naujavanon ke saval
kya unhein har baat batana zaroori hai?
aapke mammi-paapa kyon har baat jaanna chahte hain?
unka kehna hai ki unhein aapki chinta hai! magar aapko lagta hai ki woh aap par kuch zyada hi nazar rakhte hain, aapko apni marzee se jeene hi nahin dete. udahran ke liye:
erin naam ki ladki kehti hai, “mere paapa bina poochhe mera phone le lete hain, mera password maangte hain aur fir sab message padh lete hain. jab main unhein rokne ki koshish karti hoon to unhein lagta hai ki main unse kuch chhipa rahi hoon.”
denise, jo ab 20-22 saal ki hai batati hai ki uski mammi bade dhyan se uska phone bil check karti thi. denise yah bhi kehti hai, “mammi har number dekhkar poochhti thi ki yah kiska hai aur itni der mainne usse kya baat ki.”
kayla naam ki ek ladki kehti hai ki ek baar uski mammi ne uski diari padh li. woh kehti hai, “us daayri mein mainne apne dil ki kai baatein likhi thi, yahaan tak ki unke baare mein bhi kuch likha tha! us din ke baad se mainne diary likhna hi chhod diya.”
sau baat ki ek baat: aapke mammi-paapa aapka bhala chahte hain, isliye kabhi woh aapke saath sakhti baratte hain to kabhi aapko dheel dete hain. unhein apni zimmedari kaise nibhani hai, yah batana aapka kaam nahin. fir bhi kabhi-kabhar aapko lag sakta hai ki woh aapke saath kuch zyada hi sakht ho rahe hain. pareshan mat hoiye! aise haalaat ka saamna karne ke liye aap apni taraf se kuch kar sakte hain.
aap kya kar sakte hain
kuch mat chhipaiye. bible badhava deti hai ki hum “sab baaton mein imandari se kaam” karein. (ibraniyon 13:18) apne mammi-paapa ke saath bhi aisa hi keejiye. jab aap unse sach kaheinge aur kuch nahin chhipayenge, to ho sakta hai woh aapko aur chhoot dene ke liye taiyar ho jaayen.
zara sochiye: kya aapne saabit kiya hai ki woh aap par bharosa kar sakte hain? kya aap unke bataye samay tak ghar pahunchte hain? kya aap unhein apne doston ke baare mein batane se katrate hain? kuch poochhne par kya aap ghuma-firakar unhein javab dete hain?
“main apne mammi-paapa ko khulkar batati hoon ki meri zindagi mein kya chal raha hai. main bina hichkichaye unke har saval ka javab deti hoon. badle mein, woh mujh par bharosa karte hain aur meri har baat mein dakhal nahin dete. is tarah hum ek-doosre ko khush rakh paate hain.”—delia.
sabra rakhiye. bible kehti hai, “tum kya ho, iska saboot dete raho.” (2 kurinthiyon 13:5) doosron ka bharosa jeetne mein vakt lagta hai, lekin aapki mehnat bekar nahin jaayegi.
zara sochiye: aapke mammi-paapa aapki umra se guzar chuke hain, isliye woh aapko samajh sakte hain. kya ab aap andaza laga sakte hain ki unhein kyon aapki zindagi mein dilchaspi rehti hai?
“mujhe lagta hai ki mammi-paapa nahin chahte ki hamari umra mein unhonne jo galtiyaan kin, vahi galtiyaan hum bhi doharayen.”—daniel.
khud ko unki jagah rakhiye. unki nazar se dekhne ki koshish keejiye. bible kehti hai ki ek bhali patni “apne gharbar ka dhyan rakhti hai” aur ek achha pita apne bachchon ko ‘yahova ki marzee ke mutabik sikhata aur maargdarshan deta hai.’ (neetivachan 31:27; ifisiyon 6:4, footnote) ab aap hi bataiye, agar unhein yah zimmedari poori karni hai to kya unke liye yah jaanna zaroori nahin ki aapki zindagi mein kya chal raha hai?
zara sochiye: agar aap unki jagah hote aur jaante ki is kachchi umra mein kya-kya hota hai, to kya aap apne bete ya beti se bina koi saval-javab kiye unhein poori chhoot dete?
“jab aap javani ki dehleez par kadam rakhte hain tab aapko lagta hai ki mammi-paapa aapki zindagi mein dakhal de rahe hain. lekin ab jab main bada ho gaya hoon to main samajh paata hoon ki woh aisa kyon karte hain, yah unka pyar hai!”—james.
