yahejkel 12:1-28
12 yahova ka sandesh ek baar fir mere paas pahuncha. usne mujhse kaha,
2 “insan ke bete, tu jin logon ke beech rehta hai woh bagavti gharane ke log hain. unki aankhein to hain magar woh dekhte nahin, unke kaan to hain magar sunte nahin+ kyonki woh bagavti gharane ke log hain.+
3 insan ke bete, tu bandhuai mein jaane ke liye saaman baandh le aur din ke vakt jab log tujhe dekh rahe hon tab apna saaman lekar aise nikaal jaise tu bandhuai mein jaa raha hai. tu logon ke dekhte apne ghar se kisi aur jagah bandhuai mein jaa. haalanki woh bagavti gharane ke log hain, fir bhi ho sakta hai woh tujh par dhyan dein.
4 tu bandhuai ka saaman lekar logon ke dekhte din ke vakt baahar nikaal aur shaam ko unke dekhte aise nikaal maano tujhe bandi banakar le jaaya jaa raha hai.+
5 tu logon ke dekhte deevar mein ek chhed kar aur apni cheezen lekar chhed mein se us paar nikaal jaa.+
6 jab andhera hoga tab tu unke dekhte apni cheezen kandhe par rakhkar nikaal jaa. tu apna chehra dhak le taaki tu zameen ko na dekh sake kyonki mainne tujhe israel ke gharane ke liye ek chinh thehraya hai.”+
7 mainne theek vaise hi kiya jaise mujhe aagya di gayi thi. din ke vakt mainne apna saaman nikaala jaise koi bandhuai mein jaane ke liye saaman paayenge hai. aur shaam ko mainne apne haath se deevar mein chhed kiya. jab andhera hua to mainne apna saaman uthaya aur kandhe par rakhkar logon ke dekhte nikaal pada.
8 subah hone par yahova ka sandesh ek baar fir mere paas pahuncha. usne mujhse kaha,
9 “insan ke bete, israel ke bagavti gharane ke logon ne tujhse poochha hai ki tu kya kar raha hai.
10 tu unse kehna, ‘saare jahan ka maalik yahova kehta hai, “yah sandesh yarooshalem shehar mein rehnevale pradhan+ aur israel ke poore gharane ke baare mein hai.”’
11 tu unse kehna ki tu unke liye ek chinh hai+ aur jaisa toone kiya hai vaisa hi unke saath kiya jaayega. unhein bandi banakar door desh bhej diya jaayega.+
12 jo unka pradhan hai woh apna saaman kandhe par rakhkar andhere mein niklega. woh deevar mein ek chhed karega aur apna saaman lekar chhed mein se us paar niklega.+ woh apna chehra dhak lega isliye woh zameen nahin dekh sakega.
13 main us par apna jaal daaloonga aur woh usmein fans jaayega.+ fir main use kasdiyon ke desh baibilon le jaaunga, magar woh us desh ko nahin dekhega aur vahin mar jaayega.+
14 uske sabhi sahayakon aur sainikon ko, jo uske aas-paas rehte hain, main chaaron dishaon mein titar-bitar kar doonga.+ aur main talvar khinchkar unka peechha karoonga.+
15 jab main unhein alag-alag deshon mein bikhra doonga aur vahaan titar-bitar kar doonga to unhein jaanna hoga ki main yahova hoon.
16 magar main unmein se kuch logon ko chhod doonga. woh talvar, akaal aur mahamari ki maar se bach jaayenge taaki woh jin raashtron mein jaayenge, vahaan logon ko bata sakein ki unhonne kaise-kaise ghinaune kaam kiye the. tab unhein jaanna hoga ki main yahova hoon.”
17 yahova ka sandesh ek baar fir mere paas pahuncha. usne mujhse kaha,
18 “insan ke bete, tu darte-kaanpte huye apni roti khaana aur badi pareshani aur chinta mein doobe huye paani peena.+
19 tu desh ke logon se kehna, ‘saare jahan ka maalik yahova israel desh ke yarooshalem ke nivasiyon se kehta hai, “woh gehri chinta mein doobe huye apni roti khaayenge aur khauf mein jeete huye paani peeyenge kyonki desh mein rehnevalon ne jo maar-kaat macha rakhi hai, uski vajah se unka desh poori tarah ujaad diya jaayega.+
20 jo shehar logon se aabad hain, woh ujaad diye jaayenge aur desh ki poori zameen banjar ho jaayegi.+ tab tumhein jaanna hoga ki main yahova hoon.”’”+
21 yahova ka sandesh ek baar fir mere paas pahuncha. usne mujhse kaha,
22 “insan ke bete, israel mein yah kaisi kahavat chali hai, ‘din guzarte jaa rahe hain par ek bhi darshan poora nahin hua’?+
23 isliye tu unse kehna, ‘saare jahan ka maalik yahova kehta hai, “main is kahavat ka ant kar doonga taaki israel mein yah fir kabhi logon ki zaban par na aaye.”’ aur tu unse kehna, ‘woh din bahot kareeb hain+ jab ek-ek darshan poora hoga.’
24 iske baad fir kabhi israel ke gharane mein koi bhi jhootha darshan ya chikni-chupdi baaton ki* bhavishyavani nahin suni jaayegi.+
25 ‘“kyonki main yahova baat karoonga aur main jo kuch kahoonga woh bina deri ke poora ho jaayega.+ bagavti gharane ke logo, main tumhare jeete-ji+ apni baat kahoonga aur use poora bhi karoonga.” saare jahan ke maalik yahova ka yah ailan hai.’”
26 yahova ka sandesh ek baar fir mere paas pahuncha. usne mujhse kaha,
27 “insan ke bete, israel ke logon* ka kehna hai, ‘yah aadmi jo darshan dekhta hai woh ek arse baad jaakaar poora hoga aur iski bhavishyavaniyaan bahot samay baad poori hongi.’+
28 isliye tu unse kehna, ‘saare jahan ka maalik yahova kehta hai, “‘meri kisi bhi baat ke poore hone mein der nahin hogi. main jo kehta hoon woh hokar hi rahega.’ saare jahan ke maalik yahova ka yah ailan hai.”’”
