vyavasthavivran 29:1-29
29 jab israeli moab desh mein the tab yahova ne moosa ko aagya di ki woh unke saath ek karar kare. isse pehale parmeshvar ne horeb mein unke saath ek karar kiya tha.+ moab mein kiye karar ki baatein ye hain.
2 moosa ne sabhi israeliyon ko bulaya aur unse kaha, “tumne khud apni aankhon se dekha hai ki yahova ne misra mein firaun aur uske sab adhikariyon aur uske poore desh ka kya hashra kiya tha.+
3 tumne dekha ki usne kaise unhein kadi-se-kadi saza di aur bade-bade chinh aur chamatkar kiye.+
4 fir bhi yahova ne tumhein aaj tak samajhne ke liye man, dekhne ke liye aankhein aur sunnae ke liye kaan nahin diye.+
5 usne tumse kaha, ‘main 40 saal tak veerane mein tumhare saath rehkar tumhein raah dikhata raha+ aur us dauran na tumhare kapde purane hokar fate, na hi tumhare pairon ki jootiyaan ghisin.+
6 tumhare paas khaane ke liye roti ya peene ke liye daakh-madira ya koi aur sharab nahin thi, fir bhi mainne tumhari dekhbhal ki taaki tum jaan lo ki main tumhara parmeshvar yahova hoon.’
7 tum safar karte-karte jab is jagah pahunche to heshbon ka raja seehon+ aur baashaan ka raja og+ hamse yuddh karne aaye, magar hamne unhein hara diya.+
8 fir hamne unka ilaka le liya aur roobeniyon, gaadiyon aur manashshe ke aadhe gotra ko de diya taaki yah unki virasat ki zameen ho.+
9 isliye tum is karar ke niyamon aur aagyaon ka paalan karna. tab tum apne har kaam mein kaamyab hoge.+
10 aaj tum sab apne parmeshvar yahova ke saamne haazir ho, sabhi gotron ke pradhan, mukhiya, adhikari, israel ke sabhi aadmi,
11 aurtein,+ bachche, tumhari chhaavni mein rehnevale pardesi,+ yahaan tak ki tumhare liye lakdi beennevale aur paani bharnevale, sab-ke-sab.
12 tum yahaan isliye ho ki tum apne parmeshvar yahova ke saath ek karar mein bandh sako. aaj tumhara parmeshvar yahova shapath khaakaar tumhare saath yah karar kar raha hai+
13 jisse ki woh aaj tumhein apne log bana sake+ aur woh tumhara parmeshvar thahre,+ theek jaise usne tumse aur tumhare purkhon se, abraham,+ ishaak+ aur yakub+ se shapath khaakaar vaada kiya tha.
14 main shapath khaakaar yah karar na sirf tum logon ke saath kar raha hoon
15 jo aaj hamare parmeshvar yahova ke saamne haazir hain balki aanevali peedhi ke* saath bhi kar raha hoon.
16 (tum log achhi tarah jaante ho ki hamne misra mein kaisi zindagi bitayi thi aur apne safar mein hum kin-kin jaatiyon ke beech se guzre the.+
17 tum un jaatiyon ki ghinauni cheezen dekhte the: lakdi, patthar aur sone-chaandi se bani ghinauni moortein.*)+
18 saavdhan rehna ki tumhare beech aisa koi aadmi, aurat, parivar ya gotra na ho jiska man aaj hamare parmeshvar yahova se fir jaaye aur woh un jaatiyon ke devtaon ki seva karne lage.+ woh aise paudhe ki jad jaisa hoga jo zahreele fal aur naagdauna paida karta hai.+
19 lekin agar koi yah shapath sunnae ke baad bhi ghamand se foolkar apne man mein sochta hai, ‘main to apni man-marzee karoonga, mera kuch bura nahin hoga,’ jisse woh apne raaste mein aanevali har cheez* ko naash karta hai,
20 to yahova use hargiz maaf nahin karega.+ yahova ke krodh ki jvala us par bhadak uthegi aur is kitab mein jitne bhi shaap likhe hain woh sab us par aa padeinge+ aur yahova dharti se* uska naam mita dega.
21 yahova use israel ke sab gotron mein se alag karega aur kaanoon ki is kitab mein jo bhi shaap bataye gaye hain sab us par laayega aur use tabah kar dega.
22 tumhari aanevali peedhi aur door desh se aanevale pardesi dekheinge ki tumhare desh par kaisi museebatein aayi hain. woh dekheinge ki yahova ne tumhare desh par kya-kya kehar dhaaye,
23 namak, aag aur gandhak barsakar poore desh ko naash kar diya aur use jutai-boaaee ke laayak na chhoda aur uski yah haalaat kar di ki vahaan ghaas tak nahin ugti aur poora desh sadom, amora,+ adma aur saboyeem+ jaisa ho gaya hai jinhein yahova ne gusse aur krodh mein aakaar naash kar diya tha.
24 jab tumhare vanshaj, pardesi aur sab raashtron ke log yah dekheinge to kaheinge, ‘aakhir yahova ne is desh ka yah haal kyon kiya?+ kyon woh gusse se itna bhadak utha?’
25 fir woh kaheinge, ‘yah isliye hua kyonki in logon ne apne purkhon ke parmeshvar yahova ka karar tod diya.+ usne misra se unhein nikaalne ke baad unke saath jo karar kiya tha use maanna chhodkar+
26 woh doosre devtaon ki seva karne lage aur unke aage dandvat karne lage jinhein woh nahin jaante the aur jinki pooja karne se parmeshvar ne unhein mana kiya tha.*+
27 tab yahova ke krodh ki jvala us desh par bhadak uthi aur woh us par woh saare shaap le aaya jo is kitab mein likhe hain.+
28 yahi vajah hai ki yahova ne gusse, krodh aur jaljalahat mein aakaar unhein unke desh se ukhaad diya+ aur ek paraye desh mein bhej diya jahaan woh aaj hain.’+
29 jo baatein gupt hain woh hamare parmeshvar yahova ke adhikar mein hain,+ magar jo baatein zahir ki gayi hain woh hamein aur hamare vanshajon ko sada ke liye di gayi hain taaki hum is kaanoon ki saari baaton par amal kar sakein.+
kai footnote
^ shaa., “jo aaj hamare saath nahin hain unke.”
^ inka ibrani shabd shaayad “mal” ke liye istemal honevale shabd se sambandh rakhta hai aur yah batane ke liye istemal hota hai ki kisi cheez se kitni ghin ki jaa rahi hai.
^ shaa., “sookhe ke saath-saath sinche huye.”
^ shaa., “aakash ke neeche se.”
^ shaa., “parmeshvar ne unke hisse mein nahin diya tha.”
