yirmayah 38:1-28
38 mattan ke bete shaptyah, pashhoor ke bete gadalyah, shelemyah ke bete yookal+ aur malkiyah ke bete pashhoor+ ne yirmayah ko sab logon se yah kehte suna:
2 “yahova kehta hai, ‘jo koi is shehar mein hi rahega woh talvar, akaal aur mahamari* se maara jaayega.+ lekin jo koi khud ko kasdiyon ke havale kar dega* woh zinda rahega, apni jaan bacha lega* aur woh jeeta rahega.’+
3 yahova kehta hai, ‘yah shehar zaroor baibilon ke raja ki sena ke haath mein kar diya jaayega aur woh is par kabza kar lega.’”+
4 haakimon ne raja se kaha, “is aadmi ko marva de+ kyonki yah aisi baatein kehkar shehar mein bache sainikon aur sab logon ka hausla tod raha hai.* yah aadmi logon ki bhalai nahin balki burai chahta hai.”
5 raja sidkiyah ne unse kaha, “dekho! woh tumhare haath mein hai, tum uske saath jo chahe karo. raja tumhein rok nahin sakta.”
6 isliye unhonne yirmayah ko pakad liya aur use raja ke bete malkiyah ke kund mein feink diya. yah kund ‘pehredaron ke aangan’ mein tha.+ unhonne use rasson se neeche utaar diya. kund mein bilkul paani nahin tha, sirf daldal tha aur yirmayah daldal mein dhansne laga.
7 ebed-melek+ naam ke ek ithiyopiyai aadmi ne, jo raajmahal mein ek khoja* tha, suna ki haakimon ne yirmayah ko kund mein daal diya hai. us vakt raja, binyameen faatak ke paas baitha tha.+
8 tab ebed-melek raajmahal se nikaalkar raja ke paas gaya aur usse kaha,
9 “mere maalik raja, un aadmiyon ne bhavishyavakta yirmayah ke saath bahot bura kiya, use kund mein daal diya! vahaan woh mar jaayega kyonki shehar mein akaal pada hai, khaane ke liye roti kahin nahin hai.”+
10 tab raja ne ithiyopiyai ebed-melek ko hukm diya, “yahaan se 30 aadmiyon ko lekar jaa aur bhavishyavakta yirmayah ko kund mein se nikaal de, isse pehale ki woh mar jaaye.”
11 tab ebed-melek apne saath aadmiyon ko lekar raajmahal ke khazane ke talghar mein gaya+ aur vahaan se kuch fate-purane kapde aur chithde liye. fir unhein rasson se kund mein yirmayah ke paas neeche utaar diye.
12 fir ithiyopiyai ebed-melek ne yirmayah se kaha, “apni donon baglon ke neeche kapde aur chithde rakh aur fir unke oopar rasse baandh le.” yirmayah ne aisa hi kiya.
13 fir unhonne yirmayah ko rasson se oopar khincha aur kund se baahar nikaala. iske baad yirmayah ‘pehredaron ke aangan’ mein raha.+
14 raja sidkiyah ne bhavishyavakta yirmayah ko yahova ke bhavan ke teesre pravesh mein bulvaya. raja ne yirmayah se kaha, “mujhe tujhse kuch poochhna hai. tu kuch chhipana mat.”
15 yirmayah ne usse kaha, “agar main tujhe bataun to tu mujhe zaroor maar daalega. aur agar main tujhe kuch salah doon to tu nahin maanega.”
16 tab raja sidkiyah ne akele mein yirmayah se shapath khaakaar kaha, “yahova ke jeevan ki shapath jisne hamein yah jeevan diya hai, main tujhe nahin maar daaloonga aur un aadmiyon ke havale nahin karoonga jo teri jaan ke peechhe pade hain.”
17 tab yirmayah ne sidkiyah se kaha, “senaon ka parmeshvar aur israel ka parmeshvar yahova kehta hai, ‘agar tu khud ko baibilon ke raja ke haakimon ke havale kar dega,* to tujhe zinda chhod diya jaayega, yah shehar aag se nahin jalaya jaayega aur tu aur tera gharana jeevit rahega.+
18 lekin agar tu khud ko baibilon ke raja ke haakimon ke havale nahin karega,* to yah shehar kasdiyon ke haath mein kar diya jaayega. woh ise aag se foonk deinge+ aur tu unke haath se nahin bach paayega.’”+
19 raja sidkiyah ne yirmayah se kaha, “mujhe un yahoodiyon se dar lagta hai jo kasdiyon ke paas chale gaye hain, kyonki agar mujhe un yahoodiyon ke havale kar diya gaya to woh mere saath bahot berahmi se pesh aayenge.”
20 magar yirmayah ne kaha, “tujhe unke havale nahin kiya jaayega. isliye main tujhse binti karta hoon, tu yahova ki baat maan le jo main tujhe bata raha hoon. isse tera bhala hoga aur tu zinda rahega.
21 lekin agar tu khud ko kasdiyon ke havale nahin karega,* to sun yahova ne mujhe kya bataya hai:
22 dekh! yahooda ke raajmahal mein jitni aurtein bach gayi hain un sabko baibilon ke raja ke haakimon ke paas laaya jaa raha hai+ aur woh tujhse keh rahi hain,‘jin aadmiyon par toone bharosa kiya tha, unhonne tujhe dhokha diya aur tujh par haavi ho gaye.+
unhonne tere paanv keechad mein dhansa diye.
aur ab woh tujhe chhodkar bhaag gaye hain.’
23 aur woh teri saari patniyon aur beton ko kasdiyon ke paas laa rahe hain. tu unke haath se nahin bachega. baibilon ka raja tujhe pakad lega+ aur teri vajah se yah shehar aag se jala diya jaayega.”+
24 fir sidkiyah ne yirmayah se kaha, “tu kisi ko in baaton ki khabar na hone dena, varna teri jaan ki khair nahin.
25 agar haakimon ko pata chal jaaye ki mainne tujhse baat ki hai aur woh aakaar tujhse poochhein, ‘meharbani karke hamein bata ki toone raja se kya kaha. hamse kuch mat chhipa, hum tujhe nahin maar daaleinge.+ bata, raja ne tujhse kya kaha,’
26 to tu unse kehna, ‘main raja se guzarish karne gaya tha ki woh mujhe yahonatan ke ghar vaapas na bheje taaki main vahaan mar na jaaun.’”+
27 kuch samay baad saare haakim yirmayah ke paas aaye aur usse saval karne lage. usne unhein vahi baatein batayin jo raja ne use kehne ki aagya di thi. unhonne usse aur kuch nahin kaha kyonki kisi ne raja aur yirmayah ki baatcheet nahin suni thi.
28 yarooshalem par kabza hone ke din tak yirmayah ‘pehredaron ke aangan’+ mein hi raha.+
kai footnote
^ ya “beemari.”
^ shaa., “nikaalkar kasdiyon ke paas jaayega.”
^ shaa., “loot mein use apni jaan milegi.”
^ shaa., “ke haath kamzor kar raha hai.”
^ ya “darbari.”
^ shaa., “nikaalkar baibilon ke raja ke haakimon ke paas jaayega.”
^ shaa., “nikaalkar baibilon ke raja ke haakimon ke paas nahin jaayega.”
^ shaa., “nikaalkar kasdiyon ke paas nahin jaayega.”