yahoshoo 10:1-43
10 yarooshalem ke raja adoni-sedek ne suna ki yahoshoo ne ai par kabza karke uska naash kar diya hai. aur ai aur uske raja ka vahi hashra kiya hai+ jo usne yareeho aur uske raja ka kiya tha.+ usne yah bhi suna ki gibon ke logon ne israeliyon ke saath shaanti ka karar kiya hai+ aur unke beech rehne lage hain.
2 yah sab sunkar adoni-sedek ki raaton ki nind ud gayi+ kyonki gibon bhi un shehron jitna bada aur shaktishali tha, jin par raja raaj karte the. gibon shehar, ai se bhi zyada taakatvar tha+ aur uske sabhi aadmi veer yoddha the.
3 isliye yarooshalem ke raja adoni-sedek ne hebron+ ke raja hoham, yarmoot ke raja piram, laakeesh ke raja yaapi aur eglon ke raja+ dabir ko yah sandesh bheja,
4 “mujhe tumhari madad chahiye. giboniyon ne yahoshoo aur israeliyon ke saath shaanti ka karar kar liya hai,+ isliye aao hum un par hamla bol dein.”
5 tab yarooshalem, hebron, yarmoot, laakeesh aur eglon ke raja apni-apni senaon ke saath ikattha huye. paanchon emori+ raja nikaal pade aur unhonne gibon se ladne ke liye chhaavni daali.
6 tab gibon ke aadmiyon ne yahoshoo ko, jo gilgal mein dera daale huye tha,+ yah sandesh bheja, “hamein bacha le! pahadi pradesh ke sabhi emori raja hamse yuddh karne ke liye ikattha ho gaye hain. jaldi aakaar hamari raksha kar, apne daason ko besahara mat chhod.”*+
7 tab yahoshoo apne sabhi sainikon aur veer yoddhaon ko saath lekar gilgal se ravana ho gaya.+
8 yahova ne yahoshoo se kaha, “unse mat dar+ kyonki mainne unko tere haath kar diya hai.+ unmein se koi bhi tere saamne nahin tik paayega.”+
9 yahoshoo ne gilgal se raat-bhar ka safar tay kiya aur achanak dushmanon par hamla bol diya.
10 yahova ne israeliyon ke saamne unke beech khalbali macha di+ aur israeliyon ne gibon mein bhaari taadad mein dushmanon ko maar daala. woh oopar bet-horon ki chadhai par unka peechha karte gaye aur unhein ajeka aur makkeda tak maarte gaye.
11 jab emori, israeliyon se jaan bachakar bet-horon se neeche ki taraf bhaagne lage, to yahova ne aasman se un par bade-bade ole barsaye. bet-horon se ajeka tak un par ole baraste gaye aur woh mar gaye. israeliyon ne talvar se jitnon ko maara tha usse kahin zyada log olon se maare gaye.
12 jis din yahova ne israeliyon ke saamne emoriyon ko haraya, us din yahoshoo ne yahova se kaha aur israeliyon ke saamne pukara,
“hey sooraj, gibon par tham jaa,+hey chaand, ayyalon ghaati par thahar jaa.”
13 isliye sooraj aur chaand tham gaye aur tab tak thahre rahe jab tak ki israeliyon ne apne dushmanon ko hara na diya. kya yah baat yaashar ki kitab+ mein nahin likhi hai ki sooraj aasman ke beechon-beech tham gaya tha aur poore ek din tak nahin dooba?
14 na to isse pehale, na hi iske baad aisa koi din aaya, jab yahova ne ek insan ki baat sunkar aisa kiya ho.+ kyonki yahova, israel ki taraf se lad raha tha.+
15 fir yahoshoo sabhi israeliyon ke saath gilgal mein apni chhaavni mein laut aaya.+
16 is beech emoriyon ke paanchon raja bhaag gaye aur jaakaar makkeda+ mein ek gufa mein chhip gaye.
17 yahoshoo ko khabar di gayi ki woh paanchon raja makkeda+ ki ek gufa mein chhipe huye hain.
18 tab yahoshoo ne kaha, “gufa ka munh bade-bade pattharon se band kar do aur kuch aadmiyon ko pehre par bithao.
19 baaki sainik dushmanon ka peechha karein aur peechhe se un par hamla karke unhein maar daalein.+ unhein apne shehron mein ghusne ka mauka mat do. tumhare parmeshvar yahova ne unhein tumhare haath mein kar diya hai.”
20 yahoshoo aur israeliyon ne itni bhaari taadad mein emori sainikon ko maara ki unki sena lagbhag mit gayi. bas chand aadmi zinda bache aur woh mazboot gadhvale shehron mein bhaag gaye.
21 iske baad sabhi israeli sahi-salamat yahoshoo ke paas makkeda ki chhaavni mein laut aaye. kisi ne bhi israeliyon ke khilaf kuch bolne ki jurrat nahin ki.*
22 fir yahoshoo ne aagya di, “gufa ke munh se patthar hatao aur un paanchon raajaon ko baahar mere paas laao.”
23 unhonne aisa hi kiya. woh yarooshalem, hebron, yarmoot, laakeesh aur eglon ke raja+ ko gufa se nikaalkar yahoshoo ke paas le aaye.
24 jab ye raja yahoshoo ke paas laaye gaye, to usne israel ke sabhi aadmiyon ko bulvaya aur un senapatiyon se jo uske saath yuddh mein gaye the kaha, “tum sab aage badho aur in raajaon ki gardan par apna paanv rakho.” woh aage aaye aur unhonne raajaon ki gardan par apne paanv rakhe.+
25 fir yahoshoo ne unse kaha, “tum darna mat aur na hi khauf khaana.+ himmat se kaam lena aur hausla rakhna. kyonki yahova tumhare sabhi dushmanon ko jinse tum yuddh karoge, isi tarah tumhare adheen kar dega.”+
26 iske baad yahoshoo ne un raajaon ko maar daala aur unhein paanch kaathon* par latka diya. un sabki laashein shaam tak kaathon par hi rahin.
27 sooraj doobne par yahoshoo ne aadesh diya ki unki laashein kaathon se utar do+ aur usi gufa mein feink do jahaan woh chhipe huye the. unki laashein gufa mein feink di gayin aur uska munh bade-bade pattharon se band kar diya gaya. ye patthar aaj bhi vahin hain.
28 usi din yahoshoo ne makkeda par bhi kabza kar liya+ aur talvar se uske raja aur uske sabhi logon ko poori tarah khatm kar diya, kisi ko bhi zinda nahin chhoda.+ usne makkeda ke raja ka vahi hashra kiya+ jo usne yareeho ke raja ka kiya tha.
29 fir yahoshoo sab israeliyon ke saath makkeda se libna ki taraf badha aur unhonne libna se yuddh kiya.+
30 yahova ne libna aur uske raja+ ko bhi unke haath kar diya. unhonne libna ke sabhi logon ko talvar se maar daala, kisi ko bhi zinda nahin chhoda. unhonne libna ke raja ka vahi hashra kiya jo unhonne yareeho ke raja ka kiya tha.+
31 libna ke baad yahoshoo sab israeliyon ko lekar laakeesh+ ki taraf badha aur unhonne vahaan chhaavni daali aur laakeesh se yuddh kiya.
32 yahova ne laakeesh ko israel ke haath kar diya aur agle din unhonne us par kabza kar liya. unhonne laakeesh ke sabhi logon ko talvar se maar daala,+ theek jaise unhonne libna ke logon ko maar daala tha.
33 gejer ka raja+ horam, laakeesh ki madad karne aaya tha magar yahoshoo ne horam aur uske logon ko maar daala, kisi ko bhi nahin chhoda.
34 fir yahoshoo sab israeliyon ke saath laakeesh se eglon+ ki taraf badha. unhonne vahaan chhaavni daali aur eglon se yuddh kiya.
35 us din unhonne eglon par kabza kar liya aur uske sab logon ko talvar se khatm kar diya, theek jaise unhonne laakeesh ke logon ko khatm kiya tha.+
36 fir yahoshoo sab israeliyon ke saath eglon se hebron+ ki taraf badha aur unhonne hebron se yuddh kiya.
37 unhonne hebron par kabza kar liya aur us shehar ke raja ko, vahaan ke sabhi logon aur uske aas-paas ke nagron ke logon ko talvar se maar daala, kisi ko bhi zinda nahin chhoda. yahoshoo ne hebron aur uske sabhi logon ko poori tarah mita diya, theek jaise usne eglon ko mitaya tha.
38 aakhir mein yahoshoo sab israeliyon ke saath dabir+ ki taraf badha aur unhonne dabir se yuddh kiya.
39 yahoshoo ne dabir par kabza kar liya aur vahaan ke raja, uske logon aur aas-paas ke nagron ke logon ko talvar se poori tarah khatm kar diya,+ kisi ko bhi zinda nahin chhoda.+ usne dabir aur uske raja ka vahi hashra kiya jo usne hebron aur libna ka aur unke raajaon ka kiya tha.
40 is tarah yahoshoo ne poore desh ko yaani pahadi pradesh, negeb, shafelah+ aur dhalanon ko aur unke raajaon ko jeet liya aur vahaan kisi ko bhi zinda nahin chhoda. usne ek-ek ko maar daala,+ theek jaisa israel ke parmeshvar yahova ne aagya di thi.+
41 yahoshoo ne kaadesh-barne+ se lekar gaaza+ tak ka ilaka, goshen+ ka poora ilaka aur gibon+ tak ka ilaka apne kabze mein kar liya.
42 yahoshoo ne vahaan ke sabhi raajaon ko ek-ek karke hara diya aur unka desh le liya kyonki israel ka parmeshvar yahova unki taraf se lad raha tha.+
43 fir yahoshoo sabhi israeliyon ke saath gilgal mein apni chhaavni mein laut aaya.+
