yuhanna ke mutabik khushkhabri 20:1-31
20 hafte ke pehale din subah ke vakt jab andhera hi tha, mariyam magdaleeni kabraa* par aayi.+ usne dekha ki kabraa* par rakha patthar pehale se hata hua hai.+
2 tab woh daudi-daudi shamaun patras aur us chele ke paas gayi jisse yeeshu ko bahot pyar tha+ aur unse kaha, “woh prabhu ko kabraa se nikaalkar le gaye hain+ aur hamein nahin pata ki unhonne use kahaan rakha hai.”
3 tab patras aur woh doosra chela kabraa ki taraf chal diye.
4 woh donon saath-saath bhaagne lage, magar doosra chela patras se tez dauda aur kabraa par pehale pahunch gaya.
5 usne jhukkar kabraa mein jhaanka to use malmal ke kapde dikhayi diye,+ magar woh andar nahin gaya.
6 tab shamaun patras bhi uske peechhe-peechhe aa pahuncha aur kabraa ke andar ghus gaya. usne vahaan malmal ke kapde pade huye dekhe.
7 usne dekha ki jo kapda yeeshu ke sir par tha woh doosre kapdon ke saath nahin tha balki ek taraf lapeta hua rakha tha.
8 fir woh doosra chela bhi jo kabraa par pehale pahuncha tha, andar gaya aur usne dekha aur yakeen kiya.
9 woh ab tak shastra ki yah baat nahin samjhe the ki uska mare huon mein se zinda hona zaroori tha.+
10 isliye woh apne ghar laut gaye.
11 magar mariyam roti hui kabraa ke baahar hi khadi rahi. jab usne rote-rote jhukkar kabraa ke andar jhaanka,
12 to safed kapde pehne do swargdooton ko dekha.+ ek us jagah baitha tha jahaan yeeshu ka sir tha aur doosra vahaan baitha tha jahaan uske pair the.
13 unhonne mariyam se kaha, “tu kyon ro rahi hai?” usne unse kaha, “woh mere prabhu ko le gaye hain aur main nahin jaanti ki unhonne use kahaan rakha hai.”
14 yah kehne ke baad jab woh mudi to yeeshu vahaan khada tha, magar woh use dekhkar pehchan nahin paayi.+
15 yeeshu ne usse kaha, “tu kyon ro rahi hai? tu kise dhoondh rahi hai?” mariyam ne use maali samajhkar kaha, “bhaai, agar tu use uthakar le gaya hai to mujhe bata de ki toone use kahaan rakha hai aur main use le jaaungi.”
16 yeeshu ne usse kaha, “mariyam!” tab mariyam ne peechhe mudkar ibrani mein kaha, “rabboni!” (jiska matlab hai, “guru!”)
17 yeeshu ne usse kaha, “mujhse lipti mat reh isliye ki main abhi tak pita ke paas oopar nahin gaya. magar jaakaar mere bhaaiyon se kah,+ ‘main apne pita aur tumhare pita aur apne parmeshvar+ aur tumhare parmeshvar ke paas oopar jaa raha hoon.’”+
18 mariyam magdaleeni chelon ke paas gayi aur unse kaha, “mainne prabhu ko dekha hai!” aur unhein bataya ki yeeshu ne usse kya-kya kaha hai.+
19 usi din yaani hafte ke pehale din, shaam ke samay chele yahoodiyon ke dar se darvaze band karke ghar ke andar the. lekin darvaze band hone ke baavjood yeeshu unke beech aa khada hua aur unse kaha, “tumhein shaanti mile.”+
20 yah kehne ke baad usne unhein apne haath aur apni pasliyaan dikhayin.+ tab chele prabhu ko dekhkar behad khush huye.+
21 yeeshu ne ek baar fir unse kaha, “tumhein shaanti mile.+ jaise pita ne mujhe bheja hai,+ main bhi tumhein bhejta hoon.”+
22 yah kehne ke baad usne un par foonka aur unse kaha, “parmeshvar ki pavitra shakti paao.+
23 agar tum kisi ka paap maaf karoge, to use maaf kar diya jaayega. tum jiska paap maaf nahin karoge, uska paap nahin mitega.”
24 magar jab yeeshu aaya tha, tab thoma+ jo un baarahon mein se ek tha aur judvaan kehlata tha, chelon ke saath nahin tha.
25 isliye doosre chelon ne use bataya, “hamne prabhu ko dekha hai!” magar thoma ne unse kaha, “jab tak main uske haathon mein keelon ke nishan na dekh loon aur unmein apni ungli na daaloon aur uski pasli mein apna haath daalkar na dekh loon,+ tab tak main yakeen nahin karoonga.”
26 aisa hua ki aath din baad chele fir se ghar ke andar the aur thoma bhi unke saath tha. tab ghar ke darvaze band hone ke baavjood yeeshu unke beech aa khada hua aur unse kaha, “tumhein shaanti mile.”+
27 iske baad usne thoma se kaha, “apni ungli mere haathon par lagakar dekh aur apna haath meri pasli mein lagakar dekh. shak karna chhod de balki yakeen kar.”
28 tab thoma ne usse kaha, “hey mere prabhu, hey mere parmeshvar!”
29 yeeshu ne usse kaha, “kya tu isliye yakeen kar raha hai kyonki toone mujhe dekha hai? sukhi hain woh jinhonne dekha nahin fir bhi yakeen karte hain.”
30 sach to yah hai ki yeeshu ne chelon ke saamne aur bhi bahot-se chamatkar kiye jo is kharre mein nahin likhe gaye.+
31 magar jo likhe gaye hain woh isliye likhe gaye hain taaki tum yakeen karo ki yeeshu hi parmeshvar ka beta, maseeh hai aur yakeen karne ki vajah se uske naam se zindagi paao.+
