon apne sevak poorah ke saath midyaniyon ki chhaavni ke paas gaya.
12 midyani, amaleki aur poorvi deshon ke logon+ se ghaati aisi bhari thi maano vahaan tiddiyon ka jhund utar aaya ho. aur unke unton ki ginti samundar kinare ki baaloo ke kinkon ki tarah anginat thi.+
13 jab gidon dushman ki chhaavni ke paas gaya, to ek aadmi apne saathi ko apna sapna bata raha tha. usne kaha, “mainne sapne mein jau ki ek gol roti dekhi jo ludhaktee hui midyaniyon ki chhaavni ki taraf aa rahi thi. woh aakaar tamboo se aisi takrayi ki poora tamboo palat gaya.+ zara socho, ek roti se poora-ka-poora tamboo girkar sapat ho gaya.”
14 uske saathi ne kaha, “yah roti kuch aur nahin gidon ki talvar hai,+ usi israeli ki jo yoash ka beta hai. parmeshvar ne midyaniyon aur poori chhaavni ko uske haath kar diya hai.”+
15 jaise hi gidon ne woh sapna suna aur uska matlab jaana,+ usne jhukkar parmeshvar ko dandvat kiya. iske baad woh israel ki chhaavni mein laut aaya. usne israeliyon se kaha, “taiyar ho jaao kyonki yahova ne midyaniyon ko tumhare haath kar diya hai.”
16 gidon ne 300 aadmiyon ko teen dalon mein baanta aur harek ko ek-ek narsinga+ aur ek-ek matka diya jiske andar mashal thi.
17 fir usne kaha, “tum mujh par dhyan dena aur jaisa main karoon, theek vaisa karna. jab main dushmanon ki chhaavni ke paas jaaun, to tum bhi mere peechhe aana.
18 jab main aur mere saathi narsinge foonkein to tum jo chhaavni ke chaaron taraf khade rahoge, tum bhi narsinge foonkna aur zor se chillana, ‘yah yuddh yahova ka hai! gidon ka hai!’”
19 ab raat ka doosra pehar* shuroo hua aur midyaniyon ke pehra denevale aadmi badle gaye. usi vakt, gidon ke saath uske 100 aadmi midyaniyon ki chhaavni ke paas aaye. unhonne zor se apne narsinge foonke+ aur matke fode.+
20 is tarah, teenon dalon ne narsinge foonke aur matke fode. woh baayen haath mein mashal aur daayen haath mein narsinga liye zordar aavaz mein chillaye, “yahova ki talvar aur gidon ki talvar!”
21 gidon ka har aadmi chhaavni ke chaaron taraf apni-apni jagah khada raha. dushman ki poori sena chillati hui idhar-udhaar bhaagne lagi.+
22 is dauran, gidon ke 300 aadmi narsinge foonkte rahe aur yahova ne aisa kiya ki dushman sainik ek-doosre par hi talvar chalane lage.+ dushman sena bhaagte-bhaagte sarera ki taraf bet-shitta pahunchi aur fir vahaan se aabel-mahola+ ki sarhad tak gayi, jo tabbat ke nazdeek hai.
23 tab naptali, aasher aur manashshe ke poore gotra+ se aur bhi israeliyon ko bulaya gaya aur unhonne milkar midyaniyon ka peechha kiya.
24 gidon ne epraim ke pahadi pradesh mein sabhi jagah doot bheje aur kaha, “isse pehale ki midyani betbara ke soton aur yardan ke ghaaton par pahunchein, tum jaakaar vahaan tainat ho jaao taaki woh bhaag na paayen.” tab epraim ke sabhi aadmi ikattha huye aur woh yardan ke ghaaton aur betbara ke soton par tainat ho gaye.
25 unhonne midyaniyon ke do haakimon ko bhi pakad liya, ek ka naam tha oreb aur doosre ka zaeb. unhonne oreb ko ek badi chattan par maar daala, jo aage chalkar oreb ki chattan kehlayi.+ aur zaeb ko unhonne angoor raundnevale haud mein maar daala, jo baad mein zaeb ke haud ke naam se jaana gaya. israeli midyaniyon ka peechha karte rahe.+ aur yardan ke ilake mein jab woh gidon ke paas aaye, to apne saath oreb aur zaeb ka sir laaye.
kai footnote
^ shaa., “kutte ke samaan jeebh se paani peeyenge.”
^ raat ke kareeb 10 baje se subah kareeb 2 baje tak.
