nyayiyon 9:1-57
9 fir aisa hua ki yarubbal ka beta abeemelek,+ shekem mein apne maamaon ke paas aaya. usne unse aur apne naana ke gharane ke sab logon se kaha,
2 “shekem ke aguvon* ke paas jaakaar poochho ki tumhare liye kya achha hai, yarubbal ke sabhi 70 bete+ tum par raaj karein ya sirf ek aadmi? unhein yah bhi yaad dilana ki main koi paraya nahin, unka apna khoon hoon.”*
3 tab uske maamaon ne shekem ke aguvon ko woh saari baatein batayin jo abeemelek ne unse kahi thi. shekem ke aguve abeemelek ka saath dene ke liye kaayal ho gaye* kyonki unka kehna tha, “aakhir woh hamara bhaai hai.”
4 fir unhonne baal-bareet ke mandir+ se use chaandi ke 70 tukde diye. abeemelek ne us rakam se kuch nithalle badmash rakh liye.
5 woh unke saath apne pita ke ghar opra gaya+ aur usne apne bhaaiyon yaani yarubbal ke 70 beton ko ek hi patthar par maar daala.+ magar yarubbal ka sabse chhota beta yotam chhip gaya aur zinda bach gaya.
6 fir shekem ke sabhi aguvon aur bet-millo ke logon ne abeemelek ko raja banaya.+ woh shekem mein bade ped ke paas, khambhe ke paas ikattha huye the.
7 jab is baat ki khabar yotam ko mili to woh turant garijjeem pahad+ par chadha aur zordar aavaz mein kehne laga, “hey shekem ke aguvo, meri baat suno tab parmeshvar bhi tumhari sunega.
8 ek baar pedon ne socha ki woh apne liye ek raja chunein. unhonne jaitoon ke ped se kaha, ‘hum par raaj kar.’+
9 lekin jaitoon ke ped ne kaha, ‘mera kaam to tel paida karna hai jisse parmeshvar aur insanon ka aadar-samman kiya jaata hai. bhala apna kaam chhodkar main doosre pedon par raaj kyon karoon?’*
10 iske baad pedon ne anjeer ke ped se kaha, ‘aa, hum par raaj kar.’
11 lekin anjeer ke ped ne kaha, ‘main apne meethe-meethe falon aur apni achhi paidavar ko chhodkar tum par raaj kyon karoon?’*
12 iske baad pedon ne angoor ki bel se kaha, ‘aa, hum par raaj kar.’
13 angoor ki bel ne kaha, ‘mujhse nayi daakh-madira banti hai jisse parmeshvar aur insan khush hote hain. bhala yah kaam chhodkar main tum par raaj kyon karoon?’*
14 aakhirkar sab pedon ne kanteeli jhaadi se kaha, ‘aa, hum par raaj kar.’+
15 tab kanteeli jhaadi ne un pedon se kaha, ‘agar tum vaakai mera abhishek karke mujhe apna raja banana chahte ho, to meri chhaanv mein sharan lo. lekin agar tum mujhe raja nahin banaoge, to mujhse aisi aag niklegi jo labanon ke devdaron ko bhasm kar degi.’
16 ab batao, kya tumne sachche man se abeemelek ko raja banaya hai?+ kya tumne aisa karke sahi kiya? kya tumne yarubbal aur uske gharane ke saath bhalai ki aur uske saath jaisa vyavhar kiya kya woh sahi tha?
17 mere pita ne apni jaan par khelkar tumhein midyaniyon ke haath se chhudaya.+
18 lekin badle mein tum logon ne kya kiya? tum mere pita ke gharane ke khilaf uth khade huye aur uske 70 beton ko ek hi patthar par maar daala.+ fir tumne uski daasi ke bete abeemelek+ ko shekem ke aguvon par raja thehraya, bas isliye ki woh tumhara bhaai hai.
19 agar tumne yarubbal aur uske gharane ke saath jo kiya, woh sachche man se kiya hai aur agar woh sahi hai, to tum abeemelek se khush rahoge aur woh bhi tumse khush rahega.
20 lekin agar tumne bure irade se aisa kiya hai, to woh shekem aur bet-millo+ ke aguvon ko aag se bhasm kar dega aur shekem aur bet-millo ke aguve bhi abeemelek ko aag se bhasm kar deinge.”+
21 fir yotam+ vahaan se bhaagkar ber naam ki jagah chala gaya aur apne bhaai abeemelek ke dar se vahin rehne laga.
22 abeemelek ne teen saal tak israel par manmana raaj kiya.
23 fir parmeshvar ne uske aur shekem ke aguvon ke beech fut padne di aur woh abeemelek ke saath vishvasghat karne lage.
24 yah isliye hua taaki yarubbal ke 70 beton ke khoon ka badla liya jaa sake. aur unke khoon ka dosh unke hatyare abeemelek par aaye+ aur shekem ke aguvon par bhi, jinhonne is katlaeaam mein uska saath diya tha.
25 shekem ke aguvon ne abeemelek ke liye pahadon par kuch aadmiyon ko ghaat mein bithaya. aur woh log aane-jaanevalon ko lootne lage. is baat ki khabar abeemelek ko mili.
26 fir ebed ka beta gaal apne bhaaiyon ke saath shekem aaya aur shekem+ ke aguve ummeed karne lage ki woh unki madad karega.
27 unhonne angooron ke baag mein jaakaar angoor ikatthe kiye, unhein raundkar ras nikaala aur jashna manane lage. woh apne devta ke mandir mein jaakaar+ khaane-peene lage aur abeemelek ko kosne lage.
28 ebed ke bete gaal ne kaha, “abeemelek aur shekem* kaun hote hain jo hum unke adheen rahein? abeemelek yarubbal+ ka beta hai to kya hua? uska adhikari jabool hai to kya hua? abeemelek ke adheen rehne se achha hai ki hum shekem ke pita hamor ke beton ki seva karein.
29 agar yahaan ke nivasi mera hukm maanein, to main abeemelek ka takhta palat doonga.” fir gaal ne abeemelek ko chunauti di, “tujhe apni sena jitni badhani hai badha le aur yuddh ke maidan mein utar aa.”
30 jab shekem ke haakim jabool ko ebed ke bete gaal ki baaton ka pata chala to uska gussa bhadak utha.
31 usne chupke se* apne dooton ke haath abeemelek ko yah sandesh bhijvaya, “dekh, shekem mein ebed ka beta gaal aur uske bhaai aaye huye hain aur tere khilaf shehar ke logon ko bhadka rahe hain.
32 isliye tu apne aadmiyon ke saath raat mein hi yahaan aa jaa aur baahar ghaat lagakar baith.
33 kal sooraj ugte hi shehar par dhaava bol de. jab gaal aur uske aadmi tujhse ladne aayen to kisi bhi tarah use hara de.”
34 isliye raat ko abeemelek aur uske aadmi shekem gaye aur shehar ke paas chaar dalon mein ghaat lagakar baith gaye.
35 agle din ebed ka beta gaal, shehar ke faatak par aaya. ghaat mein baithe abeemelek aur uske aadmi uthkar shehar ki taraf badhne lage.
36 jab gaal ne logon ko dekha to jabool se kaha, “aisa lagta hai, log pahadon se utaarkar hamari taraf aa rahe hain.” magar jabool ne kaha, “yah tera vaham hai, woh log nahin pahadon ki parchhain hai.”
37 kuch der baad gaal ne kaha, “dekh to sahi, log sachmuch pahadi ilake ke beech se neeche utar rahe hain aur ek dal to monneem ke bade ped ke raaste aa raha hai.”
38 jabool ne kaha, “kya kaha tha toone, ‘abeemelek kaun hota hai jo hum uske adheen rahein?’+ ab kahaan gayi teri woh badi-badi baatein! unki seva karna tujhe gavara nahin tha na! to ab jaa aur lad unse.”
39 isliye gaal, shekem ke aguvon ke aage-aage gaya aur usne abeemelek se ladai ki.
40 abeemelek ne gaal ko aisa khadeda ki woh uske saamne se bhaag nikala. shehar ke faatak tak kai logon ki laashein bichh gayin.
41 fir abeemelek arooma mein rehne laga. jabool+ ne gaal aur uske bhaaiyon ko shekem se khaded diya.
42 agle din abeemelek ko khabar di gayi ki log shehar se baahar jaane lage hain.
43 tab usne apne aadmiyon ko teen dalon mein baanta aur shehar ke baahar ghaat lagakar baith gaya. logon ko shehar se baahar aate dekh, usne un par hamla bol diya aur unhein maar daala.
44 fir woh aur uske dal aage badhkar shehar ke faatak ke saamne tainat ho gaye, jabki do dalon ne un sab logon par hamla kiya jo shehar ke baahar the aur unhein maar giraya.
45 abeemelek ne din-bhar us shehar se yuddh karke us par kabza kar liya aur uske nivasiyon ko maar daala. usne poore shehar ki int-se-int baja di+ aur vahaan ki zameen par namak chhidakva diya.
46 jab shekem ke kile ke sabhi aguvon ne yah suna to woh fauran elbareet ke mandir+ ke andarvale kamre* mein jaa chhipe.
47 jaise hi abeemelek ko pata chala ki shekem ke kile ke sabhi aguve mandir mein ikattha ho gaye hain,
48 woh apne saare aadmiyon ke saath zalmon pahad par gaya. usne kulhadi se ped ki daal kaati aur use apne kandhon par uthakar le jaane laga. usne apne aadmiyon se kaha, “jaisa mainne kiya vaisa hi karo. jaldi!”
49 tab sabhi aadmiyon ne ek-ek daal kaati aur abeemelek ke peechhe-peechhe gaye. unhonne ye daaliyaan mandir ke us kamre ke chaaron taraf rakh di aur unmein aag laga di. shekem ke kile ke sabhi log, kareeb 1,000 aadmi-aurat jalkar mar gaye.
50 fir abeemelek, tebes shehar gaya aur us par hamla karne ke liye usne chhaavni daali. usne shehar par kabza kar liya.
51 shehar ke beechon-beech ek mazboot meenar thi. isliye shehar ke sabhi aadmi-aurat aur saare aguve vahaan bhaag gaye. unhonne meenar mein ghuskar use andar se band kar liya aur oopar chhat ki taraf gaye.
52 itne mein abeemelek vahaan pahunch gaya aur usne meenar par hamla bol diya. jab woh meenar mein aag lagane ke liye uske dvar par aaya
53 to meenar se ek aurat ne chakki ka oopri paat abeemelek ke sir par feinka aur abeemelek ki khopdi fat gayi.+
54 abeemelek ne turant apne hathiyar dhonevale sevak se kaha, “apni talvar nikaal aur mujhe maar daal. kahin log yah na kahein ki abeemelek ek aurat ke haathon maara gaya.” tab uske sevak ne use talvar bhonk di aur woh mar gaya.
55 jab israeliyon ne dekha ki abeemelek mar chuka hai, to woh sab apne ghar laut aaye.
56 is tarah parmeshvar ne abeemelek ko uski burai ka sila diya, jo usne apne 70 bhaaiyon ko maarkar apne pita se ki thi.+
57 parmeshvar ne shekem ke aadmiyon ko bhi unki burai ka sila diya. us din yarubbal+ ke bete yotam ka shaap+ poora hua.
kai footnote
^ ya shaayad, “zamindaron.”
^ shaa., “tumhara haad-maans hoon.”
^ shaa., “unka man uski taraf jhukne laga.”
^ shaa., “ke oopar kyon jhoomoon?”
^ shaa., “tumhare oopar kyon jhoomoon?”
^ shaa., “tumhare oopar kyon jhoomoon?”
^ shaayad shekem ke adhikari jabool ki baat ki gayi hai.
^ ya “chaalaaki se.”
^ ya “gadh.”
