kyon karein ummeed?

aapko kya lagta hai, agar daniel ne ummeed nahin chhodi hoti, to kya hota? kya uska cancer theek ho jaata? kya woh aaj bhi zinda hota? jo log maante hain ki ummeed rakhne se sehat achhi rehti hai, shaayad woh bhi kahein ki aisa nahin ho sakta. beshak, sirf ummeed rakhne se sabkuch theek nahin ho jaata.

doctor nathan cherney ne ek interview mein kaha ki jo mareez bahot beemar hote hain, unse yah kehna galat hoga ki agar tum achha sochoge, to theek ho jaaoge. doctor cherney ne kaha, “hamne aisa kai baar dekha hai ki jab koi patni theek nahin hoti, to uska pati usi par dosh lagata hai aur kehta hai, ‘tum theek se dhyan nahin karti aur achhi baaton ke baare mein nahin sochti. isliye tum theek nahin ho rahi ho.’ is tarah ki soch galat hai, kyonki isse mareez ko lag sakta hai ki beemari se theek hona ya na hona uske haath mein hai. yaani agar woh theek nahin hota, to ismein uski galti hai.”

jin logon ko koi badi beemari hoti hai, woh pehle se hi bahot nirash rehte hain aur thake huye hote hain. oopar se agar unke parivarvale aur dost un par dosh lagayen, to woh poori tarah toot sakte hain. to kya achhe kal ki ummeed karne ka koi faayda nahin?

nahin, aisa nahin hai. doctor nathan cherney aise mareezon ka ilaj karte hain jinhein koi badi beemari hai. woh jis vibhag mein kaam karte hain, woh beemari ka seedha-seedha ilaj nahin karta, balki is baat ka dhyan rakhta hai ki mareez ka aakhiri vakt aaram se kate. is vibhag mein kaam karnevale doctor is tarah ilaj karte hain ki mareez khush rahein aur unki maansik sthiti achhi rahe. un doctaron ka maanna hai ki is tarah ka ilaj sach mein faaydemand hai. is baat ke kai saboot hain ki agar hum achhi baaton ki ummeed karein, to hamari sehat achhi hogi aur hum khush raheinge.

ummeed hone ke faayde

doctor w gifford-jones ne kaha, “ummeed marham ka kaam karti hai.” unhonne is baat par khojbeen ki ki jinhein jaanleva beemari hai, unka hausla badhane kitna zaroori hai. kai logon ka maanna hai ki jab aise mareezon ki himmat bandhai jaaye, to woh khush rehte hain aur unhein jeene ki ummeed milti hai. san 1989 mein kuch mareezon ka sarve kiya gaya. isse pata lagaya gaya ki jin mareezon ka hausla badhaya gaya, woh zyada lambe samay tak jeeye. lekin haal hi mein ki gayi khojbeen se pata chala ki aisa har baar nahin hota. lekin ek baat to pakki hai, jin mareezon ka hausla badhaya jaata hai, woh itne nirash nahin hote aur unhein dard bhi kam hota hai.

hamari soch ka hamari sehat par kaisa asar padta hai, is par ek baar fir khojbeen ki gayi. kareeb 1,300 aadmiyon ka survey kiya gaya jismein pata lagaya gaya ki apni zindagi ke baare mein woh achha sochte hain ya bura. das saal baad dekha gaya ki inmein se 160 logon ko dil ki beemari ho gayi. un 160 mein se zyadatar log aise the, jo sochte the ki unke saath kuch bura hoga. is khojbeen ke baare mein doctor laura Kubzansky ne, jo amreeka ki ek jaani-maani university mein padhati hain, kaha, “ab tak bas kuch logon ka kehna tha ki achha sochne se hamari sehat achhi rehti hai. lekin is khojbeen se pehli baar yah saabit ho gaya ki achha sochne se dil ki beemari kam hoti hai.”

khojbeen karne par yah bhi pata chala hai ki jin logon ko lagta tha ki unki sehat achhi hai, woh operation karane ke baad jaldi theek ho gaye. lekin jin logon ko lagta tha ki unki sehat theek nahin hai, unhein operation ke baad theek hone mein zyada vakt laga. yah bhi dekha gaya hai ki jo log khush rehte hain, woh lambee umra jeete hain. ek khoj se yah bhi pata chala hai ki achhi aur buri soch ka buzurgon par kya asar padta hai. jab kuch buzurgon ko bataya gaya ki umra dhalne ki vajah se unhein zyada tajurba hai, woh buddhiman hain, to unmein josh bhar aaya. unmein itni furti aa gayi, jitni 12 hafte kasrat karne par aati hai!

aisa kyon hota hai ki achha sochne se, ummeed hone se ek vyakti ki sehat achhi rehti hai? vaigyanikon aur doctaron ko bhi abhi tak iska sahi-sahi javab nahin pata hai. lekin ab tak jo khojbeen hui hai, uske aadhar par jaankaron ka yahi maanna hai. ek doctor ne kaha, “jo log khush rehte hain aur achhi baaton ki ummeed karte hain, unhein tanav nahin hota. is vajah se unki sehat achhi rehti hai. to khush rehna sehatmand rehne ka ek achha tareeka hai.”

doctoron aur vaigyanikon ne haal hi mein is baat ka pata lagaya hai. lekin bible mein yah baat sadiyon pehle likh di gayi thi. aaj se kareeb 3,000 saal pehle raja sulaiman ne likha, “dil ka khush rehna badhiya dava hai, magar man ki udasi saari taakat choos leti hai.” (neetivachan 17:22) dhyan deejiye ki yahaan yah nahin likha hai ki khush rehne se saari beemariyaan theek ho jaayengi, balki yah likha hai ki “khush rehna badhiya dava hai.”

vaakai, agar ummeed sachmuch ki koi dava hoti, to har ek doctor apne mareez ko yah dava deta. ummeed rakhne se sirf hamari sehat par hi asar nahin padta, iske aur bhi kai faayde hain.

hamari soch ka hum par kya asar padta hai?

vaigyanikon ne yah pata lagaya hai ki jo achhi baaton ki ummeed karte hain, unhein bahot faayda hota hai. woh school mein, kaam ki jagah par aur khel-kood mein bhi achha karte hain. udahran ke liye, kuch ladkiyon ka survey liya gaya, jo daud mein hissa leti thi. unke coach ne bataya ki kaun-si ladki kitna achha daudti hai. un ladiyon se bhi poochha gaya ki unhein kya lagta hai ki woh kitna achha daudeingi. daud ke baad dekha gaya ki coach ki report ke bajay ladkiyon ne jo anuman lagaya tha, woh zyada sahi tha. aakhir ummeed rakhne ka itna zabardast asar kyon hota hai?

vaigyanikon ne aise logon ka adhyan karke bhi bahot kuch seekha hai, jo hamesha sochte hain ki kuch bura hoga. aaj se kareeb 50 saal pehle vaigyanikon ne yah pata lagaya ki kai baar haalaat ki vajah se jaanvar aur insan donon ummeed kho baithte hain. unhonne kuch logon ko ek kamre mein band kiya jahaan bahot shor tha. unse kaha gaya tha ki agar woh kuch button dabayen, to woh shor band ho jaayega. sabhi log us shor ko rok paaye.

kuch aur logon se bhi yahi baat kahi gayi, lekin jab unhonne button dabaye, to woh aavaz band nahin hui. unmein se kai logon ko laga ki ab kuch nahin ho sakta aur woh ummeed kho baithe. usi din jab kuch aur prayog kiye gaye, to log haath-par-haath dhare baithe rahe. unhein laga ki chaahe woh kuch bhi karein, kuch faayda nahin hoga. lekin unmein se kuch log aise the jinhonne haar nahin maani aur woh koshish karte rahe.

inmein se kai prayog doctor martin seligman ne taiyar kiye the. in prayogon ke baad unhonne is baare mein khojbeen karna jaari rakha ki logon ki soch ka un par kya asar hota hai. unhonne is baare mein bhi adhyan kiya ki kyon kuch log himmat haar baithte hain. woh is nateeje par pahunche ki jo log sochte hain ki unke saath bura hoga, woh dar ke maare peechhe hat jaate hain aur kabhi kuch haasil karne ki koshish hi nahin karte. unhonne kaha, “main 25 saalon se is vishay par khojbeen kar raha hoon. mainne dekha hai ki kuch log maante hain ki agar kuch bura hua, to woh unhin ki galti thi. unhein lagta hai ki buri baatein hoti raheingi, fir chaahe woh unhein rokne ki laakh koshish kyon na kar lein. woh aisa sochte hain, shaayad iseeliye unke saath bura hota hai. agar woh achha sochein, to shaayad unke saath achha hi ho.”

kuch logon ko shaayad yah baat nayi lage, lekin bible mein yah baat bahot pehle se batayi gayi thi. ismein likha hai, “mushkil ghadi mein agar tu nirash ho jaaye, to tujhmein bahot kam taakat reh jaayegi.” (neetivachan 24:10) bible mein pehle se hi saaf-saaf bataya gaya tha ki agar hum nirash ho jaayen aur bura sochein, to hammein kuch karne ki himmat hi nahin hogi. hum is tarah ki bhaavnaon par kaaboo kaise paa sakte hain?

[page par tasveer]

achhe kal ki ummeed karne se bahot faayda ho sakta hai