preshiton ke kaam 2:1-47
2 pintekust ke tyohar ke din,+ jab woh sab ek hi ghar mein ikattha the,
2 tabhi achanak aakash se saany-saany karti tez aandhi jaisi aavaz hui aur saara ghar jismein woh baithe the goonj utha. +
3 aur unhein aag ki laptein dikhayi di jo jeebh jaisi thi aur ye alag-alag bat gayin aur unmein se harek ke oopar ek-ek jaa thahri.
4 tab woh sabhi pavitra shakti se bhar gaye+ aur alag-alag bhasha bolne lage, theek jaisa pavitra shakti unhein bolne ke kaabil bana rahi thi.+
5 us vakt, duniya ke sabhi deshon se aaye yahoodi bhakt yarooshalem mein the.+
6 jab yah aavaz sunayi di, to bheed-ki-bheed ikatthi ho gayi aur woh sab hairan the kyonki har kisi ko chelon ke munh se apni hi bhasha sunayi de rahi thi.
7 log dang reh gaye aur kehne lage, “kamaal ho gaya! ye log jo bol rahe hain kya ye sab galeel ke rehnevale+ nahin?
8 to fir hammein se harek ko apni hi maatra-bhasha* kaise sunayi de rahi hai?
9 hum to paarthi, maadi+ aur elami+ hain aur mesopotamiya, yahoodiya aur kappdookiya, puntus aur asia praant ke rehnevale+ hain
10 aur froogiya, pamfooliya aur misra se aur libiya ke ilakon se hain jo kurene ke paas hai aur rom se aaye musafir hain. hum sab yahoodi aur yahoodi dharm apnanevalon+ mein se hain.
11 hammein kreti aur arbi log bhi hain. fir bhi hum in logon ko hamari apni bhasha mein parmeshvar ke shaandar kaamon ke baare mein bolte huye sun rahe hain.”
12 sab log hairan the aur uljhan mein the. woh ek-doosre se kehne lage, “yah sab kya ho raha hai?”
13 magar kuch log chelon ki khilli udane lage, “ye to nayi* daakh-madira ke nashe mein hain.”
14 tab patras un gyarahon+ ke saath khada hua aur usne vahaan maujood logon se buland aavaz mein kaha, “hey yahoodiya aur yarooshalem ke sab logo, meri baat dhyan se suno.
15 jaisa tum soch rahe ho, ye log nashe mein nahin hain kyonki abhi subah ka teesra ghanta* hi hua hai.
16 iske bajay, yah vahi ho raha hai jiske baare mein bhavishyavakta yoel ne bataya tha:
17 ‘parmeshvar kehta hai, “main aakhiri dinon mein har tarah ke insan par apni pavitra shakti undeloonga aur tumhare bete-betiyaan bhavishyavani kareinge, tumhare javaan darshan dekheinge aur tumhare buzurg khaas sapne dekheinge.+
18 un dinon main apne daas-daasiyon par bhi apni pavitra shakti undeloonga aur woh bhavishyavani kareinge.+
19 aur main oopar aakash mein ajoobe aur neeche dharti par chamatkar dikhaunga, khoon, aag aur dhuyen ka baadal.
20 yahova* ke mahan aur mahima se bhare din ke aane se pehale sooraj par andhera chhaa jaayega aur chaand khoon jaisa laal ho jaayega.
21 aur jo koi yahova* ka naam pukarta hai woh uddhaar paayega.”’+
22 hey israeliyo, meri yah baat suno: yeeshu naasri parmeshvar ka bheja hua insan tha aur is baat ko saabit karne ke liye parmeshvar ne uske zariye tumhare beech bade-bade shaktishali aur aashcharya ke kaam aur chamatkar kiye,+ jaisa ki tum khud bhi jaante ho.
23 is aadmi ko tumne dushton ke haath saunpa aur kaath par latkakar maar daala.+ parmeshvar ne bhavishya jaanne ki kaabilyat ka istemaal karke aur apni marzee* ke mutabik yah tay kiya+ ki uske saath aisa hi ho.
24 magar parmeshvar ne use zinda karke+ maut ke bandhanon se aazad kiya, kyonki yah naamumkin tha ki woh maut ke bandhanon* mein jakda rahe.+
25 isliye ki daavid ne uske baare mein kaha tha, ‘main har pal yahova* ko apne saamne* rakhta hoon. woh mere daayin taraf rehta hai taaki mujhe kabhi hilaya na jaa sake.
26 is vajah se mera dil khushi se bhar gaya hai aur meri jeebh bade aanand se bol uthi hai. main* poori aasha ke saath jeeunga.
27 kyonki tu mujhe kabraa* mein nahin chhod dega, tu apne vafadar jan ko sadne nahin dega.+
28 toone mujhe jeevan ki raah dikhayi hai, tu apne saamne* mujhe khushi se bhar dega.’+
29 bhaaiyo, main kulpita daavid ke baare mein bejhijhak tumse yah kah sakta hoon ki uski maut hui aur use kabraa mein dafnaya gaya+ aur uski kabraa aaj ke din tak hamare beech maujood hai.
30 woh ek bhavishyavakta tha aur jaanta tha ki parmeshvar ne shapath khaakaar usse vaada kiya hai ki woh uske vanshajon mein se ek ko uski raajgaddi par bithayega.+
31 daavid, maseeh ke zinda hone ke baare mein pehale se jaanta tha aur usne bataya ki maseeh ko kabraa* mein nahin chhoda jaayega, na hi uska shareer sadne diya jaayega.+
32 isi yeeshu ko parmeshvar ne zinda kiya hai aur hum sab is baat ke gavah hain.+
33 use parmeshvar ke daayin taraf uncha pad diya gaya hai+ aur vaade ke mutabik usne pita se pavitra shakti paayi hai.+ yahi shakti usne hum par undeli hai aur isi ko tum kaam karte huye dekh aur sun rahe ho.
34 daavid swarg nahin gaya, magar woh khud kehta hai, ‘yahova* ne mere prabhu se kaha, “tu tab tak mere daayen haath baith,
35 jab tak ki main tere dushmanon ko tere paanvon ki chauki na bana doon.”’+
36 isliye israel ka saara gharana har haal mein yah jaan le ki parmeshvar ne isi yeeshu ko prabhu+ aur maseeh thehraya hai, jise tumne kaath par latkakar maar daala.”+
37 jab unhonne yah suna to unka dil unhein behad kachotne laga aur unhonne patras aur baaki preshiton se kaha, “bhaaiyo, ab hamein kya karna chahiye?”
38 patras ne unse kaha, “pashchatap karo+ aur tummein se harek apne paapon ki maafi ke liye+ yeeshu maseeh ke naam se baptisma le.+ tab tum pavitra shakti ka muft vardan paaoge.
39 kyonki yah vaada+ tumhare aur tumhare bachchon ke liye aur door-door ke un sab logon ke liye hai jinko hamara parmeshvar yahova* apne paas bulayega.”+
40 usne aur bhi bahot-si baatein batakar achhi tarah gavahi di aur woh unhein samjhata raha, “in tedhe logon ki peedhi+ se alag ho jaao aur uddhaar paao.”
41 jin logon ne khushi-khushi uske vachan ko maana, unhonne baptisma liya.+ us din chelon mein kareeb 3,000 log shaamil ho gaye.+
42 aur woh sab preshiton se lagatar seekhte rahe. woh ek-saath ikattha hote, khaana khaate+ aur prarthna karte the.+
43 har insan par dar chhaane laga aur preshiton ke haathon bahot-se aashcharya ke kaam aur chamatkar hone lage.+
44 woh sabhi jinhonne vishvas kiya, saath ikattha hote aur unke paas jo kuch tha aapas mein baant lete the.
45 woh apna saaman aur apni jaaydad bech dete+ aur milnevali rakam sabmein baant dete the. harek ko uski zaroorat ke mutabik dete the.+
46 woh ek hi maksad ke saath har din mandir mein haazir rehte aur ek-doosre ke ghar jaakaar khaana khaate aur sachche dil se aur khushi-khushi mil-baantakar khaate the.
47 woh parmeshvar ki taareef karte aur sab log unse khush the. yahova* har din aise aur bhi logon ko unmein shaamil karta gaya, jinhein woh uddhaar dila raha tha.+
kai footnote
^ ya “janm ki bhasha.”
^ ya “meethi.”
^ yaani subah kareeb 9 baje.
^ ya “maksad.”
^ ya shaayad, “rasson.”
^ ya “apni aankhon ke saamne.”
^ shaa., “mera shareer.”
^ ya “apne mukh ke saamne.”
