utpatti 48:1-22
48 kuch samay baad yoosuf ko yah khabar di gayi: “aajkal tere pita ki tabiyat kuch theek nahin rehti.” jab yoosuf ne yah suna to woh apne donon beton, yaani manashshe aur epraim ko lekar yakub ke paas gaya.+
2 fir yakub ko bataya gaya, “tera beta yoosuf aaya hai.” tab israel ne kisi tarah taakat jutayi aur palang par uthkar baitha.
3 yakub ne yoosuf se kaha:
“sarvashaktiman parmeshvar kanaan ke looj mein mere saamne prakat hua tha aur usne mujhe aasheesh di.+
4 usne mujhse kaha, ‘main tujhe bahot-si santan dekar aabad karoonga aur tere vanshajon ki ginti bahot badhaunga. main tere vanshajon se kai gotron ki ek bahot badi mandli banaunga.+ main yah desh tere baad tere vansh ko doonga taaki yah hamesha ke liye unki jaageer ban jaaye.’+
5 ab dekh, tere donon bete, jo yahaan misra mein mere aane se pehale paida huye the, ab se mere hain.+ jaise rooben aur shimon mere bete hain,+ vaise hi epraim aur manashshe mere bete hain.
6 lekin inke baad tere jo bete honge woh tere hi kehlayenge. unhein epraim aur manashshe ki virasat ki zameen se hissa milega.+
7 aur jab main paddan se laut raha tha to kanaan desh mein eprat+ se kuch doori par mere saamne raahel ki maut ho gayi.+ isliye mainne use eprat jaanevale raaste mein, haan betlehem+ ke raaste mein dafna diya.”
8 fir israel ne yoosuf ke beton ko dekhkar poochha, “kya ye tere bachche hain?”
9 yoosuf ne apne pita se kaha, “haan, ye mere bete hain jo parmeshvar ne mujhe is desh mein diye hain.”+ israel ne kaha, “inhein zara mere paas laa, main inhein aasheervad dena chahta hoon.”+
10 budhape ki vajah se israel ki nazar bahot kamzor ho gayi thi, use theek se dikhayi nahin deta tha. isliye yoosuf apne beton ko israel ke nazdeek laaya aur israel ne unhein chooma aur gale lagaya.
11 tab usne yoosuf se kaha, “mainne kabhi socha bhi nahin tha ki main jeete-ji tera munh dekh paaunga.+ magar dekh, parmeshvar ne mujhe na sirf tujhe balki tere vansh ko bhi dekhne ka mauka diya hai.”
12 iske baad yoosuf apne beton ko israel ke ghutnon ke paas se alag le gaya. fir yoosuf ne munh ke bal zameen par girkar dandvat kiya.
13 iske baad yoosuf, epraim+ aur manashshe+ ko israel ke kareeb laaya. usne apne daayen haath se epraim ko pakadkar israel ke baayin taraf kiya aur apne baayen haath se manashshe ko pakadkar uske daayin taraf kiya.
14 magar israel ne apna daayaan haath epraim ke sir par rakha, iske baavjood ki woh chhota beta tha aur apna baayaan haath pehalauthe bete manashshe ke sir par rakha.+ israel ne jaanboojhkar aisa kiya.
15 fir usne yoosuf ko yah aasheervad diya,+
“sachcha parmeshvar, jiske saamne mere daada abraham aur pita ishaak sahi raah par chalte rahe+aur jo mera charvaha bankar mere janm se lekar aaj tak meri dekhbhal karta aaya hai, woh sachcha parmeshvar+
16 jo apne swargdoot ke zariye mujhe har museebat se bachata aaya hai,+ in ladkon ko aasheesh de.+
woh mere naam se, mere daada abraham aur pita ishaak ke naam se jaane jaayen,dharti par inke vanshajon ki ginti kai guna badhti jaaye.”+
17 jab yoosuf ne dekha ki uske pita ne apna daayaan haath epraim ke sir par rakha hai, to use bura laga. isliye usne uska daayaan haath epraim ke sir se hatakar manashshe ke sir par rakhne ki koshish ki.
18 usne apne pita se kaha, “nahin, nahin, mere pita, pehalautha woh nahin yah hai.+ is par apna daayaan haath rakh.”
19 magar yoosuf ka pita uski baat maanne se inkar karta raha. usne kaha, “main jaanta hoon bete, main jaanta hoon. isse bhi ek badi aur mahan jaati banegi. magar iska yah chhota bhaai isse bhi mahan hoga+ aur iske vansh ke log itne beshumar honge ki woh kai jaatiyon ke barbar honge.”+
20 us din israel ne un donon ladkon ko yah aasheervad bhi diya:+
“israel ke log tera naam lekar ek-doosre ko yah aasheervad diya karein,‘parmeshvar tujhe epraim aur manashshe ke jaisa banaye.’”
is tarah israel ne yoosuf ke beton ko aasheervad dete vakt manashshe ke bajay epraim ko pehala darja diya.
21 fir israel ne yoosuf se kaha, “dekh, ab main zyada din nahin jeenevala.+ magar tum log ek baat ka yakeen rakhna, parmeshvar hamesha tumhare saath rahega aur tumhein tumhare purkhon ke desh mein vaapas le jaayega.+
22 main tujhe tere bhaaiyon se us zameen ka ek hissa* zyada deta hoon, jo mainne teer-kaman aur talvar ke dam par emoriyon se haasil ki thi.”
kai footnote
^ ya “zameen ki ek dhalan.”
