yirmayah 44:1-30
44 yirmayah ko un sabhi yahoodiyon ke liye ek sandesh mila jo misra+ ke migdol,+ tahapnahes,+ nop*+ aur patros ke ilake mein rehte the.+ woh sandesh tha:
2 “senaon ka parmeshvar aur israel ka parmeshvar yahova kehta hai, ‘tum logon ne woh saari vipattiyaan dekhi hain jo main yarooshalem+ aur yahooda ke sab shehron par laa chuka hoon. aaj ye ilake khandhar ban gaye hain aur vahaan ek bhi nivasi nahin hai.+
3 aisa isliye hua kyonki tum logon ne dusht kaam karke mera krodh bhadkaya. tumne jaakaar un doosre devtaon ke liye balidan chadhaye+ aur unki seva ki jinhein na tum jaante ho aur na tumhare baap-daade jaante the.+
4 main baar-baar apne sevkon ko, apne bhavishyavaktaon ko tumhare paas bhejkar* tumse binti karta raha, “tum yah ghinauna kaam mat karo jisse mujhe nafrat hai.”+
5 magar tumne meri baat nahin suni, na hi meri taraf kaan lagaya ki doosre devtaon ke aage balidan chadhane ke dusht kaam se fir sako.+
6 isliye mere gusse aur krodh ka pyala undela gaya aur yahooda ke shehar aur yarooshalem ki galiyaan jalkar raakh ho gayin aur woh aaj tak khandhar aur veeran pade hain.’+
7 ab senaon ka parmeshvar aur israel ka parmeshvar yahova kehta hai, ‘tum kyon khud par ek badi vipatti laana chahte ho jisse har aadmi, aurat, bachcha aur doodh peeta bachcha yahooda se mit jaaye aur koi na bache?
8 tum misra mein, jahaan tum basne gaye ho, kyon apne haathon se doosre devtaon ko balidan chadhakar mera krodh bhadka rahe ho? tum naash ho jaaoge aur dharti ke sab raashtron mein shaapit thehroge aur badnam ho jaaoge.+
9 kya tum bhool gaye ki yahooda desh mein aur yarooshalem ki galiyon mein tumhare purkhon ne aur yahooda ke raajaon+ aur unki patniyon+ ne kaise dusht kaam kiye the? aur kya tum bhool gaye ki khud tumne aur tumhari patniyon ne kaise dusht kaam kiye hain?+
10 aaj tak bhi tumne khud ko namra nahin kiya,* mera dar bilkul nahin maana+ aur na hi tum mere kaanoon aur meri vidhiyon par chale jo mainne tumhein aur tumhare purkhon ko di thi.’+
11 isliye senaon ka parmeshvar aur israel ka parmeshvar yahova kehta hai, ‘mainne thaan liya hai ki main tum par vipatti le aaunga taaki poora yahooda naash ho jaaye.
12 aur main yahooda ke un bache huye logon ko pakdoonga jinhonne misra jaakaar basne ki thaan li thi. woh sab misra mein naash ho jaayenge.+ woh talvar aur akaal se maare jaayenge, chhote-bade sab talvar aur akaal se maare jaayenge. woh shaapit thehreinge, unka aisa hashra hoga ki dekhnevalon ka dil dehal jaayega, unhein baddua di jaayegi aur unki badnami hogi.+
13 main misra mein rehnevalon ko talvar, akaal aur mahamari* se saza doonga, theek jaise mainne yarooshalem ko saza di thi.+
14 aur yahooda ke jo bache huye log misra mein basne gaye hain woh na bach paayenge aur na hi yahooda desh lautne ke liye zinda raheinge. woh yahooda lautne aur vahaan basne ke liye tarseinge, magar nahin lauteinge. sirf chand log hi bacheinge aur lauteinge.’”
15 tab un sabhi aadmiyon ne, jo jaante the ki unki patniyaan doosre devtaon ko balidan chadhati hain aur vahaan khadi unki sabhi patniyon ki badi toli ne aur misra ke patros mein rehnevale sab logon+ ne yirmayah se kaha,
16 “toone yahova ke naam se hamse jo kaha hai hum uske mutabik kaam nahin kareinge.
17 iske bajay, hamne jo kaha hai hum vahi kareinge. hum swarg ki raani* ke aage balidan aur argh chadhayenge.+ jab hum yahooda ke shehron aur yarooshalem ki galiyon mein aisa karte the to hamein aur hamare purkhon, raajaon aur haakimon ko bharpet roti milti thi, hamein kisi cheez ki kami nahin thi aur hum par kabhi koi vipatti nahin aati thi.
18 jab se hamne swarg ki raani* ke aage balidan aur argh chadhana band kar diya tab se hamein har cheez ki kami hone lagi aur hum talvar aur akaal se naash ho gaye hain.”
19 aur un aurton ne kaha, “jab hum swarg ki raani* ke liye balidan aur argh chadhati thi to kya hum apne patiyon ki ijazat ke bagair aisa karti thi? kya hum unki ijazat ke bagair us devi ki moorat ke aakaar ki tikiyaan banakar balidan chadhati thi aur uske liye argh chadhati thi?”
20 tab yirmayah ne usse baat karnevale sab logon se, un aadmiyon aur unki patniyon se kaha,
21 “tum aur tumhare baap-daade, tumhare raja, haakim aur desh ke log yahooda ke shehron aur yarooshalem ki galiyon mein jo balidan chadhate the,+ unhein yahova ne yaad kiya aur woh uske dhyan* mein aaye!
22 aur aisa vakt aaya jab yahova tumhare dusht aur ghinaune kaamon ko aur bardasht na kar saka. tumhara desh ujad gaya, uska aisa hashra hua ki dekhnevalon ka dil dehal gaya, woh shaapit thehra aur vahaan ek bhi nivasi nahin bacha aur uska aaj bhi yahi haal hai.+
23 aisa isliye hua kyonki tumne ye balidan chadhaye aur yahova ke khilaf paap kiya. tumne yahova ki baat, uska kaanoon aur uski vidhiyaan nahin maanin aur jo hidaytein usne yaad dilayin un par tum nahin chale. iseeliye tum par yah vipatti aa padi hai aur aaj tak hai.”+
24 yirmayah ne sab logon se aur sab aurton se yah bhi kaha, “misra mein rehnevale yahooda ke sab logo, yahova ka sandesh suno.
25 senaon ka parmeshvar aur israel ka parmeshvar yahova kehta hai, ‘tumne aur tumhari patniyon ne apne munh se jo kaha use apne haathon se poora kiya. tumne kaha, “hamne swarg ki raani* ko balidan aur argh chadhane ki mannatein maani thi aur hum unhein zaroor poora kareinge.”+ aurto, tum apni mannatein zaroor poori karogi, tumne jaisi mannatein maani hain vaisa zaroor karogi.’
26 isliye misra mein rehnevale yahooda ke sab logo, yahova ka sandesh suno: ‘yahova kehta hai, “main apne mahan naam ki shapath khaakaar kehta hoon ki poore misra mein fir kabhi yahooda ka koi bhi aadmi mere naam se yah kehkar shapath nahin khaayega, ‘saare jahan ke maalik yahova ke jeevan ki shapath!’+
27 ab main un par nazar rakhe huye hoon, isliye nahin ki unke saath bhalai karoon balki isliye ki un par vipatti le aaun.+ misra mein rehnevale yahooda ke sab log talvar aur akaal se tab tak naash hote jaayenge jab tak ki woh mit na jaayen.+
28 sirf kuch hi log talvar se bach jaayenge aur misra se yahooda laut jaayenge.+ tab yahooda ke bache huye sab log jo misra mein rehne gaye the, jaan jaayenge ki kiski baat sach hui, unki ya meri!”’”
29 “yahova ailan karta hai, ‘main is jagah par tumhein saza doonga aur main iski ek nishani deta hoon jisse tum jaan loge ki mainne tum par vipatti laane ki jo baat kahi hai woh zaroor poori hogi.
30 yahova kehta hai, “main misra ke raja firaun hopra ko uske dushmanon aur un logon ke haath mein karnevala hoon jo uski jaan ke peechhe pade hain, theek jaise mainne yahooda ke raja sidkiyah ko baibilon ke raja nabookadnessar* ke haath kar diya jo uska dushman tha aur uski jaan ke peechhe pada tha.”’”+
kai footnote
^ ya “memfis.”
^ shaa., “tadke uthkar tumhare paas bhejta raha.”
^ ya “kuchla hua mehsoos nahin kiya.”
^ ya “beemari.”
^ ek devi ki upadhi jise woh israeli poojte the jo sachchi upasna se mukar gaye the; shaayad yah prajnan ki devi thi.
^ ek devi ki upadhi jise woh israeli poojte the jo sachchi upasna se mukar gaye the; shaayad yah prajnan ki devi thi.
^ ek devi ki upadhi jise woh israeli poojte the jo sachchi upasna se mukar gaye the; shaayad yah prajnan ki devi thi.
^ shaa., “dil.”
^ ek devi ki upadhi jise woh israeli poojte the jo sachchi upasna se mukar gaye the; shaayad yah prajnan ki devi thi.
^ shaa., “nabookadressar.” yah ek alag vartani hai.