root 3:1-18
3 fir naaomi ne apni bahoo root se kaha, “beti, kya yah mera farz nahin ki main tere liye ek aisa ghar dhoondhoon+ jahaan tu sukoon paa sake?
2 dekh! boaz hamara rishtedar hai,+ jiske khet mein kaam karnevali aurton ke saath rehkar toone baalein beenin. aaj shaam khalihan mein jau fatki jaayegi aur boaz bhi vahaan hoga.
3 tu naha-dhokar khushboodar tel mal aur taiyar hokar* khalihan mein jaa. magar uske paas tab tak mat jaana jab tak ki woh khaa-pi na le.
4 jab woh let jaaye, to dekhna ki woh kahaan soya hai. fir jaakaar uske pair se kapda hatana aur uske pair ke paas let jaana. tab woh tujhe batayega ki kya karna hai.”
5 root ne javab diya, “jo kuch toone kaha hai, woh sab main karoongi.”
6 woh khalihan mein gayi aur uski saas ne jaisa kaha tha, usne vaisa hi kiya.
7 boaz ne khaaya-peeya aur woh bada khush tha. fir woh anaj ke dher ke paas jaakaar so gaya. tab root dabe paanv aayi aur usne boaz ke pair se kapda hataya aur vahin let gayi.
8 aadhi raat ko boaz thand se thithurne laga aur uth gaya. jaise hi woh aage ki taraf jhuka, usne dekha ki ek aurat uske pairon ke paas leti hai.
9 boaz ne poochha, “tu kaun hai?” us aurat ne kaha, “main teri daasi root hoon. tu apni is daasi ko apna odhna odha de* kyonki tu hamara chhudanevala hai.”+
10 is par boaz ne kaha, “yahova tujhe aasheesh de meri beti. toone pehale bhi apne atal pyar ka saboot diya hai,+ magar is baar toone aur bhi badhkar iska saboot diya hai. kyonki tu kisi javan aadmi ke peechhe nahin gayi, fir chahe woh ameer ho ya gareeb.
11 ghabra mat meri beti. toone mujhse jo bhi kaha hai, woh sab main karoonga+ kyonki shehar mein har koi jaanta hai ki tu ek nek aurat hai.
12 yah sach hai ki main tumhara chhudanevala hoon,+ magar ek aur aadmi hai jo chhudane ka pehala hak rakhta hai kyonki mujhse zyada woh tumhara kareebee rishtedar hai.+
13 tu raat-bhar yahin ruk jaa. kal subah main us aadmi se baat karoonga, agar woh tujhe chhudane ke liye raazee ho gaya, to achhi baat hai.+ lekin agar woh inkar karega, to jeevit parmeshvar yahova ki shapath, main tujhe chhudaunga. tu subah tak yahin leti reh.”
14 isliye root subah hone tak vahin uske pairon ke paas leti rahi. isse pehale ki ujala ho aur koi use dekh le, woh uth gayi. boaz nahin chahta tha ki kisi ko pata chale ki koi aurat khalihan mein aayi thi.
15 fir usne root se kaha, “toone jo chaadar odhi hui hai use faila.” tab root ne apni chaadar failayi aur boaz ne usmein chhe paimane* jau daala. fir use uthakar root ko de diya. iske baad boaz shehar mein chala gaya.
16 root apni saas ke paas laut aayi. naaomi ne usse poochha, “beti, jaldi bata kya hua?”* root ne use saara haal keh sunaya.
17 root ne yah bhi kaha, “usne mujhe chhe paimane jau diya aur kaha ki apni saas ke paas khaali haath mat jaa.”
18 yah sunkar naaomi ne root se kaha, “beti, yahin baithkar intazar kar aur dekh kya hota hai kyonki woh aadmi tab tak chain se nahin baithega, jab tak woh aaj yah maamla nipta nahin deta.”
kai footnote
^ ya “kapde pehankar.”
^ ya “apni panah mein le le.”
^ shaayad 6 sa-aa maap ya kareeb 44 l. ati. kha14 dekhein.
^ shaa., “tu kaun hai?”
