utpatti 28:1-22
28 isliye ishaak ne yakub ko bulakar use aasheervad diya aur use yah aagya di: “tu kanaan desh ki kisi ladki se shaadi mat karna.+
2 iske bajay, tu apne naana batooel ke ghar paddan- araam jaa aur apne maama laaban ki kisi beti+ se shaadi kar.
3 sarvashaktiman parmeshvar tujhe aasheesh dega jisse tu foolega-falega aur teri bahot-si santan hongi. aur tere vanshajon se kai gotron ki ek bahot badi mandli banegi.+
4 aur jo aasheesh usne abraham ko di thi+ vahi aasheesh tujhe aur tere vansh ko dega aur tu is desh par adhikar karega jahaan tu pardesi bankar reh raha hai aur jo usne abraham ko diya tha.”+
5 fir ishaak ne yakub ko vida kiya aur yakub laaban ke ghar paddan- araam ke liye nikaal pada. laaban, araami batooel ka beta+ aur yakub aur esav ki maa ribka ka bhaai tha.+
6 esav ne dekha ki ishaak ne yakub ko aasheervad diya aur paddan- araam bheja taaki woh vahaan ki kisi ladki se shaadi kare. esav ne gaur kiya ki ishaak ne yakub ko aasheervad dete vakt use yah aagya di: “tu kanaan desh ki kisi ladki se shaadi mat karna”+
7 aur yakub apne maa-baap ki aagya maankar paddan- araam ke liye ravana ho gaya.+
8 yah sab dekhkar esav ko ehsas hua ki uske pita ishaak ko kanaan ki ladkiyon se kitni ghrina hai.+
9 isliye woh abraham ke bete ishmael ke yahaan gaya aur usne ishmael ki beti mahlat se shaadi ki jo nabayot ki behen thi. is tarah esav ne apni do patniyon ke alava ek aur shaadi ki.+
10 yakub bersheba se nikala aur haaran ki taraf badhta gaya.+
11 safar karte-karte woh ek jagah pahuncha aur usne vahin raat bitane ki sochi kyonki sooraj dhal gaya tha. usne vahaan se ek patthar liya aur us par sir rakhkar vahin let gaya.+
12 fir use ek sapna aaya aur usne dekha ki dharti par ek seedhi thi jo itni lambee thi ki woh oopar swarg tak pahunch rahi thi aur parmeshvar ke swargdoot seedhi par chadh aur utar rahe the.+
13 fir usne dekha ki seedhi ke bilkul oopar yahova tha. usne yakub se kaha,
“main tere daada abraham ka aur tere pita ishaak ka parmeshvar yahova hoon.+ yah desh, jiski zameen par tu leta hua hai, main tujhe aur tere vansh* ko doonga.+
14 tera vansh* dhool ke kanon ki tarah anginat ho jaayega.+ tu uttar, dakshin, poorab, pashchim, chaaron dishaon mein fail jaayega. tere aur tere vansh* ke zariye dharti ke saare kul zaroor aasheesh paayenge.*+
15 main tere saath hoon aur jahaan-jahaan tu jaayega main teri hifazat karoonga aur ek din tujhe vaapas is desh mein le aaunga.+ main tera saath kabhi nahin chhodoonga aur tujhse jo vaada kiya tha use poora karoonga.”+
16 tab yakub nind se jaag utha aur usne kaha, “vaakai, is jagah par yahova maujood hai aur main yah baat nahin jaanta tha.”
17 yakub par dar chhaa gaya aur usne kaha, “yah koi maamooli jagah nahin hai! yah pavitra jagah hai. yah parmeshvar ka ghar hi ho sakta hai.+ yahi swarg ka dvar hai.”+
18 fir yakub subah jaldi utha aur usne woh patthar liya jis par woh sir rakhkar soya tha. usne us patthar ko ek yaadgar ke taur par khada kiya aur us par tel undela.+
19 usne us jagah ka naam betel* rakha. lekin pehale us shehar ka naam looj tha.+
20 fir yakub ne parmeshvar se yah mannat maani: “agar tu har kadam par mera saath de, safar mein meri hifazat karta rahe, mujhe khaane ke liye roti aur pehanne ke liye kapde deta rahe
21 aur agar main sahi-salamat apne pita ke ghar laut aaya, to hey yahova, main jaan jaaunga ki toone khud ko mera parmeshvar saabit kiya hai.
22 aur yah patthar jise mainne yaadgar ke taur par khada kiya hai, parmeshvar ka ghar thehrega.+ aur main vaada karta hoon ki teri di hui har cheez ka dasvaan hissa tujhe zaroor arpit karoonga.”
kai footnote
^ shaa., “beej.”
^ shaa., “beej.”
^ shaa., “beej.”
^ iska yah matlab ho sakta hai ki aasheesh paane ke liye unhein bhi kuch kadam uthane honge.
^ matlab “parmeshvar ka ghar.”
