yahejkel 14:1-23
14 israel ke kuch mukhiya mere paas aaye aur mere saamne baithe.+
2 fir yahova ka yah sandesh mere paas pahuncha:
3 “insan ke bete, in aadmiyon ne apni ghinauni moorton* ke peechhe chalne ki thaan li hai aur logon ke saamne thokar ka patthar rakh diya hai jo unse paap karvata hai. ab yahi aadmi meri marzee jaanne tere paas aaye hain. main unhein apni marzee kyon bataun?+
4 un aadmiyon se kehna, ‘saare jahan ka maalik yahova kehta hai, “agar ek israeli ne apni ghinauni moorton ke peechhe chalne ki thaan li hai aur woh logon ke saamne thokar ka patthar rakhta hai, jo unse paap karvata hai aur fir meri marzee jaanne ke liye ek bhavishyavakta ke paas aata hai, to main yahova use utni kadi saza doonga jitni ki uski ghinauni moortein hain.
5 main israel ke gharane ke logon ke dilon mein dar bitha doonga* kyonki un sabne mujhe chhod diya hai aur apni ghinauni moorton ke peechhe chalne lage hain.”’+
6 isliye israel ke gharane se kehna, ‘saare jahan ka maalik yahova kehta hai, “tum sab mere paas laut aao, apni ghinauni moorton aur apne sab ghinaune kaamon se munh fer lo,+
7 kyonki agar koi israeli ya israel mein rehnevala koi pardesi khud ko mujhse alag kar deta hai aur apni ghinauni moorton ke peechhe chalne ki thaan leta hai aur logon ke saamne thokar ka patthar rakhta hai jo unse paap karvata hai aur fir mere bhavishyavakta ke paas meri marzee jaanne aata hai,+ to main yahova khud us aadmi ko javab doonga.
8 main us aadmi ke khilaf ho jaaunga aur uska aisa hashra karoonga ki usse doosron ko sabak mile aur us par ek kahavat ban jaaye. main use apne logon ke beech se naash kar doonga+ aur tumhein jaanna hoga ki main yahova hoon.”’
9 ‘lekin agar woh bhavishyavakta moorkh ban jaata hai aur usse poochhtachh karnevale aadmi ko koi bhavishyavani sunata hai, to jaan lena ki us bhavishyavakta ko mujh yahova ne hi moorkh banaya hai.+ main uske khilaf apna haath badhaunga aur use apni praja israel ke beech se mita doonga.
10 us bhavishyavakta aur usse poochhtachh karnevale aadmi donon ko apne dosh ki saza milegi, poochhtachh karnevala utna hi doshi thehrega jitna ki woh bhavishyavakta.
11 aisa isliye hai taaki israel ka gharana mujhse door jaakaar bhatakna aur apne sabhi apradhon se khud ko dooshit karna chhod de. tab woh mere log honge aur main unka parmeshvar hounga.’+ saare jahan ke maalik yahova ka yah ailan hai.”
12 yahova ka sandesh ek baar fir mere paas pahuncha. usne mujhse kaha,
13 “insan ke bete, agar ek desh mujhse vishvasghat karke mere khilaf paap kare to main uske khilaf apna haath badhaunga aur uski khaane-peene ki cheezon ka bhandar nasht kar doonga.*+ main desh mein akaal bhejoonga+ aur insan aur jaanvar, donon ko vahaan se mita doonga.”+
14 “saare jahan ka maalik yahova ailan karta hai, ‘agar us desh mein nooh,+ daaniyel+ aur ayyoob+ bhi hon, to ye teenon aadmi apni neki ki vajah se sirf apni jaan bacha paayenge.’”+
15 “‘agar main poore desh mein khoonkhar jangli jaanvaron ko bhejoonga to woh sab logon ko khaakaar desh khaali kar deinge* aur use veeran bana deinge. aur jangli jaanvaron ke dar se vahaan se koi aa-jaa nahin sakega.+
16 main apne jeevan ki shapath khaakaar kehta hoon, agar us desh mein ye teenon aadmi hon to bhi ye apne bete-betiyonn ko nahin bacha paayenge. ye sirf khud ko bacha paayenge aur poora desh ujaad ho jaayega.’ saare jahan ke maalik yahova ka yah ailan hai.”
17 “‘agar main us desh par talvar chalvaun+ aur kahoon, “poore desh mein talvar chalayi jaaye,” to main insan aur jaanvar donon ko maar daaloonga.+
18 main apne jeevan ki shapath khaakaar kehta hoon, agar us desh mein ye teenon aadmi hon to bhi ye apne bete-betiyonn ko nahin bacha paayenge. ye sirf khud ko bacha paayenge.’ saare jahan ke maalik yahova ka yah ailan hai.”
19 “‘agar main us desh par mahamari le aaun+ aur us par apne krodh ka pyala undeloon aur insanon aur jaanvaron ko mitane ke liye khoon ki nadiyaan baha doon
20 to main apne jeevan ki shapath khaakaar kehta hoon ki chahe us desh mein nooh,+ daaniyel+ aur ayyoob+ rehte hon to bhi ye aadmi apne bete-betiyonn ko nahin bacha paayenge. ye apni neki ki vajah se sirf khud ko bacha paayenge.’ saare jahan ke maalik yahova ka yah ailan hai.”+
21 “saare jahan ka maalik yahova kehta hai, ‘yarooshalem ka yahi haal hoga jab main use in chaar tareekon se yaani talvar, akaal, khoonkhar jangli jaanvar aur mahamari se saza doonga+ aur insan aur jaanvar, donon ko mita doonga.+
22 magar unmein se kuch aadmi-aurat bach jaayenge aur unhein desh se baahar le jaaya jaayega.+ woh tumhare paas aayenge aur jab tum unke taur-tareeke aur unke kaam dekhoge, to tumhein zaroor is baat se tasalli milegi ki mainne yarooshalem par itna bada kehar dhaaya aur uske saath yah sab kiya.’”
23 “‘jab tum unke taur-tareeke aur unke kaam dekhoge to tumhein is baat se tasalli milegi ki mujhe yarooshalem ke saath jo bhi karna pada woh bevajah nahin tha.’+ saare jahan ke maalik yahova ka yah ailan hai.”
kai footnote
^ inka ibrani shabd shaayad “mal” ke liye istemal honevale shabd se sambandh rakhta hai aur yah batane ke liye istemal hota hai ki kisi cheez se kitni ghin ki jaa rahi hai.
^ shaa., “israel ke gharane ke dilon ko apne kabze mein kar loonga.”
^ shaa., “tumhari roti ke chhad tod doonga.” shaayad yahaan roti latkanevale chhadon ki baat ki gayi hai.
^ ya “woh desh ke bachchon ko maarkar usse chheen leinge.”
