yahoshoo 4:1-24
-
ye patthar yaad dilayenge (1-24)
4 jaise hi poore raashtra ne yardan ko paar kiya, yahova ne yahoshoo se kaha,
2 “logon mein se 12 aadmiyon ko bula, har gotra mein se ek aadmi.+
3 aur unhein yah aagya de, ‘yardan ke beechon-beech jahaan yaajak khade hain,+ vahaan se 12 bade patthar uthao aur unhein nadi ke paar us jagah le jaakaar khada karo jahaan aaj tum raat bitaoge.’”+
4 tab yahoshoo ne 12 aadmiyon ko bulaya jinhein usne israeliyon mein se chuna tha, har gotra se ek aadmi.
5 usne unse kaha, “tum apne parmeshvar yahova ke sandook ke aage yardan ke beech mein jaao. aur israel ke har gotra ki ginti ke hisab se ek patthar apne kandhe par uthakar le jaao.
6 ye patthar tumhein yaad dilayenge ki parmeshvar ne tumhare liye kya kiya tha. aage chalkar jab tumhare bete tumse poochhein, ‘ye patthar yahaan kyon hain?’+
7 to unse kehna, ‘jab yahova ke karar ka sandook yardan ke paar le jaaya gaya, to uske aage yardan ka paani behena band ho gaya tha.+ ye patthar yahaan isliye khade kiye gaye hain ki israel ke logon ko hamesha is ghatna ki yaad dilayen.’”+
8 yahoshoo ne jaisa kaha israeliyon ne vaisa hi kiya. un aadmiyon ne israel ke har gotra ki ginti ke hisab se yardan ke beech mein se 12 patthar uthaye. woh unhein us jagah le aaye jahaan woh raat bitanevale the aur vahin unhein khada kar diya, theek jaise yahova ne yahoshoo ko hidayat di thi.
9 yahoshoo ne yardan ke beechon-beech bhi 12 patthar khade kiye, jahaan yaajak karar ka sandook uthaye huye the.+ ye patthar aaj tak vahin par hain.
10 sandook uthanevale yaajak tab tak khade rahe jab tak logon ne woh sabkuch nahin kar liya, jiski aagya yahova ne yahoshoo ko di thi aur jiske baare mein moosa ne yahoshoo se kaha tha. is dauran log furti se nadi paar karte rahe.
11 jab saare log nadi paar kar chuke, to unke dekhte-dekhte yaajak bhi yahova ka sandook uthaye yardan ke paar aa gaye.+
12 rooben aur gaad ke vanshaj aur manashshe ke aadhe gotra bhi sainikon ki tarah alag-alag dal baandhkar baaki israeliyon se pehale nadi ke us paar gaye,+ theek jaise moosa ne unhein hidayat di thi.+
13 yuddh ke liye taiyar kareeb 40,000 sainik yahova ke saamne nadi paar kar yareeho ke veerane mein aaye.
14 us din yahova ne yahoshoo ko sabhi israeliyon ki nazar mein uncha uthaya+ aur unhonne yahoshoo ke jeevan-bhar use gehra aadar diya,* jaise unhonne moosa ko diya tha.+
15 fir yahova ne yahoshoo se kaha,
16 “gavahi ka sandook+ uthanevale yaajkon ko aagya de ki woh yardan se nikaalkar is paar aa jaayen.”
17 tab yahoshoo ne yaajkon ko aagya di, “yardan se nikaalkar is paar aa jaao.”
18 yahova ke karar ka sandook uthanevale yaajak+ yardan ke beech se kinare aaye. jaise hi unhonne baahar sookhi zameen par kadam rakha, yardan ka paani fir se umadne laga aur tat ke oopar behene laga.+
19 is tarah pehale maheene ke dasvein din logon ne yardan ko paar kiya aur yareeho ki poorvi sarhad ke paas gilgal mein apna padav daala.+
20 jo 12 patthar unhonne yardan mein se liye the, unhein yahoshoo ne gilgal mein khada kiya.+
21 fir usne israeliyon se kaha, “bhavishya mein jab kabhi tumhare bachche tumse poochhein, ‘ye patthar kyon khade kiye gaye hain?’+
22 to tum unhein samjhana, ‘israeliyon ne yardan ki sookhi zameen par chalkar use paar kiya tha.+
23 tumhare parmeshvar yahova ne hamare saamne uska paani sukha diya tha taaki hum use paar kar sakein, theek jaise tumhare parmeshvar yahova ne hamare saamne laal saagar ka paani sukha diya tha aur saare israeliyon ne use paar kiya tha.+
24 usne yah isliye kiya taaki dharti ke sab log jaan jaayen ki yahova ka haath kitna shaktishali hai+ aur tum bhi hamesha apne parmeshvar yahova ka dar maano.’”
kai footnote
^ shaa., “uska dar maante rahe.”
