yirmayah 40:1-16
40 jab pehredaron ke sardar naboojardan+ ne yirmayah ko raamah+ mein aazad kar diya to iske baad yahova ka sandesh yirmayah ke paas pahuncha. darasal yirmayah yarooshalem aur yahooda ke un logon mein mil gaya tha jinhein bandi banakar baibilon le jaaya jaa raha tha. isliye naboojardan, yirmayah ko bhi bediyon mein jakadkar raamah le gaya tha.
2 pehredaron ke sardar ne jab yirmayah ko aazad kiya to woh use ek taraf le gaya aur usse kaha, “tere parmeshvar yahova ne bhavishyavani ki thi ki is jagah par yah vipatti aayegi aur
3 yahova ne jaisa kaha tha vaisa hi kiya, kyonki tum logon ne yahova ke khilaf paap kiya aur uski baat nahin maani. iseeliye tumhari yah haalaat hui hai.+
4 ab main tere haathon ki bediyaan kholkar tujhe aazad kar raha hoon. agar tujhe theek lage to mere saath baibilon aa sakta hai, main teri dekhbhal karoonga. lekin agar tu baibilon nahin aana chahta, to mat aa. dekh! yah poora desh tere saamne pada hai. tu jahaan chahe vahaan jaa sakta hai.”+
5 yirmayah lautne se jhijhak raha tha isliye naboojardan ne usse kaha, “tu aheekam ke bete+ aur shaapan+ ke pote gadalyah ke paas chala jaa+ jise baibilon ke raja ne yahooda ke shehron ka adhikari thehraya hai. tu uske saath logon ke beech reh. agar tu uske paas nahin jaana chahta to jahaan tera ji chahe vahaan jaa.”
fir pehredaron ke sardar ne use kuch khaana aur ek tohfa dekar jaane diya.
6 tab yirmayah aheekam ke bete gadalyah ke paas mispa gaya+ aur uske saath un logon ke beech rehne laga jo desh mein bach gaye the.
7 kuch samay baad dehat mein rehnevale sabhi senapatiyon aur unke aadmiyon ne suna ki baibilon ke raja ne aheekam ke bete gadalyah ko desh ka adhikari thehraya hai, usne gadalyah ko desh ke un sabhi gareeb aadmi-aurton aur bachchon ka adhikari thehraya hai jinhein baibilon ki bandhuai mein nahin bheja gaya tha.+
8 woh senapati aur unke aadmi gadalyah ke paas mispa aaye.+ ye the natanyah ka beta ishmael,+ kaareh ke bete yohanan+ aur yonatan, tanhoomet ka beta sarayah, natopa ke rehnevale epai ke bete, ek maakati aadmi ka beta yaajanyah+ aur unke aadmi.
9 aheekam ke bete aur shaapan ke pote gadalyah ne shapath khaakaar senapatiyon aur unke aadmiyon se kaha, “tum log kasdiyon ke sevak banne se mat daro. tum isi desh mein raho aur baibilon ke raja ki seva karo. tumhein kuch nahin hoga, tum salamat rahoge.+
10 aur main yahaan mispa mein rehkar tumhari taraf se un kasdiyon se baat karoonga* jo hamare paas aate hain. magar tum log daakh-madira, garmiyon ke fal aur tel ikattha karna aur unhein bartanon mein jama karna aur un shehron mein bas jaana jinhein tumne apne adhikar mein kiya hai.”+
11 moab, ammon, edom aur doosre deshon mein rehnevale yahoodiyon ne bhi suna ki baibilon ke raja ne yahooda mein kuch logon ko rehne diya hai aur un par aheekam ke bete aur shaapan ke pote gadalyah ko adhikari thehraya hai.
12 isliye woh sab yahoodi un saari jagahon se, jahaan woh titar-bitar ho gaye the, yahooda desh lautne lage. woh sab gadalyah ke paas mispa aaye. aur unhonne badi taadad mein daakh-madira aur garmiyon ke fal ikattha kiye.
13 kaareh ka beta yohanan aur dehat mein rehnevale sabhi senapati gadalyah ke paas mispa aaye.
14 unhonne usse kaha, “kya tu jaanta hai ki ammoniyon ke raja+ baalees ne natanyah ke bete ishmael ko tujhe maar daalne bheja hai?”+ magar aheekam ke bete gadalyah ne unka yakeen nahin kiya.
15 tab kaareh ke bete yohanan ne mispa mein gadalyah se chupke se kaha, “mujhe jaakaar natanyah ke bete ishmael ko maar daalne de. kisi ko pata nahin chalega. varna woh tujhe maar daalega aur yahooda ke jitne log tere paas ikattha huye hain woh sab titar-bitar ho jaayenge aur yahooda ke bache huye mit jaayenge.”
16 magar aheekam ke bete gadalyah+ ne kaareh ke bete yohanan se kaha, “nahin, tu aisa nahin karega. tu ishmael ke baare mein jo keh raha hai woh jhooth hai.”
kai footnote
^ shaa., “ke saamne khada rahoonga.”
