vyavasthavivran 2:1-37
2 fir hum peechhe mud gaye aur laal saagar ki taraf jaanevale raaste se veerane ke liye ravana huye, theek jaise yahova ne mujhe bataya tha.+ hum kai dinon tak seir ke pahadi ilake ke kinare-kinare safar karte rahe.
2 iske baad yahova ne mujhse kaha,
3 ‘tumhein is pahadi ilake ke paas safar karte kaafi samay ho gaya hai. ab uttar ki taraf mudo.
4 tu logon ko yah aagya dena: “tum seir+ ke kinare-kinare se jaana jo tumhare bhaaiyon ka, esav ke vanshajon ka desh hai.+ jab tum unke ilake ke paas se jaaoge to woh tumse bahot dareinge.+ magar tum is baat ka dhyan rakhna
5 ki tum unhein kisi bhi tarah nahin bhadkaoge kyonki main unke desh ka koi bhi ilaka tumhein nahin doonga, unki zameen mein se paanv dharne bhar ki bhi jagah nahin doonga. mainne seir ka pahadi ilaka esav ke adhikar mein kar diya hai.+
6 tum keemat dekar unse khaana aur paani khareedna.+
7 tumhare parmeshvar yahova ne tumhare har kaam par aasheesh di hai. tumne is bade veerane mein jo safar tay kiya hai, woh parmeshvar achhi tarah jaanta hai. in 40 saalon ke dauran tumhara parmeshvar yahova tumhare saath raha, isliye tumhein kabhi kisi cheez ki kami nahin hui.”’+
8 tab jaise parmeshvar ne hamein aagya di, hum seir ke kinare-kinare nikaal gaye jo hamare bhaaiyon ka, esav ke vanshajon ka ilaka hai.+ hamne arba ka raasta nahin liya aur elat aur esyon-geber+ se door rahe.
iske baad hum mudkar moab ke veerane ke raaste se gaye.+
9 tab yahova ne mujhse kaha, ‘tum moabiyon ko kisi bhi tarah nahin bhadkaoge aur na hi unse yuddh karoge, kyonki main unke desh ka koi bhi ilaka tumhein nahin doonga. mainne aar ka ilaka loot ke in vanshajon ke adhikar mein kar diya hai.+
10 (pehale aar mein emi log+ rehte the, jo anakiyon ki tarah bahot lambe-chaude aur taakatvar the aur taadad mein bahot zyada the.
11 maana jaata tha ki rapai log+ bhi anakiyon+ ki tarah the aur moabee unhein emi log kehte the.
12 seir mein pehale hori log+ rehte the, magar baad mein esav ke vanshajon ne unka naash kar diya aur unke ilake par kabza karke vahaan bas gaye.+ usi tarah israel bhi us desh ko apne kabze mein karega jis par uska adhikar hai kyonki yahova unhein zaroor woh desh de dega.)
13 ab tum log jaakaar jered ghaati paar karo.’ tab hamne jered ghaati paar ki.+
14 kaadesh-barne se paidal safar shuroo karne se lekar jered ghaati paar karne tak hamein 38 saal lage. us vakt tak israeliyon mein se sainikon ki poori peedhi mit chuki thi, theek jaise yahova ne shapath khaakaar unse kaha tha.+
15 yahova ka haath unke khilaf tab tak utha raha jab tak ki woh sabhi chhaavni mein se mit na gaye.+
16 jab sainikon ki poori peedhi mit gayi+ to uske fauran baad,
17 yahova ne mujhse dobara baat ki aur mujhse kaha,
18 ‘aaj tumhein moab ke ilake mein aar ke paas se guzarna hai.
19 jab tum ammoniyon ke ilake ke paas pahunchoge to unhein na to satana, na hi bhadkana kyonki unke desh ka koi bhi ilaka main tumhein nahin doonga. mainne woh ilaka loot ke un vanshajon ke adhikar mein kar diya hai.+
20 woh bhi pehale rapai logon ka ilaka maana jaata tha.+ (pehale vahaan rapai log rehte the jinhein ammoni, jamjummi log kehte the.
21 rapai log anakiyon ki tarah lambe-chaude aur taakatvar the aur taadad mein bahot zyada the.+ magar yahova ne unhein ammoniyon ke saamne se naash kar diya aur ammoniyon ne unhein vahaan se bhaga diya aur woh unke ilake mein bas gaye.
22 parmeshvar ne esav ke vanshajon ki khaatir bhi aisa hi kiya jo ab seir mein reh rahe hain.+ usne hori logon ko esav ke vanshajon ke saamne se naash kar diya+ taaki woh hori logon ke ilake par kabza kar lein aur vahaan bas jaayen aur aaj tak woh vahin base huye hain.
23 aur avvi log door gaaza tak bastiyon mein rehte the.+ jab kaptor* se kaptori log+ aaye to unhonne avvi logon ko naash kar diya aur unki jagah khud bas gaye.)
24 ab tum jaao aur arnon ghaati paar karo.+ dekho, mainne heshbon ke emori raja seehon+ ko tumhare haath mein kar diya hai. isliye uske desh ko apne kabze mein lete jaao aur usse yuddh karo.
25 aaj hi se main dharti par rehnevale* sab logon mein aisa dar faila doonga ki tumhare baare mein sunte hi unka dil dehal jaayega. tumhari vajah se unke beech khalbali mach jaayegi aur woh thar-thar kaanp utheinge.’*+
26 fir mainne kademot veerane+ se apne dooton ko heshbon ke raja seehon ke paas bheja. mainne use shaanti ka yah sandesh bheja:+
27 ‘mujhe apne desh ke ilake se guzarne de. main “raja ki sadak” par hi chaloonga, usse na daayen mudoonga na baayen.+
28 main tujhse jo khaana aur paani loonga, uska daam chuka doonga. bas mujhe apne ilake se paidal jaane ki ijazat de.
29 seir mein esav ke vanshajon ne aur aar mein moabiyon ne mere saath aisa hi kiya tha. mujhe apne ilake se hokar jaane de jab tak ki main yardan paar karke us desh mein na pahunchoon jo hamara parmeshvar yahova hamein dene jaa raha hai.’
30 magar heshbon ke raja seehon ne hamein apne ilake se jaane ki ijazat nahin di. uska dil kathor ho gaya aur woh apni zid par ada raha. tumhare parmeshvar yahova ne use dheeth hi rehne diya+ taaki woh us raja ko tumhare haath mein kar de, jaisa ki abhi hua hai.+
31 fir yahova ne mujhse kaha, ‘dekh, mainne seehon aur uske desh ko tere havale kar diya hai. uske desh par kabza karna shuroo kar de.’+
32 jab seehon apne sab logon ko lekar yahas mein hamse ladne aaya,+
33 to hamare parmeshvar yahova ne use hamare haath mein kar diya. hamne use, uske beton aur uske sabhi logon ko hara diya.
34 hamne uske sabhi shehron par kabza kar liya aur harek shehar ko naash kar diya. hamne vahaan ke sabhi aadmiyon, aurton aur bachchon ko maar daala, ek ko bhi zinda nahin chhoda.+
35 jab hamne un shehron par kabza kiya to hamne sirf vahaan ke jaanvar aur vahaan ka maal loot mein liya.
36 arnon ghaati ke kinare aroer shehar+ (saath hi woh shehar jo ghaati mein hai) se lekar door gilad tak aisa koi bhi shehar nahin tha jise hum hara na sake. hamare parmeshvar yahova ne un saare shehron ko hamare haath mein kar diya tha.+
37 magar tum yabbok ghaati+ ke kinare ke ilake mein nahin gaye jo ammoniyon ka ilaka hai,+ na hi pahadi pradesh ke shehron mein ya kisi aisi jagah gaye jahaan jaane se hamare parmeshvar yahova ne hamein mana kiya tha.
kai footnote
^ yaani krete.
^ shaa., “aakash ke neeche se.”
^ ya “unhein bachcha janne jaisa dard hoga.”
