agar

• aap chahte hain ki har test mein aapke 100% number aayen

• aap kuch naya karne se ghabrate hain kyonki aapko dar hai ki kahin aap kaamyab nahin huye to

• saamnevala aapki galti batata hai aur aapko lagta hai ki aapko neecha dikhaya jaa raha hai

. . . , to iska matlab hai ki aap perfectionist hain yaani aap yah ummeed karte hain ki aapse aur doosron se kabhi galti nahin hogi. kya isse koi fark padta hai?

•  kya is tarah ki soch sahi hai?

•  hum yah soch kaise sudhar sakte hain?

•  naujavan kya kehte hain

kisi kaam ko achhe-se-achha karne ki koshish karne mein koi burai nahin. lekin jaisa ki angrezee ki ek kitab zyada achha hona bhi kyon bura hai? kehti hai, “kisi kaam ko achhi tarah karne mein aur jo kaam asambhav hai uske peechhe bhaagne mein, zameen-aasman ka fark hai.” kitab aage kehti hai, “yah ummeed karna ki aapse ya doosron se kabhi koi galti nahin hogi ek bahot badi bhool hai, kyonki hum sabke andar kamiyaan hain!”

bible mein bhi yahi bataya gaya hai, “dharti par aisa koi nek insan nahin, jo hamesha achhe kaam karta hai.” (sabhopdeshak 7:20) aapmein kamiyaan hain isliye yah ummeed mat keejiye ki aap har baar number 1 honge.

kya yah baat kabool karna aapke liye mushkil hai? agar haan, to dhyan deejiye ki is tarah ki soch kaise chaar tareekon se aap par bura asar daal sakti hai.

1. aap apne baare mein kaisa nazriya rakhte hain. is tarah ki soch rakhnevale apne liye bahot unche star thehrate hain jinhein haasil karna naamumkin hota hai. isliye woh aksar nirash ho jaate hain. alicia naam ki ladki kehti hai, “sach to yah hai ki hum har kaam mein maahir nahin ho sakte. aur agar hum yah sochne lagein ki hamse koi kaam theek se nahin hota, to hum khud ki nazron mein gir jaayenge aur hamara aatm-vishvas khatm ho jaayega. isse hum nirasha mein doob sakte hain.”

2. achhi salah milne par aap kaisa nazriya rakhte hain. is tarah ke logon ko jab koi achhi salah the jaati hai, to unhein lagta hai ki unki beizzti ki jaa rahi hai. jeremy naam ka naujavan kehta hai, “jab koi mujhe sudharta hai to mujhe bahot bura lagta hai.” lekin woh yah bhi kehta hai, “yaad rakhiye ki aap sabkuch nahin kar sakte kyonki aapki bhi kuch hadein hain aur aapko bhi doosron ki madad leni pad sakti hai.”

3. aap doosron ke baare mein kaisa nazriya rakhte hain. jo doosron se had-se-zyada ki ummeed karte hain, woh aksar unmein nuks nikalte hain. atharah saal ki anna kehti hai, “jab aapko lagta hai ki aapse kabhi koi galti nahin hoti, to aap doosron ko bhi usi tarazoo mein taulte hain. aur jab log aapki ummeedon par khare nahin utarte to aapko nirasha ho jaate hain.”

4. doosre aapke baare mein kaisa nazriya rakhte hain. agar aap doosron se had-se-zyada ki ummeed kareinge to log aapse door bhaageinge! beth naam ki ladki kehti hai, “aap un logon ko kabhi khush nahin kar sakte jo apne aur doosron ke liye aise star thehrate hain jin tak pahunchna naamumkin hai. bhala kaun un logon ke aas-paas bhi fatakna chahega!”

bible batati hai, “sab log jaan jaayen ki tum lihaz karnevale insan ho.” (filippiyon 4:5) lihaz karnevale log khud se aur doosron se had-se-zyada ki ummeed nahin karte.

“duniya mein pehle hi itna tanav hai, to fir khud se bahot-zyada ki ummeed karke apni pareshani kyon badhana? yah to maano apne pairon par kulhadi maarna hua!”—nyla.

bible mein likha hai, ‘maryada mein rehkar apne parmeshvar ke saath chal.’ (mika 6:8) maryada mein rehnevale log apni seemayen pehchante hain. woh utna hi karte hain, jitna unse ho sakta hai. woh ek hi kaam ke peechhe had-se-zyada samay nahin barbad karte.

“main utni hi zimmedari leti hoon jitni main utha sakti hoon, tab mujhe is baat ki khushi milti hai ki mujhe jo kaam diya gaya tha mainne use achhe se kiya.”—hailey.

lekin yah sochkar hamein haath-par-haath dharkar nahin baithna chahiye ki galtiyaan to hongi hi, balki jaisa sabhopdeshak 9:10 mein bataya hai, “tu jo bhi kare use ji-jaan se kar,” to hamein mehnat karni chahiye. saath hi hamein yah yaad rakhna chahiye ki hum khud ka lihaz karein yaani hum apne-aap se had-se-zyada ki ummeed na karein aur apni maryada mein rahein.

“main apne kaam mein ji-jaan laga deta hoon, use achhi tarah karta hoon. mujhe pata hai ki galtiyaan hongi, lekin mujhe is baat ki khushi hoti hai ki mainne kaam karne mein koi kasar nahin chhodi.”—joshua.