sabhopdeshak 4:1-16
4 ek baar fir mainne un sab zulmon par dhyan diya jo is duniya mein* ho rahe hain. aur mainne kya dekha, zulm sehnevale aansoo baha rahe hain aur unhein dilasa denevala koi nahin.+ zulm karnevale taakatvar hain isliye koi un dukhiyon ko dilasa nahin deta.
2 yah dekhkar mainne socha, zinda logon se achhe to mare huye hain.+
3 aur in donon se behtar to woh insan hai, jo ab tak paida hi nahin hua+ aur jisne duniya mein* ho rahe bure kaam nahin dekhe.+
4 mainne dekha hai ki doosron se aage nikaalne ki dhun mein ek insan khoob mehnat karta hai aur badi maharat se apna kaam karta hai.+ magar yah bhi vyarth hai aur hava ko pakadne jaisa hai.
5 moorkh haath-par-haath dhare baitha rehta hai aur khud ko barbad kar deta hai.*+
6 thoda-saa aaram karna,* bahot zyada kaam karne* aur hava ke peechhe bhaagne se kahin achha hai.+
7 mainne duniya mein* ek aur vyarth baat dekhi:
8 ek aadmi hai jo bilkul akela hai. uska na to koi dost hai, na beta, na bhaai. woh din-raat mehnat karta hai. uske paas khoob daulat hai, fir bhi uski aankhein tript nahin hotin.+ magar kya woh apne aapse poochhta hai, ‘aakhir main kiske liye itni mehnat kar raha hoon? kiske liye khud ko achhi-achhi cheezon se door rakh raha hoon?’+ yah bhi vyarth hai aur bada dukh denevala kaam hai.+
9 ek se bhale do hain+ kyonki unki mehnat ka unhein achha fal* milta hai.
10 agar unmein se ek gir jaaye, to uska saathi use utha lega. lekin jo akela hai use girne par kaun uthayega?
11 agar do saath letein to woh garam raheinge. lekin jo akela hai woh kaise garam rahega?
12 ek akele ko koi bhi daboch sakta hai, lekin agar do jan saath hon to woh milkar uska saamna kar sakeinge. aur jo dori teen dhaagon se bati ho woh aasani se* nahin tootti.
13 gareeb magar buddhiman ladka, us boodhe aur moorkh raja se kahin achha hai,+ jo ab kisi ki salah nahin maanta.+
14 kyonki woh* jail se nikaalkar raja ban jaata hai,+ fir chahe woh uske raaj mein gareeb hi kyon na paida hua ho.+
15 mainne duniya ke* sab logon par gaur kiya aur yah bhi dekha ki us javan ladke ke saath kya hota hai jisne raja ki jagah li.
16 bhale hi uska saath denevalon ki kami nahin, magar aage chalkar jo log aayenge, woh usse khush nahin honge.+ yah bhi vyarth hai aur hava ko pakadne jaisa hai.
kai footnote
^ shaa., “sooraj ke neeche.”
^ shaa., “sooraj ke neeche.”
^ shaa., “aur apna maans khaata hai.”
^ shaa., “ek mutthi aaram.”
^ shaa., “do mutthi kadi mehnat.”
^ shaa., “sooraj ke neeche.”
^ ya “zyada faayda.”
^ ya “jaldi.”
^ shaayad yahaan us buddhiman ladke ki baat ki gayi hai.
^ shaa., “sooraj ke neeche.”
