yahoshoo 23:1-16
23 yahova ne israel ko uske aas-paas ke sabhi dushmanon se mehfooz rakha aur unhein chain dilaya.+ ab bahot din beet chuke the. yahoshoo boodha ho chala tha aur uski umra dhal chuki thi.+
2 usne sabhi israeliyon ko, unke mukhiyaon, pradhanon, nyayiyon aur adhikariyon+ ko ikattha kiya.+ usne unse kaha, “ab main boodha ho gaya hoon aur meri umra dhal chuki hai.
3 tumne khud apni aankhon se dekha ki tumhare parmeshvar yahova ne tumhari khaatir dushman raashtron ke saath kya-kya kiya. haan, yahova hi tumhari taraf se lad raha tha.+
4 yardan se pashchim mein mahasagar* tak jitne bhi raashtra the, unhein mainne khaded diya+ aur unka desh tumhein diya.*+ haalanki kuch abhi-bhi reh gaye hain lekin yah desh tumhara hai.
5 tumhare parmeshvar yahova ne hi tumhare saamne se unhein khadeda+ aur unhein yahaan se nikaala aur tumne unke desh ko apne adhikar mein kar liya, theek jaisa tumhare parmeshvar yahova ne tumse vaada kiya tha.+
6 ab tumhein moosa ke kaanoon ki kitab mein likhi saari baaton ka paalan karne+ aur us par chalne ke liye himmat dikhani hogi. tum isse na to daayen mudna na baayen,+
7 na hi un raashtron ke logon ke saath mel-jol rakhna+ jo tumhare beech rehte hain. tum na to unke devtaon ke naam pukarna,+ na hi unki kasam khaana. tum unki upasna na karna aur na hi unke saamne dandvat karna.+
8 iske bajay tum apne parmeshvar yahova se lipte rehna,+ jaisa tum aaj tak karte aaye ho.
9 yahova tumhare saamne se bade aur shaktishali raashtron ko nikaal dega+ kyonki aaj tak tumhare saamne ek bhi aadmi nahin tik paaya.+
10 tumhara ek aadmi unke hazar aadmiyon ko khaded dega+ kyonki tumhara parmeshvar yahova tumhari taraf se ladega,+ jaisa usne tumse vaada kiya tha.+
11 isliye tum hamesha is baat ka dhyan rakhna+ ki tum apne parmeshvar yahova se pyar karte raho.+
12 lekin agar tum parmeshvar ko chhod doge aur un raashtron ke logon se mil jaaoge jo tumhare beech reh gaye hain,+ unse shaadi karke rishtedari karoge+ aur mel-jol rakhoge
13 to jaan lo, tumhara parmeshvar yahova in raashtron ko tumhare liye fir nahin khadedega.+ woh tumhare liye fanda aur jaal ban jaayenge. woh tab tak tumhari peeth par kodon ki tarah barseinge+ aur tumhari aankhon mein kaanton ki tarah chubheinge, jab tak ki tum is badhiya desh se mit nahin jaate jise tumhare parmeshvar yahova ne tumhein diya hai.
14 dekho, ab main zyada din nahin jeeunga.* tum achhi tarah jaante ho ki tumhare parmeshvar yahova ne tumse jitne bhi behtareen vaade kiye the woh sab-ke-sab poore huye, ek bhi vaada bina poora huye nahin raha.+
15 magar jis tarah yahova ne apne saare behtareen vaade poore kiye,+ usi tarah museebatein* laane ke baare mein yahova ne jo-jo kaha tha, use bhi poora karega aur yahova tumhein is badhiya desh se mita daalega jo usne tumhein diya hai.+
16 agar tum apne parmeshvar yahova ke us karar ko todoge jise maanne ki aagya usne tumhein di hai aur agar tum doosre devtaon ke aage dandvat karoge aur unki seva karoge, to yahova ka krodh tum par bhadak uthega.+ aur dekhte-hi-dekhte tum is badhiya desh se jo parmeshvar ne tumhein diya hai, mit jaaoge.”+
kai footnote
^ yaani bhoomadhya saagar.
^ ya “chitthiyaan daalkar baanta.”
^ shaa., “main duniya ki reet ke mutabik jaa raha hoon.”
^ ya “shaap.”
